ॐ शास्त्राण्य् अधीत्य मेधावी अभ्यस्य च पुनः पुनः । (१।१)

परमं ब्रह्म विद्याया उल्कावान् नान्यथोत्सजेत् ॥ (१।२)

ॐकारं रथम् आरुह्य विष्णुं कृत्वा तु सारथिम् । (२।१)

ब्रह्मलोकपदान्वेषी रुद्राराधनतत्परः ॥ (२।२)

तावद् रथेन गन्तव्यं यावद् रथपथि स्थितः । (३।१)

छित्त्वा रथपन्थानं रथम् उत्सृज्य गच्छति ॥ (३।२)

मात्रा लिङ्गपदं त्यक्त्वा शब्दव्यञ्जनवर्जिता । (४।१)

अस्वरेण मकारेण पदं सूक्ष्मं च गच्छति ॥ (४।२)

शब्दादिविषयाः पञ्च मनश् चैवातिचञ्चलम् । (५।१)

चिन्तयेद् आत्मनो रश्मीन् प्रत्याहारः स उच्यते ॥ (५।२)

प्रत्याहारस् तथा ध्यानं प्राणायामो ऽथ धारणा । (६।१)

तर्कश् चैव समाधिश् च षडङ्गो योग उच्यते ॥ (६।२)

यथा पर्वतधातूनां दह्यन्ते धमनान् मलाः । (७।१)

तथेन्द्रियकृता दोषा दह्यन्ते प्राणनिग्रहात् ॥ (७।२)

प्राणायामैर् दहेद् दोषान् धारणाभिश् च किल्बिषम् । (८।१)