सद्बोधभानुना भित्त्वा जनानाम् अन्तरं तमः । (१।१)

यः सन्मतित्वम् आपन्नः सन्मतिः सन्मतिं क्रियात् ॥ (१।२)

वृषभं वृषभं वन्दे वृषभाङ्कं वृषार्चितम् । (२।१)

वृषतीर्थप्रणेतारम् भेत्तारं कर्मविद्विषाम् ॥ (२।२)

परमेष्ठिपदाप्तानाम् परमेष्ठिपदाप्तये । (३।१)

परमेष्ठिपदौ वन्दे सत्यं च परमेष्ठिनम् ॥ (३।२)

आर्हती भारती पूज्या लोकालोकप्रदीपिका । (४।१)

रजो विधूय नो नित्यं तनोतु विमलाम् मतिम् ॥ (४।२)

स्वेष्टार्थसिद्धिकरणाश् चरणाः सन्तु गौरवाः । (५।१)

गौरवाप्ताः सुचरणैस् तरणैर् मे भवाम्बुधेः ॥ (५।२)

शक्त्या हीनो ऽपि वक्ष्ये ऽहं गुरुभक्त्या प्रणोदितः । (६।१)

श्रीभद्रबाहुचरितम् यथा ज्ञातं गुरूक्तितः ॥ (६।२)

यच्छ्रुतं मुग्धबुद्धीनाम् मिथ्यामोहमहातमः । (७।१)

धुनुते तनुते शुद्धजैनमार्गे ऽमलां मतिम् ॥ (७।२)

अथात्र भारते वर्षे विषये मगधाभिधे । (८।१)

पुरं राजगृहं भाति पुरंदरपुरोपमम् ॥ (८।२)

नताशेषनृपश्रेणिः श्रेणिकः श्रेयसां निधिः । (९।१)

भावुकः पालकस् तस्य चेलनी महिषीशिता ॥ (९।२)

एकदासौ विशां नाथो विदित्वा वनपालतः । (१०।१)

विपुलाद्रौ महावीरसमवसृतिम् आगताम् ॥ (१०।२)

परानन्दथुम् आपन्नो ऽचलद्देवं विवन्दिषुः । (११।१)

तौर्यत्रिकवरारावबधिरीकृतदिङ्मुखः ॥ (११।२)

निरीक्ष्य सुरसंसेव्यं केवलोज्ज्वलरोचिषम् । (१२।१)

नुत्वा नत्वा समभ्यर्च्य तस्थिवान् नरसंसिदि ॥ (१२।२)

द्विधाधर्मं जिनोद्गीतम् अश्रावीत् प्रश्रयान्वितः । (१३।१)

प्रणिपत्य ततो ऽप्राक्षीत् करौ मुकुलयन् नृपः ॥ (१३।२)

देवात्र दुःषमे काले केवलश्रुतबोधकः । (१४।१)

कियन्तो ऽग्रे भविष्यन्ति किं किं चातो भविष्यति ॥ (१४।२)

श्रुत्वा तदीयं व्यवहारं व्याजहार गिरां पतिः । (१५।१)

गम्भीरघननिर्घोषैर् मोदयन् भव्यकेकिनः ॥ (१५।२)

मयि मुक्तिम् इते राजन् गौतमाख्यः सुधर्मवाक् । (१६।१)

जम्बूनामा भविष्यति त्रयो ऽमी केवलेक्षणाः ॥ (१६।२)