Chapter 1
Select a line for its word-by-word analysis.
व्याप्तचराचरभावविशेषं चिन्मयम् एकम् अनन्तम् अनादिम् । (१।१)
vyāptacarācarabhāvaviśeṣaṃ cinmayam ekam anantam anādim |
भैरवनाथम् अनाथशरण्यं त्वन्मयचित्ततया हृदि वन्दे ॥ (१।२)
bhairavanātham anāthaśaraṇyaṃ tvanmayacittatayā hṛdi vande ||
त्वन्मयम् एतद् अशेषम् इदानीं भाति मम त्वदनुग्रहशक्त्या । (२।१)
tvanmayam etad aśeṣam idānīṃ bhāti mama tvadanugrahaśaktyā |
त्वं च महेश सदैव ममात्मा स्वात्ममयं मम तेन समस्तम् ॥ (२।२)
tvaṃ ca maheśa sadaiva mamātmā svātmamayaṃ mama tena samastam ||
स्वात्मनि विश्वगये त्वयि नाथे तेन न संसृष्टिभीतिकथास्ति । (३।१)
svātmani viśvagaye tvayi nāthe tena na saṃsṛṣṭibhītikathāsti |
सत्स्व् अपि दुर्धरदुःखविमोहत्रासविधायिषु कर्मगणेषु ॥ (३।२)
satsv api durdharaduḥkhavimohatrāsavidhāyiṣu karmagaṇeṣu ||
अन्तक मां प्रति मा दृशम् एनं क्रोधकरालतमां विनिधेहि । (४।१)
antaka māṃ prati mā dṛśam enaṃ krodhakarālatamāṃ vinidhehi |
शङ्करसेवनचिन्तनधीरो भीषणभैरवशक्तिमयो ऽस्मि ॥ (४।२)
śaṅkarasevanacintanadhīro bhīṣaṇabhairavaśaktimayo 'smi ||
इत्थम् उपोढभवन्मयसंविद्दीधितिदारितभूरितमिस्रः । (५।१)
ittham upoḍhabhavanmayasaṃviddīdhitidāritabhūritamisraḥ |
मृत्युयमान्तककर्मपिशाचैर् नाथ नमो ऽस्तु न जातु बिभेमि ॥ (५।२)
mṛtyuyamāntakakarmapiśācair nātha namo 'stu na jātu bibhemi ||
प्रोदितसत्यविबोधमरीचिप्रेक्षितविश्वपदार्थसतत्त्वः । (६।१)
proditasatyavibodhamarīciprekṣitaviśvapadārthasatattvaḥ |
भावपरामृतनिर्भरपूर्णे त्वय्य् अहम् आत्मनि निर्वृतिम् एमि ॥ (६।२)
bhāvaparāmṛtanirbharapūrṇe tvayy aham ātmani nirvṛtim emi ||
मानसगोचरम् एति यदैव क्लेशदशा तनुतापविधात्री । (७।१)
mānasagocaram eti yadaiva kleśadaśā tanutāpavidhātrī |
नाथ तदैव मम त्वदभेदस्तोत्रपरामृतवृष्टिर् उदेति ॥ (७।२)
nātha tadaiva mama tvadabhedastotraparāmṛtavṛṣṭir udeti ||
शङ्कर सत्यम् इदं व्रतदानस्नानतपो भवतापविदारि । (८।१)
śaṅkara satyam idaṃ vratadānasnānatapo bhavatāpavidāri |
तावकशास्त्रपरामृतचिन्ता स्यन्दति चेतसि निर्वृतिधाराम् ॥ (८।२)
tāvakaśāstraparāmṛtacintā syandati cetasi nirvṛtidhārām ||
नृत्यति गायति हृष्यति गाढं संविद् इयं मम भैरवनाथ । (९।१)
nṛtyati gāyati hṛṣyati gāḍhaṃ saṃvid iyaṃ mama bhairavanātha |
त्वां प्रियम् आप्य सुदर्शनम् एकम् दुर्लभम् अन्यजनैः समयज्ञम् ॥ (९।२)
tvāṃ priyam āpya sudarśanam ekam durlabham anyajanaiḥ samayajñam ||
वसुरसपौषे कृष्णदशम्याम् अभिनवगुप्तः स्तवम् इमम् अकरोत् । (१०।१)
vasurasapauṣe kṛṣṇadaśamyām abhinavaguptaḥ stavam imam akarot |
येन विभुर् भवमरुसन्तापं शमयति जनस्य झटिति दयालुः ॥ (१०।२)
yena vibhur bhavamarusantāpaṃ śamayati janasya jhaṭiti dayāluḥ ||
समाप्तं स्तवम् इदम् अभिनवाख्यं पद्यनवकम् ॥ (११।१)
samāptaṃ stavam idam abhinavākhyaṃ padyanavakam ||
Data courtesy of The Digital Corpus of Sanskrit.