ॐ मनो हि द्विविधं प्रोक्तं शुद्धं चाशुद्धम् एव च । (१।१)

अशुद्धं कामसंकल्पं शुद्धं कामविवर्जितम् ॥ (१।२)

मन एव मनुष्याणां कारणं बन्धमोक्षयोः । (२।१)

बन्धाय विषयासक्तं मुक्त्यै निर्विषयं स्मृतम् ॥ (२।२)

यतो निर्विषयस्यास्य मनसो मुक्तिर् इष्यते । (३।१)

तस्मान् निर्विषयं नित्यं मनः कार्यं मुमुक्षुणा ॥ (३।२)

निरस्तविषयासङ्गं संनिरुद्धं मनो हृदि । (४।१)

यदा यात्य् उन्मनीभावं तदा तत् परममदम् ॥ (४।२)

तावद् एव निरोद्धव्यं यावद्धृदि गतं क्षयम् । (५।१)

एतज् ज्ञानं च मोक्षं च अतो ऽन्यो ग्रन्थविस्तरः ॥ (५।२)

नैव चिन्त्यं न चाचिन्त्यम् अचिन्त्यं चिन्त्यम् एव च । (६।१)

पक्षपातविनिर्मुक्तं ब्रह्म सम्पद्यते तदा ॥ (६।२)

स्वरेण संधयेद् योगम् अस्वरं भावयेत् परम् । (७।१)

अस्वरेण हि भावेन भावो नाभाव इष्यते ॥ (७।२)

तद् एव निष्कलं ब्रह्म निर्विकल्पं निरञ्जनम् । (८।१)

तद् ब्रह्माहम् इति ज्ञात्वा ब्रह्म सम्पद्यते ध्रुवम् ॥ (८।२)

निर्विकल्पम् अनन्तं च हेतुदृष्टान्तवर्जितम् । (९।१)

अप्रमेयम् अनाद्यं च ज्ञात्वा च परमं शिवम् ॥ (९।२)

न निरोधो न चोत्पत्तिर् न वन्द्यो न च शासनम् । (१०।१)

न मुमुक्षा न मुक्तिश् च इत्य् एषा परमार्थता ॥ (१०।२)

एक एवात्मा मन्तव्यो जाग्रत्स्वप्नसुषुप्तिषु । (११।१)

स्थानत्रयाद् व्यतीतस्य पुनर्जन्म न विद्यते ॥ (११।२)

एक एव हि भूतात्मा भूते भूते व्यवस्थितः । (१२।१)

एकधा बहुधा चैव दृश्यते जलचन्द्रवत् ॥ (१२।२)

घटसंभृतम् आकाशं लीयमाने घटे यथा । (१३।१)

घटो लीयेत नाकाशं तद्वज् जीवो घटोपमः ॥ (१३।२)

घटवद् विविधाकारं भिद्यमानं पुनः पुनः । (१४।१)

तद्भग्नं न च जानाति स जानाति च नित्यशः ॥ (१४।२)

शब्दमायावृतो यावत् तावत् तिष्ठति पुष्करे । (१५।१)

भिन्ने तमसि चैकत्वम् एकम् एवानुपश्यति ॥ (१५।२)

शब्दाक्षरं परं ब्रह्म यस्मिन् क्षीणे यद् अक्षरम् । (१६।१)

तद् विद्वान् अक्षरं ध्यायेद् यदीच्छेच्छान्तिम् आत्मनः ॥ (१६।२)

द्वे विद्ये वेदितव्ये तु शब्दब्रह्म परं च यत् । (१७।१)

शब्दब्रह्मणि निष्णातः परं ब्रह्माधिगच्छति ॥ (१७।२)

ग्रन्थम् अभ्यस्य मेधावी ज्ञानविज्ञानतत्त्वतः । (१८।१)

पलालम् इव धान्यार्थी त्यजेद् ग्रन्थम् अशेषतः ॥ (१८।२)

गवाम् अनेकवर्णानां क्षीरस्याप्य् एकवर्णता । (१९।१)

क्षीरवत् पश्यते ज्ञानं लिङ्गिनस् तु गवां यथा ॥ (१९।२)

घृतम् इव पयसि निगूढं भूते भूते च वसति विज्ञानम् । (२०।१)

सततं मन्थयितव्यं मनसा मन्थानभूतेन ॥ (२०।२)

ज्ञाननेत्रं समादाय चरेद् वह्निम् अतः परम् । (२१।१)

निष्कलं निर्मलं च शान्तं तद् ब्रह्माहम् इति स्मृतम् ॥ (२१।२)

सर्वभूताधिवासं च यद् भूतेषु वसत्य् अधि । (२२।१)

सर्वानुग्राहकत्वेन तद् अस्म्य् अहं वासुदेव तद् अस्म्य् अहं वासुदेव ॥ (२२।२)