कैलासशिखरासीनं देवदेवं जगत्पतिम् । (१।१)

पप्रच्छ पार्वती देवी तत्त्वं परमदुर्लभम् ॥ (१।२)

पार्वत्य् उवाच । (२।१)

मणीनां लक्षणं देव कथयस्व प्रसादतः । (२।२)

येन सिद्धिं लभन्ते ऽत्र साधका गतकल्मषाः ॥ (२।३)

महादेव महाघोर कुर्वन्ति रिपुमर्दनम् । (३।१)

कवित्वं दीर्घजीवित्वं कुरुते ऽत्र यथा प्रभो ॥ (३।२)

अष्टौ गुणाः फलं यत्र त्वत्प्रसादान् महेश्वर । (४।१)

ज्ञानमार्गं च मोक्षम् च शूलरोगं च दारुणम् ॥ (४।२)

चक्षूरोगं शिरोरोगं विषोपद्रवम् एव च । (५।१)

स्फुटं वद यथा प्रभो प्रसादान् मे महेश्वर ॥ (५।२)

उवाच शंकरो देवि यत् त्वया परिपृच्छ्यते । (६।१)

यन् न कस्यचिद् आख्यातं तद् वदामि वरानने ॥ (६।२)

पुराहं विष्णुना युक्तो ब्रह्मणा सह सुन्दरि । (७।१)

शुक्लतीर्थे गतो देवि रेवातीरे सुशोभने ॥ (७।२)

रत्नपर्वतनामा च तत्र तिष्ठति भूधरः । (८।१)

इन्द्रेण स्थापितो देवि सर्वदेवसुखंकरः ॥ (८।२)

तस्य दर्शनमात्रेण सर्वपापैः प्रमुच्यते । (९।१)

रोगी रोगविनिर्मुक्तो जायते नात्र संशयः ॥ (९।२)

देव्या आयतने ये तु चितां दहन्ति मानवाः । (१०।१)

ते यान्ति परमं स्थानं शिवदर्शनसंयुतम् ॥ (१०।२)

अष्टम्यां स्नाति यः कुण्डे पूजयित्वा ततः शिवम् । (११।१)

सर्वपापविनिर्मुक्तो मम लोकं समेति सः ॥ (११।२)

इत्थं देवगणाः सर्वे कुण्डे स्नात्वा क्षणं स्थिताः । (१२।१)

पवित्रदेहाः श्रीमन्तः पुनः केदारम् आगताः ॥ (१२।२)

गरुत्मत्स्थापितं लिङ्गं सर्वपापविमोचकम् । (१३।१)

तस्य दर्शनमात्रं हि ब्रह्महत्यां व्यपोहति ॥ (१३।२)

अष्टम्यां च चतुर्दश्यां पूर्णमास्यां विशेषतः । (१४।१)

यः पूजयति पुण्यात्मा मम लोकं स गच्छति ॥ (१४।२)

केदारं पूजयेद् यस् तु पुण्यात्मा भाग्यभाजनम् । (१५।१)

सर्वार्थसिद्धिसम्पन्नं प्राप्नोति परमं पदम् ॥ (१५।२)

इन्द्रेण स्थापितं वज्रं कोशश् च धनदेन तु । (१६।१)

मयापि स्थापिता मन्त्राः कथितं ते वरानने ॥ (१६।२)

गरुत्मतः समुद्गारान् मणिकला महानदी । (१७।१)

विनिःसृता महातेजाः सर्वपापप्रणाशिनी ॥ (१७।२)

तस्याः प्रभावतो देवि मणयः शुभलक्षणाः । (१८।१)

भोगदा मोक्षदाश् चैव रोगदोषविघातकाः ॥ (१८।२)

श्रीदेव्य् उवाच । (१९।१)

मणीनां लक्षणं ब्रूहि यथास्ति वृषभध्वज । (१९।२)

केनोपायेन ते ग्राह्या देवपूजा कथं विभो ॥ (१९।३)

कीदृशं च व्रतं कार्यं किं दानं कस्य पूजनम् । (२०।१)

का च भक्तिक्रिया कार्या देव मे वद भैरव ॥ (२०।२)

श्रीभैरव उवाच । (२१।१)

केदारभवनं गत्वा कलशानां शताष्टकम् । (२१।२)

श्रीमत्केदारनाथाय मनसा कृतभावनः ॥ (२१।३)

क्षेत्रपालं यथाशक्त्या उपहारैर् अनुत्तमैः । (२२।१)

पूजयित्वा प्रयत्नेन साधकः फलकाङ्क्षया ॥ (२२।२)

एवं पूज्य महाभक्त्या प्रणम्य च पुनः पुनः । (२३।१)

बलिं दद्याद् विधानेन दिक्षु सर्वासु यत्नतः ॥ (२३।२)

शिवस्थाने तु कर्तव्यो जपः सुरसमर्चिते । (२४।१)

ततो गत्वा महानद्यां मणिरत्नानि वीक्षते ॥ (२४।२)

मन्त्रसंनद्धकायश् च गोजिह्वालेपभूषितः । (२५।१)

अथ तेषां मणीनां तु कर्तव्यं सुपरीक्षणम् ॥ (२५।२)

गोपितं यन् मया पूर्वं तन् मे निगदतः शृणु । (२६।१)

सुतप्तहेमवर्णाभो नीलरेखासमन्वितः ॥ (२६।२)

श्वेतरेखाधरो नित्यं पीतरेखासमायुतः । (२७।१)

आरक्तरेखासंयुक्तः कृष्णरेखाविभूषितः ॥ (२७।२)

एतैश् चिह्नैः समायुक्तो नीलकण्ठ इति स्मृतः । (२८।१)

ददाति विपुलान् भोगान् ज्ञानमार्गं सुदुर्लभम् ॥ (२८।२)

कवित्वं दीर्घजीवित्वं कुरुते नात्र संशयः । (२९।१)

ताराभो हेमवर्णाभः चतुर्बिन्दुविभूषितः ॥ (२९।२)

कृष्णबिन्दुधरो यस् तु बिडालसमरोचनः । (३०।१)

स भवेद्धनलाभाय नात्र कार्या विचारणा ॥ (३०।२)

रक्तपादपवर्णाभ इन्द्रनीलसमद्युतिः । (३१।१)

श्वेतरेखासमायुक्तो ह्य् अर्थकार्ये महाद्युतिः ॥ (३१।२)

स विष्णुर् इति विख्यातः सर्वैश्वर्यफलप्रदः । (३२।१)

शुद्धस्फटिकसंकाशो नीलरेखाविभूषितः ॥ (३२।२)

कृष्णबिन्दुधरः शुक्लः स मणिः सर्वकामदः । (३३।१)

पीतश् च श्वेतरेखश् च मणिः स्वच्छश् च दृश्यते । (३३।२)

गुणानाम् आकरः सो हि बहुरोगान् निहन्ति च ॥ (३३।३)

यः पारावतकण्ठाभः सम्प्राप्तो बिन्दुभिः सितैः । (३४।१)

आस्तीकस्य कुलोत्पन्नः स मणिर् विषदर्पहा ॥ (३४।२)

सारङ्गाक्षिसमो महाद्युतिधरो मत्तेभनेत्राकृतिः । (३५।१)

श्वेतैर् बिन्दुभिर् अन्वितो वरतनुर् भास्वान् मणिर् बिन्दुकः । (३५।२)

तत्प्रक्षालितवारिपानविधिना नश्येद् विषं दारुणं । (३५।३)

यत् सर्वं विनतासुतो बहुविधं हन्याद् विषं दारुणम् । (३५।४)

संग्रामे जयते रिपून् बहुविधान् भोगान् मणिर् यच्छति ॥ (३५।५)

किंचिन् नीलपदस् ततो ऽरुणरुचिः किंचिच्च विद्युत्प्रभः । (३६।१)

किंचिल् लोचनसुप्रभो बहुविधरेखायुतो वर्तुलः । (३६।२)

विख्यातः स महामणिर् विषहरो बद्धो नराणां करे । (३६।३)

भूतं नाशयतीह सोमसदृशस् तस्मात् पृथिव्यां प्रियः ॥ (३६।४)

नानारत्नसमद्युतिर् बहुविधै रेखागणैर् अङ्कितः । (३७।१)

शुद्धो बिन्दुगणैर् युतः सविमलो नागेन्द्रदर्पापहः । (३७।२)

सत्यं काञ्चनवित्तलाभकरणे सृष्टो मयासौ मणिः । (३७।३)

प्रख्यातश् च स सिद्धजन्मजननैः पुण्यैः सतां गोचरः ॥ (३७।४)

नीलवर्णो भवेद् यस् तु बिन्दुपञ्चकभूषितः । (३८।१)

विशुद्धाङ्गो ऽरुणो वृत्तः प्रसिद्धो विनतासुतः ॥ (३८।२)

सिन्दूरवर्णसंकाशो यस्याङ्गे रेखा काशिता । (३९।१)

कृष्णवर्णस् तु विज्ञेयो निःशेषविषमर्दनः ॥ (३९।२)

कांस्यवर्णो भवेद् यस् तु नानारेखासमाकुलः । (४०।१)

नानाबिन्दुसमाकीर्णो ज्वरतापं व्यपोहति ॥ (४०।२)

पीतवर्णो भवेद् यस् तु द्विरेखः सितबिन्दुकः । (४१।१)

सुजीर्णवृश्चिकस्यापि विषं हन्ति सुदारुणम् ॥ (४१।२)

श्वेता पीता समा रेखा इन्द्रनीलसमद्युतिः । (४२।१)

नेत्ररोगं च शूलं च जलपानाद् व्यपोहति ॥ (४२।२)

हरिद्वर्णो भवेद् यस् तु श्वेतरेखाविभूषितः । (४३।१)

पीतरेखासमायुक्तो निःशेषगरलापहः ॥ (४३।२)

पीतगोधूमवर्णो यो गजनेत्राकृतिः पुनः । (४४।१)

श्वेतबिन्दुधरो नित्यं भूतस्याजीर्णनाशकः ॥ (४४।२)

रक्ताङ्गः शुद्धरेखश् च अर्धाङ्गे कृष्ण एव च । (४५।१)

स मणी रक्तशूलं च नेत्रशूलं व्यपोहति ॥ (४५।२)

शुद्धस्फटिकसंकाशः किंचिच्चारक्तपीतकः । (४६।१)

वृश्चिकानां विषं हन्ति स मणिः सर्वकामदः ॥ (४६।२)

रत्कम् अर्धं च कृष्णार्धं श्वेतं किंचिद् भवेद् यदि । (४७।१)

एवंरूपो भवेद् यस् तु सर्पादिविषनाशनः ॥ (४७।२)

रक्ताङ्गो रक्तरेखश् च आवर्तैः शोभनैर् युतः । (४८।१)

स मणिर् गरुडो ज्ञेयः सर्पादिविषनाशनः ॥ (४८।२)

पीताङ्गः कृष्णरेखश् च नानाबिन्दुसमाकुलः । (४९।१)

एवंरूपो भवेद् यस् तु महासर्पविषापहः ॥ (४९।२)

पीताङ्गः पीतरेखश् च रक्तरेखाविभूषितः । (५०।१)

सर्वव्याधिहरः श्वेतः कथितस् तु वरानने ॥ (५०।२)

कूष्माण्डीपुष्पसंकाशो नानारूपस् तु बिन्दुभिः । (५१।१)

सर्वव्याधिहरो ज्ञेयः समस्तविषमर्दनः ॥ (५१।२)

रक्तवर्णा भवन्तीह नानाबिन्दुसमाकुलाः । (५२।१)

तेजस्विनो ऽतिरूपाश् च सर्वे ते विषमर्दकाः ॥ (५२।२)

बिन्दुनाभो महाकान्तिः कृष्णबिन्दुविभूषितः । (५३।१)

सर्वरोगविनाशो ऽयम् कथितस् ते वरानने ॥ (५३।२)

माञ्जिष्ठपीतवर्णाभस् ताम्रबिन्दुसमन्वितः । (५४।१)

सर्वव्याधिहरो नित्यं भूतज्वरविनाशनः ॥ (५४।२)

दाडिमीपुष्पसंकाशः कृष्णबिन्दुविभूषितः । (५५।१)

सौभाग्यजननः श्रीमान् भ्रमरेखायुतः प्रिये ॥ (५५।२)

कुन्दपुष्पप्रतीकाशस् तुल्यत्वे वर्तुलः प्रिये । (५६।१)

एवंरूपेण संयुक्तः समस्तविषमर्दकः ॥ (५६।२)

गजनेत्राकृतिर् यस् तु बिडालाक्षिसमप्रभः । (५७।१)

तार्क्ष्यतुल्यमहातेजाः पूजनीयो यथार्चितः ॥ (५७।२)

तीर्थकरः सुतेजाश्च द्युतिमान् इति दृश्यते । (५८।१)

समस्तविषहो ज्ञेयः स मणिर् जीयते ध्रुवम् ॥ (५८।२)