ॐ अकारो दक्षिणः पक्ष उकारस् तूत्तरः स्मृतः । (१।१)

मकारस् तस्य पुच्छं वा अर्धमात्रा शिरस् तथा ॥ (१।२)

पादौ रजस् तमस् तस्य शरीरं सत्त्वम् उच्यते । (२।१)

धर्मश् च दक्षिणं चक्षुर् अधर्मश् चोत्तरं स्मृतम् ॥ (२।२)

भूर् लोकः पादयोस् तस्य भुवर्लोकस् तु जानुनोः । (३।१)

स्वर् लोकः कटिदेशे तु नाभिदेशे महर् जगत् ॥ (३।२)

जनलोकस् तु हृदये कण्ठदेशे तपस् ततः । (४।१)

भ्रुवोर् ललाटमध्ये तु सत्यलोको व्यवस्थितः ॥ (४।२)

सहस्रम् इति चात्र मन्त्र एव प्रदर्शितः । (५।१)

एवम् एनं समारूढो हंसं योगविचक्षणः ॥ (५।२)

न बध्यते कर्मचारी पापकोटिशतैर् अपि । (६।१)

आग्नेयी प्रथमा मात्रा वायव्यैषा वशानुगा ॥ (६।२)

भानुमण्डलसंकाशा भवेन् मात्रा तथोत्तरा । (७।१)

परमा चार्धमात्रा च वारुणीं तां विदुर् बुधाः ॥ (७।२)

कलात्रयानना वापि तासां मात्राप्रतिष्ठिता । (८।१)

एष ॐकार आख्यातो धारणाभिर् निबोधत ॥ (८।२)

योषिणी प्रथमा मात्रा विद्युन्माला तथापरा । (९।१)

पतंगी च तृतीया स्याच् चतुर्थी वायुवेगिनी ॥ (९।२)

पञ्चमीनाम् अधेया च षष्ठी चैन्द्री विधीयते । (१०।१)

सप्तमी वैष्णवी नाम शंकरी च तथाष्टमी ॥ (१०।२)

नवमी महती नाम ध्रुवेति दशमी मता । (११।१)

एकादशी भवेन् मौनी ब्राह्मीति द्वादशी मता ॥ (११।२)

प्रथमायां तु मात्रायां यदि प्राणैर् वियुज्यते । (१२।१)

स राजा भारते वर्षे सार्वभौमः प्रजायते ॥ (१२।२)

द्वितीयायां समुत्क्रान्तो भवेद् यक्षो महात्मवान् । (१३।१)

विद्याधरस् तृतीयायां गन्धर्वस् तु चतुर्थिकाम् ॥ (१३।२)

पञ्चम्याम् अथ मात्रायां यदि प्राणैर् वियुज्यते । (१४।१)

उषितः सहदेवत्वं सोमलोके महीयते ॥ (१४।२)

षष्ठ्याम् इन्द्रस्य सायुज्यं सप्तम्यां वैष्णवं पदम् । (१५।१)

अष्टम्यां व्रजते रुद्रं पशूनां च पतिं तथा ॥ (१५।२)

नवम्यां च महर्लोकं दशम्यां च ध्रुवं व्रजेत् । (१६।१)

एकादश्यां तपोलोकं द्वादश्यां ब्रह्म शाश्वतम् ॥ (१६।२)

ततः परं शुद्धं व्यापकं निष्कलं शिवम् । (१७।१)

सदोदितं परं ब्रह्म ज्योतिषाम् उदयो यतः ॥ (१७।२)

अतीन्द्रियं गुणातीतं मनो लीनं यदा भवेत् । (१८।१)

अनौपम्यम् अभावं च योगयुक्तं तदादिशेत् ॥ (१८।२)

तद्भक्तस् तत्समासक्तः शनैर् मुञ्चेत् कलेवरम् । (१९।१)

सुस्थितो योगचारेण सर्वसङ्गविवर्जितः ॥ (१९।२)

ततो विलीनपाशो ऽसौ विमलः केवलः प्रभुः । (२०।१)

तेनैव ब्रह्मभावेन परमानन्दम् अश्नुते ॥ (२०।२)

इति ॥ (२१।०)