प्रणौमि परया भक्त्या प्रकृष्टविभुतां विभुम् । (१।१)

नाशोत्पादस्थितिप्रष्टं परब्रह्म निरञ्जनम् ॥ (१।२)

मदीयमानसाम्भोजराजहंससमप्रभम् । (२।१)

सदा प्रमोदपीयूषसिन्धुकेलिकलाकुलम् ॥ (२।२)

अग्निश्छागरथो वह्निः कृशानुः पावकः शिखी । (३।१)

चित्रभानुश्च दमुना धनंजयहुताशनौ ॥ (३।२)

धूमध्वजो बृहद्भानुर् ज्वालाजिह्वस् तनूनपात् । (४।१)

वैश्वानरः सप्तमन्त्रो जातवेदास्तरीरपि ॥ (४।२)

ज्वलनो जागृविर्बर्हिः कृष्णवर्त्मानलौ शुचिः । (५।१)

शुष्मदस्मौ तथा वीतिहोत्रानिलसखौ वसुः ॥ (५।२)

शुक्रो विभावसुः केशश् चित्रभानुर् उषर्बुधः । (६।१)

वृषाकपिः शमीगर्भो रोहिताश्वो विरोचनः ॥ (६।२)

अर्चिष्मानाश्रयाशोऽपि विश्वप्सा बहुलो हरिः । (७।१)

तिथः कृपीटयोनिश्च तुत्थो हव्यवहः स्मृतः ॥ (७।२)

सप्तोदर्चिर् अप्पित्तं च हव्यवाहाशुशुक्षणी । (८।१)

पचनो हिरण्यरेता बर्हिर्ज्योतिस् तमोहरः ॥ (८।२)

अग्निप्रिया स्मृताग्नायी स्वाहापि कथिता स्मृतौ । (९।१)

संवर्तकः समुद्राग्निर् वडवामुखबाडवौ ॥ (९।२)

वडवानल और्वोऽपि दवदाववनाग्नयः । (१०।१)

इरंमदो मेघवह्निः करीषानलछागणौ ॥ (१०।२)

तुषवह्नौ कुकूलः स्यात् तुल्यौ संतापसंज्वरौ । (११।१)

बाष्पे ऊष्माप्यथो वह्निजिह्वा कीला शिखार्चिषः ॥ (११।२)

ज्वाला हेतिः शिखा वृद्धा झलक्का परिकीर्तिता । (१२।१)

स्फुलिङ्गोल्कालातवह्निकणा ज्वालोल्मुके अपि ॥ (१२।२)

धूमो ऽम्भःसूवायुवाहौ करमालोऽग्निकेतनम् । (१३।१)

अग्निवाहस्तरीः प्रोक्तस्तथा जीमूतवाह्यपि ॥ (१३।२)

श्रीमद्गढमलाङ्गोद्भूस् तेजोवर्गमरूपयत् । (१४।१)

वायुः समीरणो वातो मातरिश्वा प्रभञ्जनः ॥ (१४।२)

समीरः पवनो नित्यगतिः कम्पाकमारुतौ । (१५।१)

पृषदश्वो जगत्प्राणो नभस्वाननिलो मरुत् ॥ (१५।२)

प्रकम्पनाशुगौ गन्धवहः समिर इत्यपि । (१६।१)

नभःश्वासोऽहिकान्तोऽपि दैत्यदेवो महाबलः ॥ (१६।२)

स्पर्शनश्च हरिः प्रोक्तः पवमानसदागती । (१७।१)

स झञ्झा वृष्टियुक् प्रोक्तः व्यानस् त्वङ्मात्रसंस्थितः ॥ (१७।२)

अपानः पृष्ठपार्ष्णिस्थ उदानो हृच्छिरोऽन्तरे । (१८।१)

प्राणो हृन्नाभिनक्रस्थः समानो नाभिहृद्गतः ॥ (१८।२)