निधाय हृदि विश्वेशं विधाय गुरुवन्दनम् । (१।१)

बालानां सुखबोधाय क्रियते तर्कसंग्रहः ॥ (१।२)

द्रव्यगुणकर्मसामान्यविशेषसमवायाभावाः सप्त पदार्थाः ॥ (२।१)

तत्र द्रव्याणि पृथिव्यप्तेजोवाय्वाकाशकालदिगात्ममनांसि नवैव ॥ (३।१)

रूपरसगन्धस्पर्शसंख्यापरिमाणपृथक्त्वसंयोगविभागपरत्वापरत्वगुरुत्वद्रवत्वस्नेहशब्दबुद्धिसुखदुःखेच्छाद्वेषप्रयत्नधर्माधर्मसंस्काराश् चतुर्विंशतिगुणाः ॥ (४।१)

उत्क्षेपणावक्षेपणाकुञ्चनप्रसारणगमनानि पञ्च कर्माणि ॥ (५।१)

परम् अपरं चेति द्विविधं सामान्यम् ॥ (६।१)

नित्यद्रव्यवृत्तयो विशेषास् त्व् अनन्ता एव ॥ (७।१)

समवायस् त्व् एक एव ॥ (८।१)

अभावश् चतुर्विधः । (९।१)

प्रागभावः प्रध्वंसाभावो ऽत्यन्ताभावो ऽन्योन्याभावश् चेति ॥ (९।२)

गन्धवती पृथिवी । (१०।१)

सा द्विविधा नित्यानित्या च । (१०।२)

नित्या परमाणुरूपा । (१०।३)

अनित्या कार्यरूपा । (१०।४)

पुनस् त्रिविधा शरीरेन्द्रियविषयभेदात् । (१०।५)

शरीरम् अस्मदादीनाम् । (१०।६)

इन्द्रियं गन्धग्राहकं घ्राणं नासाग्रवर्ति । (१०।७)

विषयो मृत्पाषाणादिः ॥ (१०।८)

शीतस्पर्शवत्य आपः । (११।१)

ता द्विविधाः नित्या अनित्याश् च । (११।२)

नित्याः परमाणुरूपाः । (११।३)

अनित्याः कार्यरूपाः । (११।४)

पुनस् त्रिविधाः शरीरेन्द्रियविषयभेदात् । (११।५)

शरीरं वरुणलोके । (११।६)

इन्द्रियं रसग्राहकं रसनं जिह्वाग्रवर्ति । (११।७)

विषयः सरित्समुद्रादिः ॥ (११।८)

उष्णस्पर्शवत् तेजः । (१२।१)

तद् द्विविधं नित्यम् अनित्यं च । (१२।२)

नित्यं परमाणुरूपम् । (१२।३)

अनित्यं कार्यरूपम् । (१२।४)

पुनस् त्रिविधं शरीरेन्द्रियविषयभेदात् । (१२।५)

शरीरम् आदित्यलोके । (१२।६)

इन्द्रियं रूपग्राहकं चक्षुः कृष्णताराग्रवर्ति । (१२।७)

विषयश् चतुर्विधः । (१२।८)

भौमदिव्यौदर्याकरजभेदात् । (१२।९)

भौमं वह्न्यादिकम् । (१२।१०)

अबिन्धनं दिव्यं विद्युदादि । (१२।११)

भुक्तस्य परिणामहेतुर् औदर्यम् आकरजं सुवर्णादि ॥ (१२।१२)

रूपरहितस्पर्शवान् वायुः । (१३।१)

स द्विविधो नित्यो ऽनित्यश् च । (१३।२)

नित्यः परमाणुरूपः । (१३।३)

अनित्यः कार्यरूपः । (१३।४)

पुनस् त्रिविधः शरीरेन्द्रियविषयभेदात् । (१३।५)

शरीरं वायुलोके । (१३।६)

इन्द्रियं स्पर्शग्राहकं त्वक्सर्वशरीरवर्ति । (१३।७)

विषयो वृक्षादिकम्पनहेतुः । (१३।८)

शरीरान्तःसंचारी वायुः प्राणः । (१३।९)

स चैको ऽप्य् उपाधिभेदात् प्राणापानादिसंज्ञा लभते ॥ (१३।१०)

शब्दगुणम् आकाशम् । (१४।१)

तच् चैकं विभु नित्यं च ॥ (१४।२)

अतीतादिव्यवहारहेतुः कालः । (१५।१)

स चैको विभुर् नित्यश् च ॥ (१५।२)

प्राच्यादिव्यवहारहेतुर् दिक् । (१६।१)

सा चैका विभ्वी नित्या च ॥ (१६।२)

ज्ञानाधिकरणम् आत्मा । (१७।१)

स द्विविधः परमात्मा जीवात्मा च । (१७।२)

तत्रेश्वरः सर्वज्ञः परमात्मैक एव । (१७।३)

जीवात्मा प्रतिशरीरं भिन्नो विभुर् नित्यश् च ॥ (१७।४)

सुखाद्युपलब्धिसाधनम् इन्द्रियं मनः । (१८।१)

तच् च प्रत्यात्मनियतत्वाद् अनन्तं परमाणुरूपं नित्यं च ॥ (१८।२)

चक्षुर्मात्रग्राह्यो गुणो रूपम् । (१९।१)

तच् च शुक्लनीलपीतरक्तहरितकपिशचित्रभेदात् सप्तविधं पृथिवीजलतेजोवृत्ति । (१९।२)

तत्र पृथिव्यां सप्तविधम् । (१९।३)

अभास्वरशुक्लं जले । (१९।४)

भास्वरशुक्लं तेजसि ॥ (१९।५)

रसनग्राह्यो गुणो रसः । (२०।१)

स च मधुराम्ललवणकटुकषायतिक्तभेदात् षड्विधः । (२०।२)

पृथिव्यां षड्विधः । (२०।३)

जले मधुर एव ॥ (२०।४)

घ्राणग्राह्यो गुणो गन्धः । (२१।१)

स च द्विविधः सुरभिरसुरभिश् च । (२१।२)

पृथिवीमात्रवृत्तिः । (२१।३)

त्वगिन्द्रियमात्रग्राह्यो गुणः स्पर्शः । (२१।४)

स च त्रिविधः शीतोष्णानुष्णाशीतभेदात् । (२१।५)

पृथिव्यप्तेजोवायुवृत्तिः । (२१।६)

तत्र शीतो जले । (२१।७)

उष्णस् तेजसि । (२१।८)

अनुष्णाशीतः पृथिवीवाय्वोः ॥ (२१।९)

रूपादिचतुष्टयं पृथिव्यां पाकजम् अनित्यं च । (२२।१)

अन्यत्रापाकजं नित्यम् अन्त्यं च । (२२।२)

नित्यगतं नित्यम् । (२२।३)

अनित्यगतम् अनित्यम् ॥ (२२।४)

एकत्वादिव्यवहारहेतुः संख्या । (२३।१)

नवद्रव्यवृत्तिर् एकत्वादिपरार्धपर्यन्ता । (२३।२)

एकत्वं नित्यम् अनित्यं च । (२३।३)

नित्यगतं नित्यम् अनित्यगतम् अनित्यम् । (२३।४)

द्वित्वादिकं तु सर्वत्रानित्यम् एव ॥ (२३।५)

मानव्यवहारकारणं परिमाणं । (२४।१)

नवद्रव्यवृत्ति । (२४।२)

तच् चतुर्विधम् । (२४।३)

अणु महद् दीर्घं ह्रस्वं चेति ॥ (२४।४)

पृथग्व्यवहारकारणं पृथक्त्वम् । (२५।१)

सर्वद्रव्यवृत्ति ॥ (२५।२)

संयुक्तव्यवहारहेतुः संयोगः । (२६।१)

सर्वद्रव्यवृत्तिः ॥ (२६।२)

संयोगनाशको गुणो विभागः । (२७।१)

सर्वद्रव्यवृत्तिः ॥ (२७।२)

परापरव्यवहारासाधारणकारणे परत्वापरत्वे । (२८।१)

पृथिव्यादिचतुष्टयमनोवृत्तीति । (२८।२)

ते द्विविधे दिक्कृते कालकृते च । (२८।३)

दूरस्थे दिक्कृतं परत्वम् । (२८।४)

समीपस्थे दिक्कृतम् अपरत्वम् । (२८।५)

ज्येष्ठे कालकृतं परत्वम् । (२८।६)

कनिष्ठे कालकृतम् अपरत्वम् ॥ (२८।७)

आद्यपतनासमवायिकारणं गुरुत्वं । (२९।१)

पृथिवीजलवृत्ति ॥ (२९।२)

आद्यस्यन्दनासमवायिकारणं द्रवत्वं पृथिव्यप्तेजोवृत्ति । (३०।१)

तद् द्विविधं सांसिद्धिकं नैमित्तिकं च । (३०।२)

सांसिद्धिकं जले नैमित्तिकं पृथिवीतेजसोः । (३०।३)

पृथिव्यां घृतादावग्निसंयोगजन्यं दरवत्वम् । (३०।४)

तेजसि सुवर्णादौ ॥ (३०।५)

चूर्णादिपिण्डीभावहेतुर् गुणः स्नेहः । (३१।१)

जलमात्रवृत्तिः ॥ (३१।२)

श्रोत्रग्राह्यो गुणः शब्दः । (३२।१)

आकाशमात्रवृत्तिः । (३२।२)

स द्विविधो द्वन्यात्मको वर्णात्मकश् चेति । (३२।३)

द्वन्यात्मको भेर्यादौ । (३२।४)

वर्णात्मकः संस्कृतभाषादिरूपः ॥ (३२।५)

सर्वव्यवहारहेतुर् बुद्धिर् ज्ञानम् । (३३।१)

सा द्विविधा स्मृतिरनुभवश् च । (३३।२)

संस्कारमात्रजन्यं ज्ञानं स्मृतिः । (३३।३)

तद्भिन्नं ज्ञानम् अनुभवः ॥ (३३।४)

स द्विविधो यथार्थो ऽयथार्थश् च । (३४।१)

तद्वति तत्प्रकारको ऽनुभवो यथार्थः । (३४।२)

यथा रजत इदं रजतम् इति ज्ञानम् । (३४।३)

स एव प्रमेत्य् उच्यते । (३४।४)

तदभाववति तत्प्रकारको ऽनुभवो ऽयथार्थः । (३४।५)

यथा शुक्ताव् इदं रजतम् इति ज्ञानम् ॥ (३४।६)

यथार्थानुभवश् चतुर्विधः प्रत्यक्षानुमित्युपमितिशब्दभेदात् । (३५।१)

तत्करणम् अपि चतुर्विधं प्रत्यक्षानुमानोपमानशब्दभेदात् ॥ (३५।२)

असाधारणम् कारणं करणम् । (३६।१)

कार्यनियतपूर्ववृत्ति कारणम् । (३६।२)

कार्यं प्रागभावप्रतियोगि । (३६।३)

कारणं त्रिविधं समवाय्यसमवायिनिमित्तभेदात् । (३६।४)

यत् समवेतं कार्यम् उत्पद्यते तत् समवायिकारणम् । (३६।५)

यथा तन्तवः पटस्य पटश् च खगतरूपादेः । (३६।६)

कार्येण कारणेन वा सहैकस्मिन्न् अर्थे समवेतत्वे सति यत् कारणं तद् असमवायिकारणम् । (३६।७)

यथा तन्तुसंयोगः पटस्य तन्तुरूपं पटरूपस्य । (३६।८)

तदुभयभिन्नं कारणं निमित्तकारणम् । (३६।९)

यथा तुरीवेमादिकं पटस्य । (३६।१०)

तद् एतत्त्रिविधकारणमध्ये यद् असाधारणं कारणं तद् एव करणम् ॥ (३६।११)

तत्र प्रत्यक्षज्ञानकरणं प्रत्यक्षम् । (३७।१)

इन्द्रियार्थसन्निकर्षजन्यं ज्ञानं प्रत्यक्षम् । (३७।२)

तद् द्विविधं निर्विकल्पकं सविकल्पकं चेति । (३७।३)

तत्र निर्विकल्पकं ज्ञानं निर्विकल्पकं यथेदं किंचित् । (३७।४)

सपरकारकं ज्ञानं सविकल्पकं यथा डित्थोऽयम् ब्रह्मणो ऽयं श्यामोऽयम् इति ॥ (३७।५)

प्रत्यक्षज्ञानहेतुर् इन्द्रियार्थसन्निकर्षः षड्विधः । (३८।१)

संयोगः संयुक्तसमवायः संयुक्तसमवेतसमवायः समवायः समवेतसमवायो विशेषणविशेष्यभावश् चेति । (३८।२)

चक्षुषा घटप्रत्यक्षजनने संयोगः सन्निकर्षः । (३८।३)

घटरूपप्रत्यक्षजनने संयुक्तसमवायः सन्निकर्षः चक्षुःसंयुक्ते घटे रूपस्य समवायात् । (३८।४)

रूपत्वसामान्यप्रत्यक्षे संयुक्तसमवेतसमवायः सन्निकर्षः चक्षुःसंयुक्ते घटे रूपं समवेतं तत्र रूपत्वस्य समवायात् । (३८।५)

श्रोत्रेण शब्दस्याकाशगुणत्वात् गुणगुणिनोश् च समवायात् । (३८।६)

शब्दत्वसाक्षात्कारे समवेतसमवायः सन्निकर्षः श्रोत्रसमवेते शब्दे शब्दत्वस्य समवायात् । (३८।७)

अभावप्रत्यक्षे विशेषणविशेष्यभावः सन्निकर्षो घटाभाववद् भृतलम् इत्य् अत्र चक्षुःसंयुक्ते भूतले घटाभावस्य विशेषणत्वात् । (३८।८)

एवं सन्निकर्षषट्कजन्यं ज्ञानं प्रत्यक्षम् । (३८।९)

तत्करणम् इन्द्रियम् । (३८।१०)

तस्माद् इन्द्रियं प्रत्यक्षप्रमाणम् इति सिद्धम् ॥ (३८।११)

अनुमितिकरणम् अनुमानम् । (३९।१)

परामर्शजन्यं ज्ञानम् अनुमितिः । (३९।२)

व्याप्तिविशिष्टपक्षधर्मताज्ञानं परामर्शः । (३९।३)

यथा वह्निव्याप्यधूमवान् अयं पर्वत इति ज्ञानं परामर्शः । (३९।४)

तज् जन्यं पर्वतो वह्निमान् इति ज्ञानम् अनुमितिः । (३९।५)

यत्र यत्र धूमस् तत्राग्निर् इति साहचर्यनियमो व्याप्तिः । (३९।६)

व्याप्यस्य पर्वतादिवृत्तित्वं पक्षधर्मता ॥ (३९।७)

अनुमानं द्विविधं स्वार्थं परार्थं च । (४०।१)

तत्र स्वार्थं स्वानुमितिहेतुः । (४०।२)

तथा हि स्वयम् एव भूयो दर्शनेन यत्र धूमस् तत्र अग्निर् इति महानसादौ व्याप्तिं गृहीत्वा पर्वतसमीपं गतस् तद्गते चाग्नौ संदिहानः पर्वते धूमं पश्यन् व्याप्तिं स्मरति यत्र धूमस् तत्राग्निर् इति । (४०।३)

तदन्तरं वह्निव्याप्यधूमवान् अयं पर्वत इति ज्ञानम् उत्पद्यते । (४०।४)

अयम् एव लिङ्गपरामर्श इत्य् उच्यते । (४०।५)

तस्मात् पर्वतो वह्निमान् इति ज्ञानम् अनुमितिर् उत्पद्यते । (४०।६)

तद् एतत् स्वार्थानुमानम् । (४०।७)

यत् तु स्वयं धूमाद् अग्निम् अनुमाय परप्रतिपत्त्यर्थं पञ्चावयववाक्यं प्रयुक्ते तत् परार्थानुमानम् । (४०।८)

यथा पर्वतो वह्निमान् धूमवत्त्वात् । (४०।९)

यो यो धूमवान् स वह्निमान् यथा महानसः । (४०।१०)

तथा चायम् । (४०।११)

तस्मात् तथेति । (४०।१२)

अनेन प्रतिपादिताल्लिङ्गात् परोऽप्य् अग्निं प्रतिपद्यते ॥ (४०।१३)

प्रतिज्ञाहेतूदाहरणोपनयनिगमानि पञ्चावयवः । (४१।१)

पर्वतो वह्निमान् इति प्रतिज्ञा । (४१।२)

धूमवत्त्वाद् इति हेतुः । (४१।३)

यो यो धूमवान् स सोऽग्निमान् यथा महानस इत्य् उदाहरणम् । (४१।४)

तथा चायम् इति उपनयः । (४१।५)

तस्मात् तथेति निगमनम् ॥ (४१।६)

स्वार्थानुमितिपरार्थानुमित्योर् लिङ्गपरामर्श एव करणम् । (४२।१)

तस्माल् लिङ्गपरामर्शानुमानम् ॥ (४२।२)

लिङ्गं त्रिविधम् । (४३।१)

अन्वयव्यतिरेकि केवलान्वयि केवलव्यतिरेकि चेति । (४३।२)

अन्वयेन व्यतिरेकेण च व्याप्तिमद् अन्वयव्यतिरेकि । (४३।३)

यथा वह्नौ साध्ये धूमवत्त्वम् । (४३।४)

यत्र धूमस् तत्राग्निर् यथा महानस इत्य् अन्वयव्याप्तिः । (४३।५)

यत्र वह्निर् नास्ति तत्र धूमोऽपि नास्ति यथा महाह्रद इति व्यतिरेकव्याप्तिः । (४३।६)

अन्वयमात्रव्याप्तिकं केवलान्वयि यथा घटोऽभिधेयः प्रमेयत्वात् पटवत् । (४३।७)

अत्र प्रमेयत्वाभिध्यत्वयोर् व्यतिरेकव्याप्तिर् नास्ति सर्वस्यापि प्रमेयत्वाद् अभिधेयत्वाच् च । (४३।८)

व्यतिरेकमात्रव्याप्तिकं केवलव्यतिरेकि यथा पृथिवी तरेभ्यो भिद्यते गन्धवत्त्वात् । (४३।९)

यद् इतरेभ्यो न भिद्यते न तद् गन्धवत् । (४३।१०)

यथा जलम् । (४३।११)

न चेयं तथा । (४३।१२)

तस्मान् न तथेति अत्र यद् गन्धवत् तद् इतरभिन्नम् इत्य् अन्वयदृष्टान्तो नास्ति पृथिवीमात्रस्य पक्षत्वात् ॥ (४३।१३)

संदिग्धसाध्यवान् पक्षः । (४४।१)

यथा धूमवत्त्वे हेतौ पर्वतः ॥ (४४।२)

निश्चितसाध्यवान् सपक्षः । (४५।१)

यथा तत्रैव महानसः ॥ (४५।२)

निश्चितसाध्याभाववान् विपक्षः । (४६।१)

यथा तत्रैव महाह्रदः ॥ (४६।२)

सव्यभिचारविरुद्धसत्पक्षासिद्धबाधिताः पञ्च हेत्वाभासाः ॥ (४७।१)

सव्यभिचारो ऽनैकान्तिकः । (४८।१)

स त्रिविधः । (४८।२)

साधारणासाधारणानुपसंहारिभेदात् । (४८।३)

तत्र साध्याभाववद्वृत्तिः साधारणो ऽनैकान्तिकः । (४८।४)

यथा पर्वतो वह्निमान् प्रमेयत्वाद् इति प्रमेयत्वस्य वह्न्यभाववति ह्रदे विद्यमानत्वात् । (४८।५)

सर्वसपक्षविपक्षव्यावृत्तो ऽसाधारणः । (४८।६)

यथा शब्दो नित्यः शब्दत्वाद् इति । (४८।७)

शब्दत्वं सर्वेभ्यो नित्येभ्योऽन्त्येभ्यश् च व्यावृत्तं शब्दमात्रवृत्ति । (४८।८)

अन्वयव्यतिरेकदृष्टान्तरहितो ऽनुपसंहारी । (४८।९)

यथा सर्वम् अनित्यं प्रमेयत्वाद् इति । (४८।१०)

अत्र सर्वस्यापि पक्षत्वाद् दृष्टान्तो नास्ति ॥ (४८।११)

साध्याभावव्याप्तो हेतुर् विरुद्धः । (४९।१)

यत्र शब्दो नित्यः कृतकत्वाद् इति । (४९।२)

कृतकत्वं हि नित्यत्वाभावेनानित्यत्वेन व्याप्तम् ॥ (४९।३)

यस्य साध्यभावसाधकं हेत्वन्तरं विद्यते स सत्प्रतिपक्षः । (५०।१)

यथा शब्दो नित्यः श्रावणत्वाच् छब्दत्ववद् इति । (५०।२)

शब्दोऽनित्यः कार्यत्वाद् घटवद् इति ॥ (५०।३)

असिद्धस् त्रिविधः । (५१।१)

आश्रयासिद्धः स्वरूपासिद्धो व्याप्यत्वासिद्धश् चेति । (५१।२)

आश्रयासिद्धो यथा गगनारविन्दं सुरभ्य् अरविन्दत्वात् सरोजारविन्दवत् । (५१।३)

अत्र गगनारविन्दम् आश्रयः । (५१।४)

स च नास्त्य् एव । (५१।५)

स्वरूपासिद्धो यथा शब्दो गुणश् चाक्षुषत्वात् । (५१।६)

अत्र चाक्षुषत्वं शब्दे नास्ति शब्दस्य श्रावणत्वात् । (५१।७)

सोपाधिको व्याप्यत्वासिद्धः । (५१।८)

साध्यव्यापकत्वे सति साधनाव्यापक उपाधिः । (५१।९)

साध्यसमानाधिकरणात्यन्ताभावाप्रतियोगित्वं साध्यव्यापकत्वम् । (५१।१०)

साधनवन्न् इष्टात्यन्ताभावप्रतियोगित्वं साधारणाव्यापकत्वम् । (५१।११)

पर्वतो धूमवान् वह्निमत्त्वाद् इत्य् अत्रार्द्रेन्धनसंयोग उपाधिः । (५१।१२)

तथा हि । (५१।१३)

यत्र धूमस् तत्रार्द्रेन्धनसंयोग इति साध्यव्यापकता । (५१।१४)

यत्र वह्निस् तत्रार्द्रेन्धनसंयोगाभावाद् इति साधनाव्यापकता । (५१।१५)

एवं साध्यव्यापकत्वे सति साधनाव्यापकत्वाद् आर्द्रेन्धनसंयोग उपाधिः । (५१।१६)

सोपाधिकत्वाद् वह्निमत्त्वं व्याप्यत्वासिद्धम् ॥ (५१।१७)

यस्य साध्याभावः प्रमाणान्तरेण निश्चितः स बाधितः । (५२।१)

यथा वह्निर् अनुष्णो द्रव्यत्वाद् इति । (५२।२)

अत्रानुष्णत्वं साध्यं तदभाव उष्णत्वं स्पार्शनप्रत्यक्षेण गृह्यत इति बाधितत्वम् ॥ (५२।३)

उपमितिकरणम् उपमानम् । (५३।१)

संज्ञासंज्ञिसंबन्धज्ञानम् उपमितिः । (५३।२)

तत्करणं सादृश्यज्ञानम् । (५३।३)

अतिदेशवाक्यार्थस्मरणम् अवान्तरव्यापारः । (५३।४)

तथा हि कश्चिद् गवयशब्दार्थम् अजानन् कुतश्चिद् आरण्यकपुरुषाद् गोसदृशो गवय इति श्रुत्वा वनं गतो वाक्यार्थं स्मरन् गोसदृशं पिण्डं पश्यति । (५३।५)

तदनन्तरम् असौ गवयशब्दवाच्य इत्य् उपमितिर् उत्पद्यते ॥ (५३।६)

आप्तवाक्यं शब्दः । (५४।१)

आप्तस् तु यथार्थवक्ता । (५४।२)

वाक्यं पदसमूहः । (५४।३)

यथा गाम् आनयेति । (५४।४)

शक्तं पदम् । (५४।५)

अस्मात् पदाद् अयम् अर्थो बोद्धव्य इतीश्वरसंकेतः शक्तिः ॥ (५४।६)

आकाङ्क्षा योग्यता संनिधिश् च वाक्यार्थज्ञानहेतुः । (५५।१)

पदस्य पदान्तरव्यतिरेकप्रयुक्तान्वयाननुभावकत्वम् आकाङ्क्षा । (५५।२)

अर्थाबाधो योग्यता । (५५।३)

पदानामविलम्बेनोच्चारणं संनिधिः ॥ (५५।४)

आकाङ्क्षादिरहितं वाक्यम् अप्रमाणम् । (५६।१)

यथा गौर् अश्वः पुरुषो हस्तीति न प्रमाणम् आकाङ्क्षाविरहात् । (५६।२)

अग्निना सिञ्चेद् इति न प्रमाणं योग्यताविरहात् । (५६।३)

प्रहरे प्रेहरे ऽसहोच्चारितानि गाम् आनयेत्यादिपदानि न प्रमाणं संनिध्यभावात् ॥ (५६।४)

वाक्यं द्विविधम् । (५७।१)

वैदिकं लौकिकं च । (५७।२)

वैदिकम् ईश्वरोक्तत्वात् सर्वम् एव प्रमाणम् । (५७।३)

लौकिकं त्व् आप्तोक्तं प्रमाणम् । (५७।४)

अन्यद् अप्रमाणम् ॥ (५७।५)

वाक्यार्थज्ञानं शब्दज्ञानम् । (५८।१)

तत्करणं शब्दः ॥ (५८।२)

अयथार्थानुभवस् त्रिविधः संशयविपर्ययतर्कभेदात् । (५९।१)

एकस्मिन् धर्मिनि विरुद्धनानाधर्मवैशिष्ट्यावगाहि ज्ञानं संशयः । (५९।२)

यथा स्थाणुर् वा पुरुषो वेति । (५९।३)

मिथ्याज्ञानं विपर्ययः । (५९।४)

यथा शुक्ताव् इदं रजतम् इति । (५९।५)

व्याप्यारोपेण व्यापकारोपस् तर्कः यथा यदि वह्निर् न स्यात् तर्हि धूमोऽपि न स्याद् इति ॥ (५९।६)

स्मृतिर् अपि द्विविधा । (६०।१)

यथार्थायथार्था च प्रमाजन्या यथार्था । (६०।२)

अप्रमाजन्यायथार्था ॥ (६०।३)

सर्वेषाम् अनुकूलतया वेदनीयं सुखम् ॥ (६१।१)

सर्वेषां प्रतिकूलतया वेदनीयं दुःखम् ॥ (६२।१)

इच्छा कामः ॥ (६३।१)

क्रोधो द्वेषः ॥ (६४।१)

कृतिः प्रयत्नः ॥ (६५।१)

विहितकर्मजन्यो धर्मः ॥ (६६।१)

निषिद्धकर्मजन्यस् त्व् अधर्मः ॥ (६७।१)

बुद्ध्यादयोऽष्टाव् आत्ममात्रविशेषगुणाः ॥ (६८।१)

बुद्धीच्छाप्रयत्ना द्विविधाः । (६९।१)

नित्या अनित्याश् च । (६९।२)

नित्या ईश्वरस्य । (६९।३)

अनित्या जीवस्य ॥ (६९।४)

संस्कारस् त्रिविधः । (७०।१)

वेगो भावना स्थितिस्थापकश् चेति । (७०।२)

वेगः पृथिव्यादिचतुष्टयमनोवृत्तिः । (७०।३)

अनुभवजन्या स्मृतिहेतुर् भावनात्ममात्रवृत्तिः । (७०।४)

अन्यथा कृतस्य पुनस् तदवस्थापादकः स्थितिस्थापकः कटादिपृथिवीवृत्तिः ॥ (७०।५)

चलनात्मकं कर्म । (७१।१)

ऊर्ध्वदेशसंयोगहेतुर् उत्क्षेपणम् । (७१।२)

अधोदेशसंयोगहेतुर् अपक्षेपणम् । (७१।३)

शरीरसंनिकृष्टसंयोगहेतुर् आकुञ्चनम् । (७१।४)

विप्रकृष्टसंयोगहेतुः प्रसारणम् । (७१।५)

अन्यत् सर्वं गमनम् । (७१।६)

पृथिव्यादिचतुष्टयमनोमात्रवृत्ति ॥ (७१।७)

नित्यम् एकम् अनेकानुगतं सामान्यम् । (७२।१)

द्रव्यगुणकर्मवृत्ति । (७२।२)

तद् द्विविधं परापरभेदात् । (७२।३)

परं सत्ता । (७२।४)

अपरं द्रव्यत्वादिः ॥ (७२।५)

नित्यद्रव्यवृत्तयो व्यावर्तका विशेषाः ॥ (७३।१)

नित्यसंबन्धः समवायः । (७४।१)

अयुतसिद्धवृत्तिः । (७४।२)

ययोर् द्वयोर् मध्य एकम् अविनश्यदपराश्रितम् एवावतिष्ठते ताव् अयुतसिद्धौ । (७४।३)

यथावयवावयविनौ गुणगुणिनौ क्रियाक्रियावन्तौ जातिव्यक्ती विशेषनित्यद्रव्ये चेति ॥ (७४।४)

अनादिः सान्तः प्रागभावः । (७५।१)

उत्पत्तेः पूर्वं कार्यस्य । (७५।२)

सादिर् अनन्तः प्रध्वंसः । (७५।३)

उत्पत्त्यनन्तरं कार्यस्य । (७५।४)

त्रैकालिकसंसर्गावच्छिन्नप्रतियोगिताको ऽत्यन्ताभावः । (७५।५)

यथा भूतले घटो नास्तीति । (७५।६)

तादात्म्यसंबन्धावच्छिन्नप्रतियोगिताको ऽन्योन्याभावः यथा घटः पटो न भवतीति ॥ (७५।७)

सर्वेषां पदार्थानां यथायथम् उक्तेष्व् अन्तर्भावात् सप्तैव पदार्था इति सिद्धम् ॥ (७६।१)

काणादन्यायमतयोर् बालाव्युत्पत्तिसिद्धये । (७७।१)

अन्नंभट्टेन विदुषा रचितस् तर्कसंग्रहः ॥ (७७।२)