प्रणिपत्यार्हतः सिद्धसाङ्गशब्दानुशासनः । (१।१)

रूढयौगिकमिश्राणां नाम्नां मालां तनोम्यहम् ॥ (१।२)

व्युत्पत्तिरहिताः शब्दा रूढा आखण्डलादयः । (२।१)

योगो ऽन्वयः स तु गुणक्रियासंबन्धसंभवः ॥ (२।२)

गुणतो नीलकण्ठाद्याः क्रियातः स्रष्टृसंनिभाः । (३।१)

स्वस्वामित्वादिसंबन्धस्तत्राहुर्नाम तद्वताम् ॥ (३।२)

स्वात् पालधनभुग्नेतृपतिमत्वर्थकादयः । (४।१)

भूपालो भूधनो भूभुग्भूनेता भूपतिस्तथा ॥ (४।२)

भूमांश्चेति कविरूढ्या ज्ञेयोदाहरणावली । (५।१)

जन्यात् कृत्कर्तृसृट्स्रष्टृविधातृकरसूसमाः ॥ (५।२)

जनकाद् योनिजरुहजन्मभूसूत्यणादयः । (६।१)

धार्याद्ध्वजास्त्रपाण्यङ्कमौलिभूषणभृन्निभाः ॥ (६।२)

शालिशेखरमत्वर्थमालिभर्तृधरा अपि । (७।१)

भोज्याद् भुगन्धोव्रतलिट्पायिपाशाशनादयः ॥ (७।२)

पत्युः कान्ताप्रियतमावधूप्रणयिनीनिभाः । (८।१)

कलत्राद् वररमणप्रणयीशप्रियादयः ॥ (८।२)

सख्युः सखिसमा वाह्याद्गामियानासनादयः । (९।१)

ज्ञातेः स्वसृदुहित्रात्मजाग्रजावरजादयः ॥ (९।२)

आश्रयात्सद्मपर्यायशयवासिसदादयः । (१०।१)

वध्याद् भिद्द्वेषिजिद्धातिध्रुग्रिपुध्वंसिशासनाः ॥ (१०।२)

प्राक्प्रदर्शितसंबन्धिशब्दा योज्या यथोचितम् । (१२।१)

दृश्यते खलु वाह्यत्वे वृषस्य वृषवाहनः ॥ (१२।२)

एकेन्द्रियाः पृथिव्यम्बुतेजोवायुमहीरुहः । (२१।१)

कृमिपीलकलूताद्याः स्युर्द्वित्रिचतुरिन्द्रियाः ॥ (२१।२)

पञ्चेन्द्रियाश्चेभकेकिमत्स्याद्याः स्थलखाम्बुगाः । (२२।१)

पञ्चेन्द्रिया एव देवा नरा नैरयिका अपि ॥ (२२।२)

नारकाः पञ्चमे साङ्गाः षष्ठे साधारणाः स्फुटम् । (२३।१)

प्रस्तोष्यन्ते ऽव्ययाश्चात्र त्वन्ताथादी न पूर्वगौ ॥ (२३।२)

अर्हञ्जिनः पारगतस् त्रिकालवित् क्षीणाष्टकर्मापरमेष्ठ्यधीश्वरः । (२४।१)

शंभुः स्वयंभूर् भगवाञ्जगत्प्रभुस्तीर्थंकरस्तीर्थकरो जिनेश्वरः ॥ (२४।२)

स्याद्वाद्यभयदसार्वाः सर्वज्ञः सर्वदर्शिकेवलिनौ । (२५।१)

देवाधिदेवबोधदपुरुषोत्तमवीतरागाप्ताः ॥ (२५।२)

एतस्यामवसर्पिण्यामृषभो ऽजितशंभवौ । (२६।१)

अभिनन्दनः सुमतिस्ततः पद्मप्रभाभिधः ॥ (२६।२)

सुपार्श्वश्चन्द्रप्रभश्च सुविधिश्चाथ शीतलः । (२७।१)

श्रेयांसो वासुपूज्यश्च विमलो ऽनन्ततीर्थकृत् ॥ (२७।२)

धर्मः शान्तिः कुंथुररो मल्लिश्च मुनिसुव्रतः । (२८।१)

नमिर्नेमिः पार्श्वो वीरश्चतुर्विंशतिरर्हताम् ॥ (२८।२)

ऋषभो वृषभः श्रेयाञ्श्रेयांसः स्यादनन्तजिदनन्तः । (२९।१)

सुविधिस्तु पुष्पदन्तो मुनिसुव्रतसुव्रतौ तुल्यौ ॥ (२९।२)

अरिष्टनेमिस्तु नेमिर्वीरश्चरमतीर्थकृत् । (३०।१)

महावीरो वर्धमानो देवार्यो ज्ञातनन्दनः ॥ (३०।२)

गणा नवास्यर्षिसंघा एकादश गणाधिपाः । (३१।१)

इन्द्रभूतिरग्निभूतिवायुभूतिश्च गौतमाः ॥ (३१।२)

व्यक्तः सुधर्मा मण्डितमौर्यपुत्रावकम्पितः । (३२।१)

अचलभ्राता मेतार्यः प्रभासश्च पृथक्कुलाः ॥ (३२।२)

केवली चरमो जम्बूस्वाम्यथ प्रभवत्प्रभुः । (३३।१)

शय्यंभवो यशोभद्रः संभूतविजयस्ततः ॥ (३३।२)

भद्रबाहुः स्थूलभद्रः श्रुतकेवलिनो हि षट् । (३४।१)

महागिरिसुहस्त्याद्या वज्रान्ता दशपूर्विणः ॥ (३४।२)

इक्ष्वाकुकुलसम्भूताः स्याद्द्वाविंशतिर् अर्हताम् । (३५।१)

मुनिसुव्रतनेमी तु हरिवंशसमुद्भवौ ॥ (३५।२)

नाभिश्च जितशत्रुश्च जितारिरथ संवरः । (३६।१)

मेघो धरः प्रतिष्ठश्च महासेननरेश्वरः ॥ (३६।२)

सुग्रीवश्च दृढरथो विष्णुश्च वसुपूज्यराट् । (३७।१)

कृतवर्मा सिंहसेनो भानुश्च विश्वसेनराट् ॥ (३७।२)

सूरः सुदर्शनः कुम्भः सुमित्रो विजयस्तथा । (३८।१)

समुद्रविजयश्चाश्वसेनः सिद्धार्थ एव च ॥ (३८।२)

मरुदेवा विजया सेना सिद्धार्था च मङ्गला । (३९।१)

ततः सुसीमा पृथ्वी लक्ष्मणा रामा ततः परम् ॥ (३९।२)

नन्दा विष्णुर्जया श्यामा सुयशाः सुव्रताचिरा । (४०।१)

श्रीर्देवी प्रभावती च पद्मा वप्रा शिवा तथा ॥ (४०।२)

वामा त्रिशला क्रमतः पितरो मातरो ऽर्हताम् । (४१।१)

स्याद्गोमुखो महायक्षस्त्रिमुखो यक्षनायकः ॥ (४१।२)

तुम्बरुः कुसुमश्चापि मातङ्गो विजयो ऽजितः । (४२।१)

ब्रह्मा यक्षेट् कुमारः षण्मुखपातालकिंनराः ॥ (४२।२)

गरुडो गन्धर्वो यक्षेट् कुबेरो वरुणो ऽपि च । (४३।१)

भृकुटिर् गोमेधः पार्श्वो मातङ्गो ऽर्हदुपासकाः ॥ (४३।२)

चक्रेश्वर्यजितबला दुरितारिश्च कालिका । (४४।१)

महाकाली श्यामा शान्ता भृकुटिश्च सुतारका ॥ (४४।२)

अशोका मानवी चण्डा विदिता चाङ्कुशा तथा । (४५।१)

कन्दर्पा निर्वाणी बला धारिणी धरणप्रिया ॥ (४५।२)

नरदत्ताथ गान्धार्यम्बिका पद्मावती तथा । (४६।१)

सिद्धायिका चेति जैन्यः क्रमाच्छासनदेवताः ॥ (४६।२)

वृषो गजो ऽश्वः प्लवगः क्रौञ्चो ऽब्जं स्वस्तिकः शशी । (४७।१)

मकरः श्रीवत्सः खड्गी महिषः सूकरस्तथा ॥ (४७।२)

श्येनो वज्रं मृगश्छागो नन्द्यावर्तो घटो ऽपि च । (४८।१)

कूर्मो नीलोत्पलं शङ्खः फणी सिंहो ऽर्हतां ध्वजाः ॥ (४८।२)

रक्तौ च पद्मप्रभवासुपूज्यौ शुक्लौ तु चन्द्रप्रभपुष्पदन्तौ । (४९।१)

कृष्णौ पुनर्नेमिमुनी विनीलौ श्रीमल्लिपार्श्वौ कनकत्विषो ऽन्ये ॥ (४९।२)

उत्सर्पिण्यामतीतायां चतुर्विंशतिरर्हताम् । (५०।१)

केवलज्ञानी निर्वाणी सागरो ऽथ महायशाः ॥ (५०।२)

विमलः सर्वानुभूतिः श्रीधरो दत्ततीर्थकृत् । (५१।१)

दामोदरः सुतेजाश्च स्वाम्यथो मुनिसुव्रतः ॥ (५१।२)

सुमतिः शिवगतिश्चैवात्यागो ऽथ निमीश्वरः । (५२।१)

अनिलो यशोधराख्यः कृतार्थो ऽथ जिनेश्वरः ॥ (५२।२)

शुद्धमतिः शिवकरः स्यन्दनश्चाथ संप्रतिः । (५३।१)

भाविन्यां तु पद्मनाभः शूरदेवः सुपार्श्वकः ॥ (५३।२)

स्वयंप्रभश्च सर्वानुभूतिर्देवश्रुतोदयौ । (५४।१)

पेढालः पोट्टिलश्चापि शतकीर्तिश्च सुव्रतः ॥ (५४।२)

अममो निष्कषायश्च निष्पुलाको ऽथ निर्ममः । (५५।१)

चित्रगुप्तः समाधिश्च संवरश्च यशोधरः ॥ (५५।२)

विजयो मल्लदेवौ चानन्तवीर्यश्च भद्रकृत् । (५६।१)

एवं सर्वावसर्पिण्युत्सर्पिणीषु जिनोत्तमाः ॥ (५६।२)

तेषां च देहो ऽद्भुतरूपगन्धो निरामयः स्वेदमलोज्झितश्च । (५७।१)

श्वासो ऽब्जगन्धो रुधिरामिषं तु गोक्षीरधाराधवलं ह्यविस्रम् ॥ (५७।२)

आहारनीहारविधिस्त्वदृश्यश्चत्वार एते ऽतिशयाः सहोत्थाः । (५८।१)

क्षेत्रे स्थितिर्योजनमात्रके ऽपि नृदेवतिर्यग्जनकोटिकोटेः ॥ (५८।२)

वाणी नृतिर्यक्सुरलोकभाषासंवादिनी योजनगामिनी च । (५९।१)

भामण्डलं चारु च मौलिपृष्ठे विडम्बिताहर्पतिमण्डलश्रीः ॥ (५९।२)

साग्रे च गव्यूतिशतद्वये रुजावैरेतयो मार्यतिवृष्ट्यवृष्टयः । (६०।१)

दुर्भिक्षमन्यस्वकचक्रतो भयं स्यान्नैत एकादश कर्मघातजाः ॥ (६०।२)

खे धर्मचक्रं चमराः सपादपीठं मृगेन्द्रासनमुज्ज्वलं च । (६१।१)

छत्त्रत्रयं रत्नमयध्वजो ऽङ्घ्रिन्यासे च चामीकरपङ्कजानि ॥ (६१।२)

वप्रत्रयं चारु चतुर्मुखाङ्गताश् चैत्यद्रुमो ऽधोवदनाश्च कण्टकाः । (६२।१)

द्रुमानतिर्दुन्दुभिनाद उच्चकैर्वातो ऽनुकूलः शकुनाः प्रदक्षिणाः ॥ (६२।२)

गन्धाम्बुवर्षं बहुवर्णपुष्पवृष्टिः कचश्मश्रुनखाप्रवृद्धिः । (६३।१)

चतुर्विधा मर्त्यनिकायकोटिजघन्यभावादपि पार्श्वदेशे ॥ (६३।२)

क्रतूनामिन्द्रियार्थानामनुकूलत्वमित्यमी । (६४।१)

एकोनविंशतिदैव्याश्चतुस्त्रिंशच्च मीलिताः ॥ (६४।२)

संस्कारवत्त्वमौदार्यमुपचारपरीतता । (६५।१)

मेघनिर्घोषगाम्भीर्यं प्रतिनादविधायिता ॥ (६५।२)

दक्षिणत्वमुपनीतरागत्वं च महार्थता । (६६।१)

अव्याहतत्वं शिष्टत्वं संशयानामसंभवः ॥ (६६।२)

निराकृतान्योत्तरत्वं हृदयंगमितापि च । (६७।१)

मिथः साकाङ्क्षता प्रस्तावौचित्यं तत्त्वनिष्ठता ॥ (६७।२)

अप्रकीर्णप्रसृतत्वम् अस्वश्लाघान्यनिन्दिता । (६८।१)

आभिजात्यमतिस्निग्धमधुरत्वं प्रशस्यता ॥ (६८।२)

अमर्मवेधितौदार्यं धर्मार्थप्रतिबद्धता । (६९।१)

कारकाद्यविपर्यासो विभ्रमादिवियुक्तता ॥ (६९।२)

चित्रकृत्त्वम् अद्भुतत्वं तथानतिविलम्बिता । (७०।१)

अनेकजातिवैचित्र्यम् आरोपितविशेषिता ॥ (७०।२)

सत्त्वप्रधानता वर्णपदवाक्यविविक्तता । (७१।१)

अव्युच्छित्तिर् अखेदित्वं पञ्चत्रिंशच्च वाग्गुणाः ॥ (७१।२)

अन्तराया दानलाभवीर्यभोगोपभोगगाः । (७२।१)

हासो रत्यरती भीतिर्जुगुप्सा शोक एव च ॥ (७२।२)

कामो मिथ्यात्वमज्ञानं निद्रा चाविरतिस्तथा । (७३।१)

रोगो द्वेषश्च नो दोषास्तेषामष्टादशाप्यमी ॥ (७३।२)

महानन्दो ऽमृतं सिद्धिः कैवल्यमपुनर्भवः । (७४।१)

शिवं निःश्रेयसं श्रेयो निर्वाणं ब्रह्म निर्वृतिः ॥ (७४।२)

महोदयः सर्वदुःखक्षयो निर्याणमक्षरम् । (७५।१)

मुक्तिर्मोक्षो ऽपवर्गो ऽथ मुमुक्षुः श्रमणो यतिः ॥ (७५।२)

वाचंयमो व्रती साधुरनगार ऋषिमुनिः । (७६।१)

निर्ग्रन्थो भिक्षुरस्य स्वं तपोयोगशमादयः ॥ (७६।२)

मोक्षोपायो योगो ज्ञानं श्रद्धानं चरणात्मकः । (७७।१)

अभाषणं पुनर्मौनं गुरुर्धर्मोपदेशकः ॥ (७७।२)

अनुयोगकृदाचार्य उपाध्यायस्तु पाठकः । (७८।१)

अनूचानः प्रवचने साङ्गे ऽधीती गणिश्च सः ॥ (७८।२)

शिष्यो विनेयो ऽन्तेवासी शैक्षः प्राथमकल्पिकः । (७९।१)

सतीर्थ्यास्त्वेकगुरवो विवेकः पृथगात्मता ॥ (७९।२)

एकब्रह्मव्रताचारा मिथः सब्रह्मचारिणः । (८०।१)

स्यात्पारम्पर्यमाम्नायः संप्रदायो गुरुक्रमः ॥ (८०।२)

व्रतादानं परिव्रज्या तपस्या नियमस्थितिः । (८१।१)

अहिंसासूनृतास्तेयब्रह्माकिंचनता यमाः ॥ (८१।२)

नियमाः शौचसंतोषौ स्वाध्यायतपसी अपि । (८२।१)

देवताप्रणिधानं च करणं पुनरासनम् ॥ (८२।२)

प्राणायामः प्राणयमः श्वासप्रश्वासरोधनम् । (८३।१)

प्रत्याहारस्त्विन्द्रियाणां विषयेभ्यः समाहृतिः ॥ (८३।२)

धारणा तु क्वचिद्ध्येये चित्तस्य स्थिरबन्धनम् । (८४।१)

ध्यानं तु विषये तस्मिन् एकप्रत्ययसंततिः ॥ (८४।२)

समाधिस्तु तदेवार्थमात्राभासनरूपकम् । (८५।१)

एवं योगो यमाद्यङ्गैरष्टभिः संमतो ऽष्टधा ॥ (८५।२)

श्वःश्रेयसं शुभशिवे कल्याणं श्वोवसीयसं श्रेयः । (८६।१)

क्षेमं भावुकभविककुशलमङ्गलभद्रमद्रशस्तानि ॥ (८६।२)