अदृश्यरूपाः कालस्य मूर्तयो भगणाश्रिताः । (१।१)

शीघ्रमन्दोच्चपाताख्या ग्रहाणां गतिहेतवः ॥ (१।२)

तद्वातरश्मिभिर् बद्धास् तैः सव्येतरपाणिभिः । (२।१)

प्राक् पश्चाद् अपकृष्यन्ते यथासन्नं स्वदिङ्मुखम् ॥ (२।२)

प्रवहाख्यो मरुत् तांस् तु स्वोच्चाभिमुखम् ईरयेत् । (३।१)

पूर्वापराकृष्टास् ते गतिं यान्ति पृथग्विधाः ॥ (३।२)

ग्रहात् प्राग्भगणार्धस्थः प्राङ्मुखं कर्षति ग्रहम् । (४।१)

उच्चसंज्ञो ऽपरार्धस्थस् तद्वत् पश्चान्मुखं ग्रहम् ॥ (४।२)

स्वोच्चापकृष्टा भगणैः प्राङ्मुखं यान्ति यद् ग्रहाः । (५।१)

तत् तेषु धनम् इत्य् उक्तम् ऋणं पश्चान्मुखेषु च ॥ (५।२)

दक्षिणोत्तरतो ऽप्य् एवं पातो राहुः स्वरंहसा । (६।१)

विक्षिपत्य् एष विक्षेपं चन्द्रादीनाम् अपक्रमात् ॥ (६।२)

उत्तराभिमुखं पातो विक्षिपत्य् अपरार्धगः । (७।१)

ग्रहं प्राग्भगणार्धस्थो याम्यायाम् अपकर्षति ॥ (७।२)

बुधभार्गवयोः शीघ्रात् तद्वत् पातो यदा स्थितः । (८।१)

तच्छीघ्राकर्षणात् तौ तु विक्षिप्येते यथोक्तवत् ॥ (८।२)

महत्त्वान् मण्डलस्यार्कः स्वल्पम् एवापकृष्यते । (९।१)

मण्डलाल्पतया चन्द्रस् ततो बह्व् अपकृष्यते । (९।२)

भौमादयो ऽल्पमूर्तित्वाच् छीघ्रमन्दोच्चसंज्ञकैः । (१०।१)

दैवतैर् अपकृष्यन्ते सुदूरम् अतिवेगिताः ॥ (१०।२)

अतो धनर्णं सुमहत् तेषां गतिवशाद् भवेत् । (११।१)

आकृष्यमाणास् तैर् एवं व्योम्नि यान्त्य् अनिलाहताः ॥ (११।२)

वक्रातिवक्रा विकला मन्दा मन्दतरा समा । (१२।१)

तथा शीघ्रतरा शीघ्रा ग्रहाणाम् अष्टधा गतिः ॥ (१२।२)

तत्रातिशीघ्रा शीघ्राख्या मन्दा मन्दतरा समा । (१३।१)

ऋज्वीति पञ्चधा ज्ञेया या वक्रा सातिवक्रगा ॥ (१३।२)

तत्तद्गतिवशान् नित्यं यथा दृक्तुल्यतां ग्रहाः । (१४।१)

प्रयान्ति तत् प्रवक्ष्यामि स्फुटीकरणम् आदरात् ॥ (१४।२)

राशिलिप्ताष्टमो भागः प्रथमं ज्यार्धम् उच्यते । (१५।१)

तत् तद्विभक्तलब्धोनमिश्रितं तद् द्वितीयकम् ॥ (१५।२)

आद्येनैवं क्रमात् पिण्डान् भक्त्वा लब्धोनसंयुताः । (१६।१)

खण्डकाः स्युश् चतुर्विंशज्यार्धपिण्डाः क्रमाद् अमी ॥ (१६।२)

तत्त्वाश्विनो ऽङ्काब्धिकृता रूपभूमिधरर्तवः । (१७।१)

खाङ्काष्टौ पञ्चशून्येशा बाणरूपगुणेन्दवः ॥ (१७।२)

शून्यलोचनपञ्चैकाश् छिद्ररूपमुनीन्दवः । (१८।१)

वियच्चन्द्रातिधृतयो गुणरन्ध्राम्बराश्विनः ॥ (१८।२)

मुनिषड्यमनेत्राणि चन्द्राग्निकृतदस्रकाः । (१९।१)

पञ्चाष्टविषयाक्षीणि कुञ्जराश्विनगाश्विनः ॥ (१९।२)

रन्ध्रपञ्चाष्टकयमा वस्वद्र्यङ्कयमास् तथा । (२०।१)

कृताष्टशून्यज्वलना नगाद्रिशशिवह्नयः ॥ (२०।२)

षट्पञ्चलोचनगुणाश् चन्द्रनेत्राग्निवह्नयः । (२१।१)

यमाद्रिवह्निज्वलना रन्ध्रशून्यार्णवाग्नयः ॥ (२१।२)

रूपाग्निसागरगुणा वस्वग्निकृतवह्नयः । (२२।१)

प्रोज्झ्योत्क्रमेण व्यासार्धाद् उत्क्रमज्यार्धपिण्डिकाः ॥ (२२।२)

मुनयो रन्ध्रयमला रसषट्का मुनीश्वराः । (२३।१)

द्व्यष्टैका रूपषड्दस्राः सागरार्थहुताशनाः । (२३।२)

खर्तुवेदा नवाद्र्यर्था दिङ्नागास् त्र्यर्थकुञ्जराः । (२४।१)

नगाम्बरवियच्चन्द्रा रूपभूधरशंकराः ॥ (२४।२)

शरार्णवहुताशैका भुजंगाक्षिशरेन्दवः । (२५।१)

नवरूपमहीध्रैका गजैकाङ्कनिशाकराः ॥ (२५।२)

गुणाश्विरूपनेत्राणि पावकाग्निगुणाश्विनः । (२६।१)

वस्वर्णवार्थयमलास् तुरङ्गर्तुनगाश्विनः ॥ (२६।२)

नवाष्टनवनेत्राणि पावकैकयमाग्नयः । (२७।१)

गजाग्निसागरगुणा उत्क्रमज्यार्धपिण्डकाः ॥ (२७।२)

परमापक्रमज्या तु सप्तरन्ध्रगुणेन्दवः । (२८।१)

तद्गुणा ज्या त्रिजीवाप्ता तच्चापं क्रान्तिर् उच्यते ॥ (२८।२)

ग्रहं संशोध्य मन्दोच्चात् तथा शीघ्राद् विशोध्य च । (२९।१)

शेषं केन्द्रपदं तस्माद् भुजज्या कोटिर् एव च ॥ (२९।२)

गताद् भुजज्या विषमे गम्यात् कोटिः पदे भवेत् । (३०।१)

युग्मे तु गम्याद् बाहुज्या कोटिज्या तु गताद् भवेत् ॥ (३०।२)

लिप्तास् तत्त्वयमैर् भक्ता लब्धं ज्यापिण्डिकं गताम् । (३१।१)

गतगम्यान्तराभ्यस्तं विभजेत् तत्त्वलोचनैः ॥ (३१।२)

तदवाप्तफलं योज्यं ज्यापिण्डे गतसंज्ञके । (३२।१)

स्यात् क्रमज्याविधिर् अयम् उत्क्रमज्यास्व् अपि स्मृतः ॥ (३२।२)

ज्यां प्रोज्झ्य शेषं तत्त्वाश्विहतं तद्विवरोद्धृतम् । (३३।१)

संख्यातत्त्वाश्विसंवर्गे संयोज्य धनुर् उच्यते ॥ (३३।२)

रवेर् मन्दपरिध्यंशा मनवः शीतगो रदाः । (३४।१)

युग्मान्ते विषमान्ते तु नखलिप्तोनितास् तयोः ॥ (३४।२)

युग्मान्ते ऽर्थाद्रयः खाग्निसुराः सूर्या नवार्णवाः । (३५।१)

ओजे द्व्यगा वसुयमा रदा रुद्रा गजाब्दयः ॥ (३५।२)

कुजादीनां अतः शीघ्रा युग्मान्ते ऽर्थाग्निदस्रकाः । (३६।१)

गुणाग्निचन्द्राः खनगा द्विरसाक्षीणि गोऽग्नयः ॥ (३६।२)

ओजान्ते द्वित्रियमला द्विविश्वे यमपर्वताः । (३७।१)

खर्तुदस्रा वियद्वेदाः शीघ्रकर्मणि कीर्तिताः ॥ (३७।२)

ओजयुग्मान्तरगुणा भुजज्या त्रिज्ययोद्धृता । (३८।१)

युग्मे वृत्ते धनर्णं स्याद् ओजाद् ऊनाधिके स्फुटम् ॥ (३८।२)

तद्गुणे भुजकोटिज्ये भगणांशविभाजिते । (३९।१)

तद्भुजज्याफलधनुर् मान्दं लिप्तादिकं फलम् ॥ (३९।२)

शैघ्र्यं कोटिफलं केन्द्रे मकरादौ धनं स्मृतम् । (४०।१)

संशोध्यं तु त्रिजीवायां कर्क्यादौ कोटिजं फलम् ॥ (४०।२)

तद्बाहुफलवर्गैक्यान् मूलं कर्णश् चलाभिधः । (४१।१)

त्रिज्याभ्यस्तं भुजफलं चलकर्णविभाजितम् ॥ (४१।२)

लब्धस्य चापं लिप्तादिफलं शैघ्र्यम् इदं स्मृतम् । (४२।१)

एतद् आद्ये कुजादीनां चतुर्थे चैव कर्मणि ॥ (४२।२)

मान्दं कर्मैकम् अर्केन्दोर् भौमादीनाम् अथोच्यते । (४३।१)

शैघ्र्यं मान्दं पुनर् मान्दं शैघ्र्यं चत्वार्य् अनुक्रमात् ॥ (४३।२)

मध्ये शीघ्रफलस्यार्धं मान्दम् अर्धफलं तथा । (४४।१)

मध्यग्रहे मन्दफलं सकलं शैघ्र्यम् एव च ॥ (४४।२)

अजादिकेन्द्रे सर्वेषां शैघ्र्ये मान्दे च कर्मणि । (४५।१)

धनं ग्रहाणां लिप्तादि तुलादावृणम् एव च ॥ (४५।२)

अर्कबाहुफलाभ्यस्ता ग्रहभुक्तिर् विभाजिता । (४६।१)

भचक्रकलिकाभिस् तु लिप्ताः कर्या ग्रहे ऽर्कवत् ॥ (४६।२)

स्वमन्दभुक्तिसंशुद्धा मध्यभुक्तिर् निशापतेः । (४७।१)

दोर्ज्यान्तरादिकं कृत्वा भुक्ताव् ऋणधनं भवेत् ॥ (४७।२)

ग्रहभुक्तेः फलं कार्यं ग्रहवन् मन्दकर्मणि । (४८।१)

दोर्ज्यान्तरगुणा भुक्तिस् तत्त्वनेत्रोद्धृता पुनः ॥ (४८।२)

स्वमन्दपरिधिक्षुण्णा भगणांशोद्धृता कलाः । (४९।१)

कर्क्यादौ तु धनं तत्र मकरादाव् ऋणं स्मृतम् ॥ (४९।२)

मन्दस्फुटीकृतां भुक्तिं प्रोज्झ्य शीघ्रोच्चभुक्तितः । (५०।१)

तच्छेषं विवरेणाथ हन्यात् त्रिज्यान्त्यकर्णयोः ॥ (५०।२)

चलकर्णहृतं भुक्तौ कर्णे त्रिज्याधिके धनम् । (५१।१)

ऋणम् ऊने ऽधिके प्रोज्झ्य शेषं वक्रगतिर् भवेत् ॥ (५१।२)

दूरस्थितः स्वशीघ्रोच्चाद् ग्रहः शिथिलरश्मिभिः । (५२।१)

सव्येतराकृष्टतनुर् भवेत् वक्रगतिस् तदा ॥ (५२।२)

कृतर्तुचन्द्रैर् वेदेन्द्रैः शून्यत्र्येकैर् गुणाष्टभिः । (५३।१)

शररुद्रैश् चतुर्थेषु केन्द्रांशैर् भूसुतादयः ॥ (५३।२)

भवन्ति वक्रिणस् तैस् तु स्वैः स्वैश् चक्राद् विशोधितैः । (५४।१)

अवशिष्टांशतुल्यैः स्वैः केन्द्रैर् उझन्ति वक्रताम् ॥ (५४।२)

महत्त्वाच् छीघ्रपरिधेः सप्तमे भृगुभूसुतौ । (५५।१)

अष्टमे जीवशशैजौ नवमे तु शनैश्चरः ॥ (५५।२)

कुजार्किगुरुपातानां ग्रहवच् छीघ्रजं फलम् । (५६।१)

वामं तृतीयकं मान्दं बुधभार्गवयोः फलम् ॥ (५६।२)

स्वपातोनाद् ग्रहाज् जीवा शीघ्राद् भृगुजसौम्ययोः । (५७।१)

विक्षेपघ्न्य् अन्त्यकर्णाप्ता विक्षेपस् त्रिज्यया विधोः ॥ (५७।२)

विक्षेपापक्रमैकत्वे क्रान्तिर् विक्षेपसंयुता । (५८।१)

दिग्भेदे वियुता स्पष्टा भास्करस्य यथागता ॥ (५८।२)

ग्रहोदयप्राणहता खखाष्टैकोद्धृता गतिः । (५९।१)

चक्रासवो लब्धयुता स्वाहोरात्रासवः स्मृताः ॥ (५९।२)

क्रान्तेः क्रमोत्क्रम्मज्ये द्वे कृत्वा तत्रोत्क्रमज्यया । (६०।१)

हीना त्रिज्या दिनव्यासदलं तद्दक्षिणोत्तरम् ॥ (६०।२)

क्रान्तिज्या विषुवद्भाघ्नी क्षितिज्या द्वादशोद्धृता । (६१।१)

त्रिज्यागुणाहोरात्रार्धकर्णाप्ता चरजासवः ॥ (६१।२)

तत्कार्मुकम् उदक्क्रान्तौ धनशनी पृथक्स्थिते । (६२।१)

स्वाहोरात्रचतुर्भागे दिनरात्रिदले स्मृते ॥ (६२।२)

याम्यक्रान्तौ विपर्यस्ते द्विगुणे तु दिनक्षपे । (६३।१)

विक्षेपयुक्तोनितया क्रान्त्या भानाम् अपि स्वके ॥ (६३।२)

भभोगो ऽष्टशतीलिप्ताः खाश्विशैलास् तथा तिथेः । (६४।१)

ग्रहलिप्ताभभोगाप्ता भानि भुक्त्या दिनादिकम् ॥ (६४।२)

रवीन्दुयोगलिप्ताभ्यो योगा भभोगभाजिताः । (६५।१)

गता गम्याश् च षष्टिघ्न्यो भुक्तियोगाप्तनाडिकाः ॥ (६५।२)

अर्कोनचन्द्रलिप्ताभ्यस् तिथयो भोगभाजिताः । (६६।१)

गता गम्याश् च षष्टिघ्न्यो नाड्यो भुक्त्यन्तरोद्धृताः ॥ (६६।२)

ध्रुवाणि शकुनिर् नागं तृतीयं तु चतुष्पदम् । (६७।१)

किंस्तुघ्नं तु चतुर्दश्याः कृष्णायाश् चापरार्धतः ॥ (६७।२)

बवादीनि ततः सप्त चराख्यकरणानि च । (६८।१)

मासे ऽष्टकृत्व एकैकं करणानां प्रवर्तते ॥ (६८।२)

तिथ्यर्धभोगं सर्वेषां करणानां प्रकल्पयेत् । (६९।१)

एषा स्फुटगतिः प्रोक्ता सूर्यादीनां खचारिणाम् ॥ (६९।२)