चतुर्ष्वर्थेषु पञ्चानामाधिपत्यं द्वयोः किल । (१।१)

चतुर्णां पञ्चकाष्टानां संक्लेशव्यवदानयोः ॥ (१।२)

स्वार्थोपलब्ध्याधिपत्यात् सर्वस्य च षडिन्द्रियम् । (२।१)

स्त्रीत्वपुंस्त्वाधिपत्यात्तु कायात् स्त्रीपुरुषेन्द्रिये ॥ (२।२)

निकायस्थितिसंक्लेशव्यवदानाधिपत्यतः । (३।१)

जीवितं वेदनाः पञ्च श्रद्धाद्याश्चेन्द्रियं मताः ॥ (३।२)

आज्ञास्याम्याख्यम् आज्ञाख्यम् आज्ञातावीन्द्रियं तथा । (४।१)

उत्तरोत्तरसंप्राप्तिनिर्वाणाद्याधिपत्यतः ॥ (४।२)

चित्ताश्रयस्तद्विकल्पः स्थितिः संक्लेश एव च । (५।१)

संभारो व्यवदानं च यावता तावदिन्द्रियम् ॥ (५।२)

प्रवृत्तेराश्रयोत्पत्तिस्थितिप्रत्युपभोगतः । (६।१)

चतुर्दश तथान्यानि निवृत्तेरिन्द्रियाणि वा ॥ (६।२)

दुःखेन्द्रियम् अशाता या कायिकी वेदना सुखम् । (७।१)

शाता ध्याने तृतीये तु चैतसी सा सुखेन्द्रियम् ॥ (७।२)

अन्यत्र सा सौमनस्यं अशाता चैतसी पुनः । (८।१)

दौर्मनस्यमुपेक्षा तु मध्या उभयी अविकल्पनात् ॥ (८।२)

दृग्भावनाशैक्षपथे नव त्रीणि अमलं त्रयम् । (९।१)

रूपीणि जीवितं दुःखे सास्रवाणि द्विधा नव ॥ (९।२)

विपाको जीवितं द्वेधा द्वादश अन्त्याष्टकादृते । (१०।१)

दौर्मनस्याच्च तत्त्वेकं सविपाकं दश द्विधा ॥ (१०।२)

मनोऽन्यवित्तिश्रद्धादीनि अष्टकं कुशलं द्विधा । (११।१)

दौर्मनस्यं मनोऽन्या च वित्तिस्त्रेधा अन्यदेकधा ॥ (११।२)

कामाप्तममलं हित्वा रूपाप्तं स्त्रीपुमिन्द्रिये । (१२।१)

दुःखे च हित्वा आरूप्याप्तं सुखे चापोह्य रूपि च ॥ (१२।२)

मनोवित्तित्रयं त्रेधा द्विहेया दुर्मनस्कता । (१३।१)

नव भावनया पञ्च त्वहेयान्यपि न त्रयम् ॥ (१३।२)

कामेष्वादौ विपाको द्वे लभ्यते नोपपादुकैः । (१४।१)

तैः षड् वा सप्त वा अष्टौ वा षड् रूपेषु एकमुत्तरे ॥ (१४।२)

निरोधयत्युपरमान्नारूप्ये जीवितं मनः । (१५।१)

उपेक्षां चैव रूपेऽष्टौ कामे दश नवाष्टौ वा ॥ (१५।२)

क्रममृत्यौ तु चत्वारि शुभे सर्वत्र पञ्च च । (१६।१)

नवाप्तिरन्त्यफलयोः सप्ताष्टनवभिर्द्वयोः ॥ (१६।२)

एकादशभिरर्हत्त्वमुक्तं त्वेकस्य संभवात् । (१७।१)

उपेक्षाजीवितमनोयुक्तो ऽवश्यं त्रयान्वितः ॥ (१७।२)

चतुर्भिः सुखकायाभ्यां पञ्चभिश्चक्षुरादिमान् । (१८।१)

सौमनस्यी च दुःखी तु सप्तभिः स्त्रीन्द्रियादिमान् ॥ (१८।२)

अष्टाभिः एकादशभिस् त्व् आज्ञाज्ञातेन्द्रियान्वितः । (१९।१)

आज्ञास्यामीन्द्रियोपेतस् त्रयोदशभिर् अन्वितः ॥ (१९।२)

सर्वाल्पैर् निःशुभो ऽष्टाभिर् विन्मनःकायजीवितैः । (२०।१)

युक्तः बालस्तथारूप्ये उपेक्षायुर्मनःशुभैः ॥ (२०।२)

बहुभिर्युक्त एकान्नविंशत्यामलवर्जितैः । (२१।१)

द्विलिङ्गः आर्यो रागी एकलिङ्गद्वयमलवर्जितैः ॥ (२१।२)

कामेऽष्टद्रव्यकोऽशब्दः परमाणुरनिन्द्रियः । (२२।१)

कायेन्द्रियी नवद्रव्यः दशद्रव्योऽपरेन्द्रियः ॥ (२२।२)

चित्तं चैत्ताः सहावश्यं सर्वं संस्कृतलक्षणैः । (२३।१)

प्राप्त्या वा पञ्चधा चैत्ता महाभूम्यादिभेदतः ॥ (२३।२)

वेदना चेतना संज्ञा छन्दः स्पर्शो मतिः स्मृतिः । (२४।१)

मनस्कारो ऽधिमोक्षश्च समाधिः सर्वचेतसि ॥ (२४।२)

श्रद्धाप्रमादः प्रश्रब्धिरुपेक्षा ह्रीर् अपत्रपा । (२५।१)

मूलद्वयमहिंसा च वीर्यं च कुशले सदा ॥ (२५।२)