स्वभूम्युपरमो मार्गः षड्भूमिनवभूमिकः । (१५।१)

तद्गोचराणां विषयो मार्गो ह्यन्योऽन्यहेतुकः ॥ (१५।२)

न रागस्तस्य वर्ज्यत्वात् न द्वेषोऽनपकारतः । (१६।१)

न मानो न परामर्शौ शान्तशुद्ध्यग्रभावतः ॥ (१६।२)

सर्वत्रगा अनुशयाः सकलामनुशेरते । (१७।१)

स्वभूमिमालम्बनतः स्वनिकायमसर्वगाः ॥ (१७।२)

नानास्रवोर्ध्वविषयाः अस्वीकाराद्विपक्षतः । (१८।१)

येन यः सम्प्रयुक्तस्तु स तस्मिन् संप्रयोगतः ॥ (१८।२)

ऊर्ध्वमव्याकृताः सर्वे कामे सत्कायदर्शनम् । (१९।१)

अन्तग्राहः सहाभ्यां च मोहः शेषास्त्विहाशुभाः ॥ (१९।२)

कामेऽकुशलमूलानि रागप्रतिघमूढयः । (२०।१)

त्रीण्यकुशलमूलानि तृष्णाविद्या मतिश्च सा ॥ (२०।२)

द्विधोर्ध्ववृत्तेर्नातो ऽन्यौ चत्वार्येवेति बाह्यकाः । (२१।१)

तृष्णादृङ्मानमोहास्ते ध्यायित्रित्वादविद्यया ॥ (२१।२)

एकांशतो व्याकरणं विभज्य परिपृच्छ्य च । (२२।१)

स्थाप्यं च मरणोत्पत्तिविशिष्टात्मान्यतादिवत् ॥ (२२।२)

रागप्रतिघमानैः स्याद् अतीतप्रत्युपस्थितैः । (२३।१)

यत्रोत्पन्नाप्रहीणास्ते तस्मिन् वस्तुनि संयुतः ॥ (२३।२)

सर्वत्रानागतैरेभिर्मानसैः स्वाध्विके परैः । (२४।१)

अजैः सर्वत्र शेषैस्तु सर्वैः सर्वत्र संयुतः ॥ (२४।२)

सर्वकालास्तिता उक्तत्वात् द्वयात् सद्विषयात् फलात् । (२५।१)

तदस्तिवादात् सर्वास्तिवादा इष्टाः चतुर्विधाः ॥ (२५।२)

यथोक्ता एव साविद्या द्विधा दृष्टिविवेचनात् । (३८।१)

उपादानानि अविद्या तु ग्राहिका नेति मिश्रिता ॥ (३८।२)