तदाक्रम्य बलं मन्त्राः सर्वज्ञबलशालिनः । (१।१)

प्रवर्तन्तेऽधिकाराय करणानीव देहिनाम् ॥ (१।२)

तत्रैव सम्प्रलीयन्ते शान्तरूपा निरञ्जनाः । (२।१)

सहाराधकचित्तेन तेनैते शिवधर्मिणः ॥ (२।२)

यस्मात्सर्वमयो जीवः सर्वभावसमुद्भवात् । (३।१)

तत्संवेदनरूपेण तादात्म्यप्रतिपत्तितः ॥ (३।२)

तस्माच्छब्दार्थचिन्तासु न सावस्था न या शिवः । (४।१)

भोक्तैव भोग्यभावेन सदा सर्वत्र संस्थितः ॥ (४।२)

इति वा यस्य संवित्तिः क्रीडात्वेनाखिलं जगत् । (५।१)

स पश्यन्सततं युक्तो जीवन्मुक्तो न संशयः ॥ (५।२)

अयमेवोदयस्तस्य ध्येयस्य ध्यायिचेतसि । (६।१)

तदात्मतासमापत्तिर् इच्छतः साधकस्य या ॥ (६।२)

यमेवामृतप्राप्तिर् अयम् एवात्मनो ग्रहः । (७।१)

इयं निर्वाणदीक्षा च शिवसद्भावदायिनी ॥ (७।२)