यथेच्छाभ्यर्थितो धाता जाग्रतो ऽर्थान् हृदि स्थितान् । (१।१)

सोमसूर्योदयं कृत्वा सम्पादयति देहिनः ॥ (१।२)

तथा स्वप्ने ऽप्यभीष्टार्थान् प्रणयस्यानतिक्रमात् । (२।१)

नित्यं स्फुटतरं मध्ये स्थितोऽवश्यं प्रकाशयेत् ॥ (२।२)

अन्यथा तु स्वतन्त्रा स्यात् सृष्टिस् तद्धर्मकत्वतः । (३।१)

सततं लौकिकस्येव जाग्रत्स्वप्नपदद्वये ॥ (३।२)

यथा ह्य् अर्थो ऽस्फुटो दृष्टः सावधानेऽपि चेतसि । (४।१)

भूयः स्फुटतरो भाति स्वबलोद्योगभावितः ॥ (४।२)

तथा यत्परमार्थेन येन यत्र यथा स्थितम् । (५।१)

तत्तथा बलमाक्रम्य न चिरात् सम्प्रवर्तते ॥ (५।२)

दुर्बलोऽपि तदाक्रम्य यतः कार्ये प्रवर्तते । (६।१)

आच्छादयेद्बुभुक्षां च तथा यो ऽतिबुभुक्षितः ॥ (६।२)

अनेनाधिष्ठिते देहे यथा सर्वज्ञतादयः । (७।१)

तथा स्वात्मन्यधिष्ठानात् सर्वत्रैवं भविष्यति ॥ (७।२)

ग्लानिर् विलुण्ठिका देहे तस्याश्चाज्ञानतः सृतिः । (८।१)

तदुन्मेषविलुप्तं चेत् कुतः सा स्यादहेतुका ॥ (८।२)

एकचिन्ताप्रसक्तस्य यतः स्याद् अपरोदयः । (९।१)

उन्मेषः स तु विज्ञेयः स्वयं तमुपलक्षयेत् ॥ (९।२)

अतो बिन्दुर् अतो नादो रूपम् अस्माद् अतो रसः । (१०।१)

प्रवर्तन्ते ऽचिरेणैव क्षोभकत्वेन देहिनः ॥ (१०।२)

दिदृक्षयेव सर्वार्थान् यदा व्याप्यावतिष्ठते । (११।१)

तदा किं बहुनोक्तेन स्वयम् एवावभोत्स्यते ॥ (११।२)

प्रबुद्धः सर्वदा तिष्ठेज्ज्ञानेनालोक्य गोचरम् । (१२।१)

एकत्रारोपयेत्सर्वं ततो ऽन्येन न पीड्यते ॥ (१२।२)

शब्दराशिसमुत्थस्य शक्तिवर्गस्य भोग्यताम् । (१३।१)

कलाविलुप्तविभवो गतः सन्स पशुः स्मृतः ॥ (१३।२)

परामृतरसापायस् तस्य यः प्रत्ययोद्भवः । (१४।१)

तेनास्वतन्त्रतामेति स च तन्मात्रगोचरः ॥ (१४।२)

स्वरूपावरणे चास्य शक्तयः सततोत्थिताः । (१५।१)

यतः शब्दानुवेधेन न विना प्रत्ययोद्भवः ॥ (१५।२)

सेयं क्रियात्मिका शक्तिः शिवस्य पशुवर्तिनी । (१६।१)

बन्धयित्री स्वमार्गस्था ज्ञाता सिद्ध्युपपादिका ॥ (१६।२)

तन्मात्रोदयरूपेण मनोऽहम्बुद्धिवर्तिना । (१७।१)

पुर्यष्टकेन संरुद्धस् तदुत्थं प्रत्ययोद्भवम् ॥ (१७।२)

भुङ्क्ते परवशो भोगं तद्भावात्संसरेदतः । (१८।१)

संसृतिप्रलयस्यास्य कारणं सम्प्रचक्ष्महे ॥ (१८।२)

यदा त्व् एकत्र संरूढस् तदा तस्य लयोदयौ । (१९।१)

नियच्छन् भोक्तृताम् एति ततश् चक्रेश्वरो भवेत् ॥ (१९।२)