शतपुष्पाशतपुष्पा मिशिर्घोषा पीतिका माधवी शिफा । (१।१)

अतिच्छत्रा त्ववाक्पुष्पी शताह्वा कारवी स्मृता ॥ (१।२)

शताह्वा कटुका तिक्ता स्निग्धोष्णा श्लेष्मवातजित् । (२।१)

ज्वरनेत्रव्रणान् हन्ति बस्तिकर्मणि शस्यते ॥ (२।२)

शतपुष्पादलं चोक्तं वृष्यं रुधिरगुल्मजित् । (३।१)

वातघ्नं दीपनं स्तन्यं पित्तकृत् रुचिदायकम् ॥ (३।२)

मिश्रेयामिश्रेया तालपर्णी तु तालपत्री मिशिस्तथा । (४।१)

शालेयः स च शालीनो नाम्ना शीतशिवो मतः ॥ (४।२)

तिक्ता स्वादुहिमा वृष्या दुर्नामक्षयजिन्मिशिः । (५।१)

क्षतक्षीणहिता बल्या वातपित्तास्रदोषजित् ॥ (५।२)

वचावचोग्रगन्धा गोलोमी जटिलोग्रा च लोमशा । (६।१)

अन्या श्वेतवचा मेध्या षड्ग्रन्था हैमवत्यपि ॥ (६।२)

वामनी कटुतिक्तोष्णा वातश्लेष्मरुजापहा । (७।१)

कण्ठ्या मेध्या च कृमिहृद्विबन्धाध्मानशूलनुत् ॥ (७।२)

वचाद्वयं तु कटुकं रूक्षोष्णं मलमूत्रलम् । (८।१)

दीपनं कफवातघ्नं मेध्यायुष्यं च पाचनम् ॥ (८।२)

जन्तुघ्नं चोग्रगन्धं च स्याल्लघु कण्ठास्यरोगजित् । (९।१)

हपुषाहपुषा विपुषा विस्रा विस्रगन्धातिगन्धिका । (९।२)

अपरा चाश्वत्थफला कच्छूघ्नी ध्वाङ्क्षनाशिनी ॥ (९।३)

हपुषा कटुतिक्तोष्णा गुरुर्वातबलासजित् । (१०।१)

अर्शांसि गुल्मशूलानि हन्ति जन्तूदरैः सह ॥ (१०।२)

विडङ्गविडङ्गा जन्तुहन्त्री च कृमिघ्नी चित्रतण्डुला । (११।१)

तण्डुली कृमिहामोघा कैरली मृगगामिनी ॥ (११।२)

रूक्षोष्णं कटुकं पाके लघु वातकफापहम् । (१२।१)

ईषत्तिक्तं विषान् हन्ति विडङ्गं कृमिनाशनम् ॥ (१२।२)

कुटजकुटजः कौटजः कौटो वत्सको गिरिमल्लिका । (१३।१)

कलिङ्गो मल्लिकापुष्प इन्द्रवृक्षोऽथ वृक्षकः ॥ (१३।२)

कुटजः कटुकस्तिक्तः कषायो रूक्षशीतलः । (१४।१)

कुष्ठातीसारपित्तास्रगुदजानि विनाशयेत् ॥ (१४।२)

फलानि तस्येन्द्रयवाः शक्राह्वाः स्युः कलिङ्गकाः । (१५।१)

तथा वत्सकबीजानि प्रोक्ता भद्रयवास्तथा ॥ (१५।२)

शक्राह्वाः कटुतिक्तोष्णास् त्रिदोषघ्नाश्च दीपनाः । (१६।१)

रक्तार्शांस्यतिसारं च घ्नन्ति शूलवमीस्तथा ॥ (१६।२)

यवक्षारयवक्षारः स्मृतः पाक्यो यवजो यवशूकजः । (१७।१)

यवाह्वः शूकजो यव्यो यावशूको यवाग्रजः ॥ (१७।२)

यवक्षारः कटूष्णश्च कफवातोदरार्तिजित् । (१८।१)

आमशूलाश्मरीकृच्छ्रविषदोषहरः सरः ॥ (१८।२)

उष्णो विरूक्षणस्तीक्ष्णो दीपनः कफवातजित् । (१९।१)

पित्तास्रदूषणो हृद्यो यवजः क्षार उच्यते ॥ (१९।२)

स्वर्जिक्षारक्षारोऽन्यः स्वर्जिकाक्षारः स्वर्जिकाथ सुवर्चिका । (२०।१)

सुवर्चिकः सुवर्चोऽथ सुखवर्चः स एव च ॥ (२०।२)

स्वर्जिकोष्णा कटुः क्षाररसा वातकफौ जयेत् । (२१।१)

गुल्माध्मानकृमीन् हन्ति मेदोजठरनाशिनी ॥ (२१।२)

टङ्कणटङ्कणष्टङ्कणक्षारो मालतीरससम्भवः । (२२।१)

द्रावी द्रावणकश्चैव लोहानां शुद्धिकारकः ॥ (२२।२)

कथितष्टङ्कणक्षारः कटूष्णः कफनाशनः । (२३।१)

स्थावरादिविषघ्नश् च कासश्वासापहारकः ॥ (२३।२)

विरूक्षणोऽनिलहरः श्लेष्महा पित्तदूषणः । (२४।१)

अग्निदीप्तिकरस्तीक्ष्णष्टङ्कणक्षार उच्यते ॥ (२४।२)

सैन्धवसैन्धवं सिन्धु सिन्धूत्थं नादेयं सिन्धुजं शिवम् । (२५।१)

शुद्धं शीतशिवं चान्यन्मणिमन्थं शिलात्मकम् ॥ (२५।२)

सैन्धवं शिशिरं स्निग्धं लघु स्वादु त्रिदोषजित् । (२६।१)

हृद्यं हृन्नेत्ररोगघ्नं व्रणरोचकनाशनम् ॥ (२६।२)

सैन्धवं स्वादु चक्षुष्यं वृष्यं रोचनदीपनम् । (२७।१)

अविदाहि विबन्धघ्नं सुखदं स्यात्त्रिदोषजित् ॥ (२७।२)

विड्लवणविडं कृत्रिमकं धूर्तं क्षारं द्राविडमासुरम् । (२८।१)

सुपाक्यं खण्डलवणं कृतकं चेति नामतः ॥ (२८।२)

सक्षारं दीपनं शूलहृद्रोगकफनाशनम् । (२९।१)

रोचनं तीक्ष्णमुष्णं च विडं वातानुलोमनम् ॥ (२९।२)

सौवर्चलअक्षं सौवर्चलं प्रोक्तं रुचकं हृद्यगन्धकम् । (३०।१)

तिलकं कृष्णलवणं तत्काललवणं स्मृतम् ॥ (३०।२)

लघु सौवर्चलं पाके वीर्योष्णं विशदं कटु । (३१।१)

गुल्मशूलविबन्धघ्नं हृद्यं सुरभि रोचनम् ॥ (३१।२)

औद्भिदऔद्भिदं पांशुलवणरोमकं वसुकं वसु । (३२।१)

ऊषरं पांसवक्षारमौर्वं सार्वगुणं तथा ॥ (३२।२)

लघु तीक्ष्णोष्णमुत्क्लेदि सूक्ष्मं वातानुलोमनम् । (३३।१)

सतिक्तं कटुकं क्षारं विद्यात् लवणमौद्भिदम् ॥ (३३।२)

सेअ सल्त्सामुद्रलवणं प्राहुः क्षारं च शिशिरं तथा । (३४।१)

समुद्रजं सागरजं लवणोदधिसम्भवम् ॥ (३४।२)

सामुद्रलवणं पाके नात्युष्णमविदाहि च । (३५।१)

भेदनं स्निग्धमीषच्च शूलघ्नं नातिपित्तलम् ॥ (३५।२)

हिङ्गुहिङ्गु रामठमत्युग्रं जन्तुघ्नं भूतनाशनम् । (३६।१)

अगूढगन्धं बाह्लीकं जरणं सूपधूपनम् ॥ (३६।२)

हिङ्गूष्णं कटुकं हृद्यं सरं वातकफौ कृमीन् । (३७।१)

हन्ति गुल्मोदराध्मानबन्धशूलहृदामयान् ॥ (३७।२)

हिङ्गुपत्त्रीहिङ्गुपत्त्री तु कवरी पृथ्वीका पृथुला पृथुः । (३८।१)

बाष्पिका दीर्घिका तन्वी बिल्विका दारुपत्त्रिका ॥ (३८।२)

बाष्पिका कटुतीक्ष्णोष्णा हृद्या वातकफापहा । (३९।१)

कृमिप्लीहविबन्धार्शोगुल्महृद्वस्तिशूलनुत् ॥ (३९।२)

नाडीहिङ्गुनाडीहिङ्गु पलाशाख्या जन्तुका रामठी च सा । (४०।१)

वंशपत्त्री वेणुपत्त्री पिण्डा हिङ्गुशिवाटिका ॥ (४०।२)

नाडीहिङ्गु कटूष्णं च कफवातातिशान्तिकृत् । (४१।१)

विष्टम्भनविबन्धामदोषघ्नं दीपनं परम् ॥ (४१।२)

तुम्बुरुतुम्बुरुः सौरभः सौरो वनजः सानुजो द्विजः । (४२।१)

तीक्ष्णवल्कस्तीक्ष्णफलस्तीक्ष्णपत्त्रो महामुनिः ॥ (४२।२)

तुम्बुरुः कटुतीक्ष्णोष्णः कफमारुतशूलजित् । (४३।१)

अपतन्त्रोदराध्मानकृमिघ्नो वह्निदीपनः ॥ (४३।२)

सूक्ष्मैला द्राविडी तुत्था कोरङ्गी बहुला त्रुटिः । (४४।१)

एला कपोतवर्णा च चन्द्रबाला च निष्कुटी ॥ (४४।२)