चत्वारः पाकयज्ञा हुतो ऽहुतः प्रहुतः प्राशित इति ॥ (१।१)

पञ्चसु बहिः शालायां विवाहे चूडाकरण उपनयने केशान्ते सीमन्तोन्नयन इति ॥ (२।१)

उपलिप्त उद्धतावोक्षिते ऽग्निम् उपसमाधाय ॥ (३।१)

निर्मन्थ्यम् एके विवाहे ॥ (४।१)

उदगयन आपूर्यमाणपक्षे पुण्याहे कुमार्याः पाणिं गृह्णीयात् ॥ (५।१)

त्रिषु त्रिषूत्तरादिषु ॥ (६।१)

स्वातौ मृगशिरसि रोहिण्यां वा ॥ (७।१)

तिस्रो ब्राह्मणस्य वर्णानुपूर्व्येण ॥ (८।१)

द्वे राजन्यस्य ॥ (९।१)

एका वैश्यस्य ॥ (१०।१)

सर्वेषां शूद्राम् अप्य् एके मन्त्रवर्जम् ॥ (११।१)

अथैनां वासः परिधापयति जरां गच्छ परिधत्स्व वासो भवाकृष्टीनाम् अभिशस्तिपावा । (१२।१)

शतं च जीव शरदः सुवर्च्चा रयिं च पुत्रान् अनुसंव्ययस्वायुष्मतीदं परिधत्स्व वास इति ॥ (१२।२)

अथोत्तरीयम् । (१३।१)

या अकृन्तन्न् अवयंय् या अतन्वत । (१३।२)

याश् च देवीस् तन्तून् अभितो ततन्थ । (१३।३)

तास् त्वा देवीर् जरसे संव्ययस्वायुष्मतीदं परिधत्स्व वास इति ॥ (१३।४)

अथैनौ समञ्जयति । (१४।१)

समञ्जन्तु विश्वेदेवाः सम् आपो हृदयानि नौ । (१४।२)

सं मातरिश्वा संधाता सम् उ देष्ट्री दधातु नाव् इति ॥ (१४।३)

पित्रा प्रत्ताम् आदाय गृहीत्वा निष्कामति । (१५।१)

यद् ऐषि मनसा दूरं दिशो ऽनु पवमानो वा । (१५।२)

हिरण्यपर्णो वैकर्णः स त्वा मन्मनसां करोत्व् इत्य् असाव् इति ॥ (१५।३)

अथैनौ समीक्षयति । (१६।१)

अघोरचक्षुर् अपतिघ्न्य् एधि शिवा पशुभ्यः सुमनाः सुवर्च्चाः । (१६।२)

वीरसूर् देवकामा स्योना शन् नो भव द्विपदे शं चतुष्पदे । (१६।३)

सोमः प्रथमो विविदे गन्धर्वो विविद उत्तरः । (१६।४)

तृतीयो ऽग्निष्टे पतिस् तुरीयस् ते मनुष्यजाः सोमो ऽददद् गन्धर्वाय गन्धर्वो ऽददद् अग्नये । (१६।५)

रयिं च पुत्रांश् चादाद् अग्निर् मह्यम् अथो इमाम् । (१६।६)

सा नः पूषा शिवतमाम् ऐरय सा न ऊरू उशती विहर । (१६।७)

यस्याम् उशन्तः प्रहराम शेपं यस्याम् उ कामा बहवो निविष्ट्या इति ॥ (१६।८)