स्नातं कृतमङ्गलं वरम् अविधवाः सुभगा युवत्यः कुमार्यै वेश्म प्रपादयन्ति ॥ (१।१)

तासाम् अप्रतिकूलः स्याद् अन्यत्राभक्ष्यपातकेभ्यः ॥ (२।१)

ताभिर् अनुज्ञातो ऽथास्यै वासः प्रयच्छति रैभ्य् आसीद् इति ॥ (३।१)

चित्तिर् आ उपबर्हणम् इत्याञ्जनकोशम् आदत्ते ॥ (४।१)

समञ्जन्तु विश्वे देवा इति समञ्जनीया ॥ (५।१)

यथेयं शचीं वावातां सुपुत्रां च यथादितिम् । (६।१)

अविधवां चापालाम् एवं त्वाम् इह रक्षताद् इमं इति । (६।२)

दक्षिणे पाणौ शललीं त्रिवृतं ददाति ॥ (६।३)

रूपं रूपम् इत्यादर्शं सव्ये ॥ (७।१)

रक्तकृष्णम् आविकं क्षौमं वा त्रिमणिं प्रतिसरं । (८।१)

ज्ञातयो ऽस्या बध्नन्ति नीललोहितम् इति ॥ (८।२)

मधुमतीर् ओषधीर् इति मधूकानि बध्नाति ॥ (९।१)

विवाहे गाम् अर्हयित्वा गृहेषु गां ते माधुपर्किक्यौ ॥ (१०।१)

पश्चाद् अग्नेः कन्याम् उपवेश्यान्वारब्धायां महाव्याहृतिभिस् तिस्रो जुहोति ॥ (११।१)

समस्ताभिश्चतुर्थीं प्रतीयेतैतस्यां चोदनायाम् ॥ (१२।१)

एवम् अनादेशे सर्वेषु भूतिकर्मसु पुरस्ताच्चोपरिष्टाच् चैताभिर् एव जुहुयात् ॥ (१३।१)