अथ प्रतिश्रुते होमःप्रतिश्रुते जुहोति ॥ (१।१)

चतुरश्रं गोमयेन स्थण्डिलम् उपलिप्य ॥ (२।१)

पूर्वयोर्विदिशोर् दक्षिणां प्राचीं पित्र्ये ॥ (३।१)

उत्तरां दैवे ॥ (४।१)

प्राचीम् एवैके ॥ (५।१)

उदक्संस्थां मध्ये लेखां लिखित्वा ॥ (६।१)

तस्यै दक्षिणत उपरिष्टाद् ऊर्ध्वाम् एकां मध्य एकाम् उत्तरत एकां ॥ (७।१)

ता अभ्युक्ष्य ॥ (८।१)

अग्निं प्रणयामि मनसा शिवेनायम् अस्तु संगमनो वसूनाम् । (९।१)

मा नो हिंसीः स्थविरं मा कुमारं शं नो भव द्विपदे शं चतुष्पदे । (९।२)

इत्यग्निं प्रणीय ॥ (९।३)

तूष्णीं वा ॥ (१०।१)

प्रदक्षिणम् अग्नेः समन्तात् पाणिना सोदकेन त्रिः प्रमार्ष्टि तत् समूहनम् इत्य् आचक्षते ॥ (११।१)

सकृद् अपसव्यं पित्र्ये ॥ (१२।१)