अथ परिस्तरणम् ॥ (१।०)

प्रागग्रैः कुशैः परिस्तृणाति त्रिवृत् पञ्चवृद् वा ॥ (२।०)

पुरस्तात् प्रथमम् अथ पश्चाद् अथ पश्चात् ॥ (३।१)

मूलान्यग्रैः प्रच्छादयति ॥ (४।१)

सर्वाश् चावृतो दक्षिणतःप्रवृत्तय उदक्संस्था भवन्ति ॥ (५।१)

दक्षिणतो ब्रह्माणं प्रतिष्ठाप्य भूर् भुवः स्वर् इति ॥ (६।१)

सुमनोभिर् अलंकृत्य ॥ (७।१)

उत्तरतः प्रणीताः प्रणीय को वः प्रणयतीति ॥ (८।१)

सव्येन कुशान् आदाय दक्षिणेनापनौति ॥ (९।१)

दक्षिणं जान्वाच्य ॥ (१०।१)

सव्यं पित्र्ये ॥ (११।१)

नाज्याहुतिषु नित्यं परिस्तरणम् ॥ (१२।१)

नित्याहुतिषु चेति माण्डूकेयः ॥ (१३।१)

कुशतरुणे अविषमे अविच्छिन्नाग्रे अनन्तर्गर्भे प्रादेशेन मापयित्वा कुशेन छिनत्ति पवित्रे स्थ इति ॥ (१४।१)

द्वे त्रीणि वा भवन्ति ॥ (१५।१)

प्रागग्रे धारयन् वैष्णव्यावित्यभ्युक्ष्य ॥ (१६।१)

कुशतरुणाभ्यां प्रदक्षिणम् अग्निं त्रिः पर्युक्ष्य ॥ (१७।१)

महीनां पयो ऽसीत्याज्यस्थालीम् आदाय ॥ (१८।१)

इषे त्वेत्यधिश्रित्य ॥ (१९।१)

ऋजे त्वेत्युदग् उद्वास्य ॥ (२०।१)

उदगग्रे पवित्रे धारयन्न् अङ्गुष्ठाभ्यां चोपकनिष्ठिकाभ्यां चोभयतः प्रतिगृह्योर्ध्वाग्रे प्रह्वे कृत्वाज्ये प्रत्यस्यति सवितुष्ट्वा प्रसव उत्पुनाम्यच्छिद्रेण पवित्रेण वसोः सूर्यस्य रश्मिभिर् इति ॥ (२१।१)

आज्यसंस्कारः सर्वत्र ॥ (२२।१)

नासंस्कृतेन जुहुयात् ॥ (२३।१)

स्रुवे चापः सवितुर् वेति ॥ (२४।१)

ताः प्रणीताः प्रोक्षणीश् च ॥ (२५।१)