देशबन्धश् चित्तस्य धारणा ॥ (१।१)

तत्र प्रत्ययैकतानता ध्यानम् ॥ (२।१)

तद् एवार्थमात्रानिर्भासं स्वरूपशून्यम् इव समाधिः ॥ (३।१)

त्रयम् एकत्र संयमः ॥ (४।१)

तज्जयात् प्रज्ञालोकः ॥ (५।१)

तस्य भूमिषु विनियोगः ॥ (६।१)

त्रयम् अन्तरङ्गं पूर्वेभ्यः ॥ (७।१)

तद् अपि बहिरङ्गं निर्बीजस्य ॥ (८।१)

व्युत्थाननिरोधसंस्कारयोर् अभिभवप्रादुर्भावौ निरोधलक्षणचित्तान्वयो निरोधपरिणामः ॥ (९।१)

तस्य प्रशान्तवाहिता संस्कारात् ॥ (१०।१)

सर्वार्थतैकाग्रतयोः क्षयोदयौ चित्तस्य समाधिपरिणामः ॥ (११।१)

शान्तोदितौ तुल्यप्रत्ययश् चित्तस्यैकाग्रतापरिणामः ॥ (१२।१)

एतेन भूतेन्द्रियेषु धर्मलक्षणावस्थापरिणामा व्याख्याताः ॥ (१३।१)

शान्तोदिताव्यपदेश्यधर्मानुपाती धर्मी ॥ (१४।१)

क्रमान्यत्वं परिणामान्यत्वे हेतुः ॥ (१५।१)

परिणामत्रयसंयमाद् अतीतानागतज्ञानम् ॥ (१६।१)

शब्दार्थप्रत्ययानाम् इतरेतराध्यासात् संकरस् तत्प्रविभागसंयमात् सर्वभूतरुतज्ञानम् ॥ (१७।१)

संस्कारसाक्षात्करणात् पूर्वजातिज्ञानम् ॥ (१८।१)

प्रत्ययस्य परचित्तज्ञानम् ॥ (१९।१)

न तत्सालम्बनं तस्याविषयीभूतत्वात् ॥ (२०।१)

कायरूपसंयमात् तद्ग्राह्यशक्तिस्तम्भे चक्षुःप्रकाशासंयोगे ऽन्तर्धानम् ॥ (२१।१)

सोपक्रमं निरुपक्रमं च कर्म तत्संयमाद् अपरान्तज्ञानम् अरिष्टेभ्यो वा ॥ (२२।१)

मैत्र्यादिषु बलानि ॥ (२३।१)

बलेषु हस्तिबलादीनि ॥ (२४।१)

प्रवृत्त्यालोकन्यासात् सूक्ष्मव्यवहितविप्रकृष्टज्ञानम् ॥ (२५।१)

भुवनज्ञानं सूर्यसंयमात् ॥ (२६।१)

चन्द्रे ताराव्यूहज्ञानम् ॥ (२७।१)

ध्रुवे तद्गतिज्ञानम् ॥ (२८।१)

नाभिचक्रे कायव्यूहज्ञानम् ॥ (२९।१)

कण्ठकूपे क्षुत्पिपासानिवृत्तिः ॥ (३०।१)

कूर्मनाड्यां स्थैर्यम् ॥ (३१।१)

मूर्धज्योतिषि सिद्धदर्शनम् ॥ (३२।१)

प्रातिभाद् वा सर्वम् ॥ (३३।१)

हृदये चित्तसंवित् ॥ (३४।१)

सत्त्वपुरुषयोर् अत्यन्तासंकीर्णयोः प्रत्ययाविशेषः भोगः परार्थत्वात् स्वार्थसंयमात् पुरुषज्ञानम् ॥ (३५।१)

ततः प्रातिभश्रावणवेदनादर्शास्वादवार्त्ता जायन्ते ॥ (३६।१)

ते समाधाव् उपसर्गा व्युत्थाने सिद्धयः ॥ (३७।१)

बन्धकारणशैथिल्यात् प्रचारसंवेदनाच् च चित्तस्य परशरीरावेशः ॥ (३८।१)

उदानजयाज् जलपङ्ककण्टकादिष्व् असङ्ग उत्क्रान्तिश् च ॥ (३९।१)

समानजयात् प्रज्वलनम् ॥ (४०।१)

श्रोत्राकाशयोः सम्बन्धसंयमाद् दिव्यं श्रोत्रम् ॥ (४१।१)

कायाकाशयोः सम्बन्धसंयमाल् लघुतूलसमापत्तेश् चाकाशगमनम् ॥ (४२।१)

बहिरकल्पिता वृत्तिर् महाविदेहा ततः प्रकाशावरणक्षयः ॥ (४३।१)

स्थूलस्वरूपसूक्ष्मान्वयार्थवत्त्वसंयमाद् भूतजयः ॥ (४४।१)

ततो ऽणिमादिप्रादुर्भावः कायसम्पद् तद्धर्मानभिघातश् च ॥ (४५।१)

रूपलावण्यबलवज्रसंहननत्वानि कायसम्पत् ॥ (४६।१)

ग्रहणस्वरूपास्मितान्वयार्थवत्त्वसंयमाद् इन्द्रियजयः ॥ (४७।१)

ततो मनोजवित्वं विकरणभावः प्रधानजयश् च ॥ (४८।१)

सत्त्वपुरुषान्यताख्यातिमात्रस्य सर्वभावाधिष्ठातृत्वं सर्वज्ञातृत्वं च ॥ (४९।१)

तद्वैराग्याद् अपि दोषबीजक्षये कैवल्यम् ॥ (५०।१)

स्थान्युपनिमन्त्रणे सङ्गस्मयाकरणं पुनर् अनिष्टप्रसङ्गात् ॥ (५१।१)

क्षणतत्क्रमयोः संयमाद् विवेकजं ज्ञानम् ॥ (५२।१)

जातिलक्षणदेशैर् अन्यतानवच्छेदात् तुल्ययोस् ततः प्रतिपत्तिः ॥ (५३।१)

तारकं सर्वविषयं सर्वथाविषयम् अक्रमं चेति विवेकजं ज्ञानम् ॥ (५४।१)

सत्त्वपुरुषयोः शुद्धिसाम्ये कैवल्यम् ॥ (५५।१)