उपदिष्टो धर्मः प्रतिवेदम् ॥ (१।१)

तस्यानु व्याख्यास्यामः ॥ (२।१)

स्मार्तो द्वितीयः ॥ (३।१)

तृतीयः शिष्टागमः ॥ (४।१)

शिष्टाः खलु विगतमत्सरा निरहंकाराः कुम्भीधान्यालोलुपा दम्भदर्पलोभमोहक्रोधविवर्जिताः ॥ (५।१)

धर्मेणाधिगतो येषां वेदः सपरिबृंहणः । (६।१)

शिष्टास् तदनुमानज्ञाः श्रुतिप्रत्यक्षहेतवः । (६।२)

इति ॥ (६।३)

तदभावे दशावरा परिषत् ॥ (७।१)

अथाप्युदाहरन्ति । (८।१)

चातुर्वैद्यं विकल्पी च अङ्गविद् धर्मपाठकः । (८।२)

आश्रमस्थास् त्रयो विप्राः पर्षद् एषा दशावरा ॥ (८।३)

पञ्च वा स्युस् त्रयो वा स्युर् एको वा स्याद् अनिन्दितः । (९।१)

प्रतिवक्ता तु धर्मस्य नेतरे तु सहस्रशः ॥ (९।२)

यथा दारुमयो हस्ती यथा चर्ममयो मृगः । (१०।१)

ब्राह्मणश् चानधीयानस् त्रयस् ते नामधारकाः ॥ (१०।२)

यद् वदन्ति तमस्मूढा मूर्खा धर्मम् अजानतः । (११।१)

तत् पापं शतधा भूत्वा वक्तॄन् समधिगच्छति ॥ (११।२)

बहुद्वारस्य धर्मस्य सूक्ष्मा दुरनुगा गतिः । (१२।१)

तस्मान् न वाच्यो ह्य् एकेन बहुज्ञेनापि संशये ॥ (१२।२)

धर्मशास्त्ररथारूढा वेदखड्गधरा द्विजाः । (१३।१)

क्रीडार्थम् अपि यद् ब्रूयुः स धर्मः परमः स्मृतः ॥ (१३।२)

यथाश्मनि स्थितं तोयं मारुतार्कौ प्रणाशयेत् । (१४।१)

तद्वत् कर्तरि यत् पापं जलवत् सम्प्रलीयते ॥ (१४।२)

शरीरं बलम् आयुश् च वयः कालं च कर्म च । (१५।१)

समीक्ष्य धर्मविद् बुद्ध्या प्रायश्चित्तानि निर्दिशेत् ॥ (१५।२)

अव्रतानाम् अमन्त्राणां जातिमात्रोपजीविनाम् । (१६।१)

सहस्रशः समेतानां परिषत्त्वं न विद्यते । (१६।२)

इति ॥ (१६।३)