पञ्चधा विप्रतिपत्तिर् दक्षिणतस् तथोत्तरतः ॥ (१।१)

यानि दक्षिणतस् तानि व्याख्यास्यामः ॥ (२।१)

यथैतद् अनुपेतेन सह भोजनं स्त्रिया सह भोजनं पर्युषितभोजनं मातुलपितृस्वसृदुहितृगमनम् इति ॥ (३।१)

अथोत्तरत ऊर्णाविक्रयः सीधुपानम् उभयतो दद्भिर् व्यवहार आयुधीयकं समुद्रसंयानम् इति ॥ (४।१)

इतरद् इतरस्मिन् कुर्वन् दुष्यतीतरद् इतरस्मिन् ॥ (५।१)

तत्र तत्र देशप्रामाण्यम् एव स्यात् ॥ (६।१)

मिथ्यैतद् इति गौतमः ॥ (७।१)

उभयं चैव । (८।१)

नाद्रियेत शिष्टस्मृतिविरोधदर्शनात् ॥ (८।२)

प्राग् आदर्शात् प्रत्यक् कनखलाद् दक्षिणेनहिमवन्तम् उदक् पारियात्रम् एतद् आर्यावर्तम् । (९।१)

तस्मिन् य आचारः स प्रमाणम् ॥ (९।२)

गङ्गायमुनयोर् अन्तरम् इत्य् एके ॥ (१०।१)

अथाप्य् अत्र भाल्लविनो गाथाम् उदाहरन्ति ॥ (११।१)

पश्चात् सिन्धुर् विधरणी सूर्यस्योदयनं पुरः । (१२।१)

यावत् कृष्णा विधावन्ति तावद्धि ब्रह्मवर्चसम् ॥ (१२।२)

अवन्तयो ऽङ्गमगधाः सुराष्ट्रा दक्षिणापथाः । (१३।१)

उपावृत्सिन्धुसौवीरा एते संकीर्णयोनयः ॥ (१३।२)

आरट्टान् कारस्करान् पुण्ड्रान् सौवीरान् वङ्गान् कलिङ्गान्प्रानूनान् इति च गत्वा पुनस्तोमेन यजेत सर्वपृष्ठया वा ॥ (१४।१)

अथाप्य् उदाहरन्ति । (१५।१)

पद्भ्यां स कुरुते पापं यः कलिङ्गान् प्रपद्यते । (१५।२)

ऋषयो निष्कृतिं तस्य प्राहुर् वैश्वानरं हविः ॥ (१५।३)

बहूनाम् अपि दोषाणां कृतानां दोषनिर्णये । (१६।१)

पवित्रेष्टिं प्रशंसन्ति सा हि पावनमुत्तमम् ॥ (१६।२)

अथाप्य् उदाहरन्ति । (१७।१)

वैश्वानरीं व्रातपतीं पवित्रेष्टिं तथैव च । (१७।२)

ऋतावृतौ प्रयुञ्जानः पापेभ्यो विप्रमुच्यते । (१७।३)

पापेभ्यो विप्रमुच्यत इति ॥ (१७।४)