भगवानुवाच । (१।१)

ततोऽर्घपात्रे तन्मन्त्रम् अष्टधाकृत्य संजपेत् । (१।२)

तेन तोयानि पुष्पाणि स्वं मण्डलमथासनम् ॥ (१।३)

आशोधयेत्ततः पश्चात् पूजोपकरणं समम् । (२।१)

ॐ ऐं ह्रीं ह्रौं इति मन्त्रेण शब्दप्रांशुविवर्जितम् ॥ (२।२)

द्वारपालं ततो देव्या आसनानि च पूजयेत् । (३।१)

नन्दिभृङ्गिमहाकालगणेशा द्वारपालकाः । (३।२)

उत्तरादिक्रमात्पूज्या आसनानि च मध्यतः ॥ (३।३)

आधारशक्तिप्रभृति हेमाद्र्यन्तान् प्रपूजयेत् । (४।१)

प्रसिद्धान् सर्वतन्त्रेषु पूजाकल्पेषु भैरव ॥ (४।२)

दशदिक्पालसहितान् धर्माधर्मादिकांस्तथा । (५।१)

मण्डलाग्न्यादिकोणेषु पूजयेत् पार्श्वदेशतः ॥ (५।२)

सूर्याग्निसोममरुतां मण्डलानि च पद्मकम् । (६।१)

रजस्तथा तमः सत्त्वं योगपीठं गुरोः पदम् ॥ (६।२)

सारादीन् भद्रपीठान्तान् साङ्गोपाङ्गान् प्रपूजयेत् । (७।१)

ब्रह्माण्डं स्वर्णडिम्बं च ब्रह्मविष्णुमहेश्वरान् ॥ (७।२)

ससागरान् सप्तद्वीपान् स्वर्णद्वीपं समण्डपम् । (८।१)

रत्नपद्मं सपर्यङ्कं रत्नस्तम्भं तथैव च ॥ (८।२)

पञ्चाननं मण्डलस्य मध्येऽवश्यं प्रपूजयेत् । (९।१)

ह्रीं मन्त्रेण ततः कूर्मपृष्ठं पाण्योर्निबध्य च ॥ (९।२)

ध्यायेच्च पूर्ववद् देवीमासाद्यासनम् उत्तमम् । (१०।१)

हृन्मध्ये चिन्तयेत् स्वर्णद्वीपं पर्यङ्कसंभृतम् ॥ (१०।२)

पश्यन्निव ततो देवीम् एकाग्रमनसा स्मरेत् । (११।१)

प्रत्यक्षीकृत्य हृदये मानसैरुपचारकैः ॥ (११।२)

षोडशानां प्रकारैस्तु हृदिस्थां पूजयेच्छिवाम् । (१२।१)

ततस्तु वायुबीजेन दक्षिणे च पुटेन च ॥ (१२।२)

नासिकाया विनिःसार्य क्रीं मन्त्रेण च भैरव । (१३।१)

स्थापयेत्पद्ममध्ये तु तद्धस्तं न वियोजयेत् ॥ (१३।२)

कृते वियोगे हस्तस्य पुष्पात्तस्माच्च भैरव । (१४।१)

गन्धर्वैः पूज्यते देवी पूजकैर्नाप्यते फलम् ॥ (१४।२)

आवाहनं ततः कुर्याद् गायत्र्या शिरसा सह । (१५।१)

महामायायै विद्महे त्वां चण्डिकाख्यां धीमहि ॥ (१५।२)

एतदुक्त्वा ततः पश्चाद् धियो यो नः प्रचोदयात् । (१६।१)

स्नानीयं देवि ते तुभ्यम् ॐ ह्रीं श्रीं नम इत्यतः ॥ (१६।२)

स्नानीयं च ततो देव्यै दद्याल्लक्षणलक्षितम् । (१७।१)

ततस्तु मूलमन्त्रेण गन्धपुष्पं सदीपकम् ॥ (१७।२)

धूपादिकं प्रदद्यात् तु मोदकं पायसं तथा । (१८।१)

सितां गुडं दधिक्षीरं सर्पिर्नानाविधैः फलैः ॥ (१८।२)

रक्तपुष्पं पुष्पमालां सुवर्णरजतादिकम् । (१९।१)

नैवेद्यमुत्तमं देव्या लाङ्गलं मोदकं सिताम् ॥ (१९।२)

शाण्डिल्यकरताम्राख्यकूष्माण्डानां फलानि च । (२०।१)

हरीतकीफलं चापि नागरङ्गकमेलकाम् ॥ (२०।२)

बालप्रियं च यद् द्रव्यं कसेरुकबिसादिकम् । (२१।१)

तोयं च नारिकेलस्य देव्यै देयं प्रयत्नतः ॥ (२१।२)

रक्तं कौशेयवस्त्रं च देयं नीलं कदापि न । (२२।१)

देव्याः प्रियाणि पुष्पाणि बकुलं केशरं तथा ॥ (२२।२)

माघ्यं कह्लारवज्राणि करवीरकुरुण्टकान् । (२३।१)

अर्कपुष्पं शाल्मलकं दूर्वाङ्कुरं सुकोमलम् ॥ (२३।२)

कुशमञ्जरिका दर्भा बन्धूककमले तथा । (२४।१)

मालूरपत्त्रं पुष्पं च त्रिसन्ध्यारक्तपर्णके ॥ (२४।२)

सुमनांसि प्रियाण्येतान्यम्बिकायाश्च भैरव । (२५।१)

बन्धूकं बकुलं माघ्यं बिल्वपत्राणि संध्यकम् ॥ (२५।२)

उत्तमं सर्वपुष्पेषु द्रव्ये पायसमोदकौ । (२६।१)

माल्यं बन्धूकपुष्पस्य शिवायै बकुलस्य वा ॥ (२६।२)

करवीरस्य माघ्यस्य सहस्राणां ददाति यः । (२७।१)

स कामान्प्राप्य चाभीष्टान् मम लोके प्रमोदते ॥ (२७।२)

चन्दनं शीतलं चैव कालीयकसमन्वितम् । (२८।१)

अनुलेपनमुख्यं तु देव्यै दद्यात् प्रयत्नतः ॥ (२८।२)

कर्पूरं कुङ्कुमं कूर्चं मृगनाभिं सुगन्धिकम् । (२९।१)

कालीयकं सुगन्धेषु देव्याः प्रीतिकरं परम् ॥ (२९।२)

यक्षधूपः प्रतीवाहः पिण्डधूपः सगोलकः । (३०।१)

अगुरु सिन्धुवारश्च धूपाः प्रीतिकरा मताः ॥ (३०।२)

अङ्गरागेषु सिन्दूरं देव्याः प्रीतिकरं परम् । (३१।१)

सुगन्धि शालिजं चान्नं मधुमांससमन्वितम् ॥ (३१।२)

अपूपं पायसं क्षीरम् अन्नं देव्याः प्रशस्यते । (३२।१)

रत्नोदकं सकर्पूरं पिण्डीतककुमारकौ ॥ (३२।२)

रोचनं पुष्पकं देव्याः स्नानीयं परिकीर्तितम् । (३३।१)

घृतप्रदीपो दीपेषु प्रशस्तः परिकीर्तितः ॥ (३३।२)

पुष्पाञ्जलित्रयं दद्यान्मूलमन्त्रेण शोभनम् । (३४।१)

दत्त्वोपचारानखिलान्मध्ये चैताः प्रपूजयेत् ॥ (३४।२)

कामेश्वरीं गुप्तदुर्गां विन्ध्यकन्दरवासिनीम् । (३५।१)

कोटेश्वरीं दीर्घिकाख्यां प्रकटीं भुवनेश्वरीम् ॥ (३५।२)

आकाशगङ्गां कामाख्यां यदा दिक्करवासिनीम् । (३६।१)

मातङ्गीं ललितां दुर्गां भैरवीं सिद्धिदां तथा ॥ (३६।२)

बलप्रमथिनीं चण्डीं चण्डोग्रां चण्डनायिकाम् । (३७।१)

उग्रां भीमां शिवां शान्तां जयन्तीं कालिकां तथा ॥ (३७।२)

मङ्गलां भद्रकालीं च शिवां धात्रीं कपालिनीम् । (३८।१)

स्वाहां स्वधामपर्णां च पञ्चपुष्करिणीं तथा ॥ (३८।२)

दमनीं सर्वभूतानां मनःप्रोत्साहकारिणीम् । (३९।१)

दमनीं सर्वभूतानां चतुःषष्टिं च योगिनीः ॥ (३९।२)

एताः सम्पूज्य मध्ये तु मन्त्रेणाङ्गानि पूजयेत् । (४०।१)

हृच्छिरस्तु शिखावर्मनेत्रबाहुपदानि च ॥ (४०।२)

मूलमन्त्राद्यक्षरैस्तु त्रिभिराद्यङ्गपूजनम् । (४१।१)

एकैकं वर्धयेत् पश्चान्मन्त्राण्यङ्गौघपूजने ॥ (४१।२)

सिद्धसूत्रं च खड्गं च खड्गमन्त्रेण पूजयेत् । (४२।१)

ततोऽष्टपत्रमध्ये तु पूजयेदष्टयोगिनीः ॥ (४२।२)

शैलपुत्रीं चण्डघण्टां स्कन्दमातरमेव च । (४३।१)

कालरात्रिं च पूर्वादिचतुर्दिक्षु प्रपूजयेत् ॥ (४३।२)

चण्डिकामथ कूष्माण्डीं तथा कात्यायनीं शुभाम् । (४४।१)

महागौरीं चाग्निकोणे नैरृत्यादिषु पूजयेत् ॥ (४४।२)

महामायां क्षमस्वेति मूलमन्त्रेण चाष्टधा । (४५।१)

पूजयेत् पद्ममध्ये तु बलिदानं ततः परम् ॥ (४५।२)

एवं यदा कल्पविधानमानैः सम्पूज्यते भैरव कामदेवी । (४६।१)

तदा स्वयं मण्डलमेत्य देयं गृह्णाति कामं च ददाति सम्यक् ॥ (४६।२)