श्रीभगवानुवाच । (१।१)

अस्य मन्त्रस्य कवचं शृणु वेतालभैरव । (१।२)

वैष्णवीतन्त्रसंज्ञस्य वैष्णव्याश्च विशेषतः ॥ (१।३)

तत्र मन्त्राद्यक्षरं तु वासुदेवस्वरूपधृक् । (२।१)

वर्णो द्वितीयो ब्रह्मैव तृतीयश्चन्द्रशेखरः ॥ (२।२)

चतुर्थो गजवक्त्रश्च पञ्चमस्तु दिवाकरः । (३।१)

शक्तिं स्वयं पकारश्च महामाया जगन्मयी ॥ (३।२)

यकारस्तु महालक्ष्मीः शेषवर्णः सरस्वती । (४।१)

योगिनीपूर्ववर्णस्य शैलपुत्री प्रकीर्तिता ॥ (४।२)

द्वितीयस्य तु वर्णस्य चण्डिका योगिनी मता । (५।१)

चन्द्रघण्टा तृतीयस्य कुष्माण्डी तत्परस्य च ॥ (५।२)

स्कन्दमाता तकारस्य पश्य कात्यायनी स्वयम् । (६।१)

कालरात्रिः सप्तमस्य महादेवीति संस्थिता ॥ (६।२)

प्रथमं वर्णकवचं योगिनीकवचं तथा । (७।१)

देवौघकवचं पश्चाद् देवीदिक्कवचं तथा ॥ (७।२)

ततस्तु पार्श्वकवचं द्वितीयान्ताव्ययस्य च । (८।१)

कवचं तु ततः पश्चात् षड्वर्णं कवचं तथा ॥ (८।२)

अभेद्यकवचं चेति सर्वत्राणपरायणम् । (९।१)

इमानि कवचान्यष्टौ यो जानाति नरोत्तमः ॥ (९।२)

सोऽहमेव महादेवी देवीरूपश्च शक्तिमान् । (१०।१)

अस्य वैष्णवीतन्त्रकवचस्य नारदर्षिर् अनुष्टुप्छन्दः ॥ (१०।२)

कात्यायनी देवता सर्वकामार्थसाधने विनियोगः । (११।१)

अः पातु पूर्वकाष्ठायामाग्नेय्यां पातु कः सदा ॥ (११।२)

पातु चो यमकाष्ठायां दो नैरृत्यां च सर्वदा । (१२।१)

मां पातु तोऽसौ पाश्चात्ये शक्तिर् वायव्यदिग्गता ॥ (१२।२)

यः पातु मां चोत्तरस्यामैशान्यां यस्तथावतु । (१३।१)

मूर्ध्नि रक्षतु मां सोऽसौ बाहौ मां दक्षिणे तु कः ॥ (१३।२)

मां वामबाहौ चः पातु हृदि टो मां सदावतु । (१४।१)

तः पातु कण्ठदेशे मां कट्योः शक्तिस्तथावतु ॥ (१४।२)

यः पातु दक्षिणे पादे षो मां वामपादे तथा । (१५।१)

शैलपुत्री तु पूर्वस्यामाग्नेय्यां पातु चण्डिका ॥ (१५।२)

चन्द्रघण्टा पातु याम्यां यमभीतिविवर्धिनी । (१६।१)

नैरृत्ये त्वथ कूष्माण्डी पातु मां जगतां प्रसूः ॥ (१६।२)

स्कन्दमाता पश्चिमायां मां रक्षतु सदैव हि । (१७।१)

कात्यायनी मां वायव्ये पातु लोकेश्वरी सदा ॥ (१७।२)

कालरात्री तु कौबेर्यां सदा रक्षतु मां स्वयम् । (१८।१)

महागौरी तथैशान्यां सततं पातु पावनी ॥ (१८।२)

नेत्रयोर्वासुदेवो मां पातु नित्यं सनातनः । (१९।१)

ब्रह्मा मां पातु वदने पद्मयोनिर् अयोनिजः ॥ (१९।२)

नासाभागे रक्षतु मां सर्वदा चन्द्रशेखरः । (२०।१)

गजवक्त्रः स्तनयुग्मे पातु नित्यं हरात्मजः ॥ (२०।२)

वामदक्षिणपाण्योर्मां नित्यं पातु दिवाकरः । (२१।१)

महामाया स्वयं नाभौ मां पातु परमेश्वरी ॥ (२१।२)

महालक्ष्मीः पातु गुह्ये जानुनोश्च सरस्वती । (२२।१)

महामाया पूर्वभागे नित्यं रक्षतु मां ॥ (२२।२)

अग्निज्वाला तथाग्नेय्यां पायान्नित्यं वरासिनी । (२३।१)

रुद्राणी पातु मां याम्यां नैरृत्यां चण्डनायिका ॥ (२३।२)

उग्रचण्डा पश्चिमायां पातु नित्यं महेश्वरी । (२४।१)

प्रचण्डा पातु वायव्ये कौबेर्यां घोररूपिणी ॥ (२४।२)

ईश्वरी च तथैशान्यां पातु नित्यं सनातनी । (२५।१)

ऊर्ध्वं पातु महामाया पात्वधः परमेश्वरी ॥ (२५।२)

अग्रतः पातु मामुग्रा पृष्ठतो वैष्णवी तथा । (२६।१)

ब्रह्माणी दक्षिणे पार्श्वे नित्यं रक्षतु शोभना ॥ (२६।२)

माहेश्वरी वामपार्श्वे नित्यं पायाद् वृषध्वजा । (२७।१)

कौमारी पर्वते पातु वाराही सलिले च माम् ॥ (२७।२)

नारसिंही दंष्ट्रिभये पातु मां विपिनेषु च । (२८।१)

ऐन्द्री मां पातु चाकाशे तथा सर्वजले स्थले ॥ (२८।२)

सेतुः सर्वाङ्गुलीः पातु देवादिः पातु कर्णयोः । (२९।१)

देवान्तश्चिबुके पातु पार्श्वयोः शक्तिपञ्चमः ॥ (२९।२)

हा पातु मां तथैवोर्वोर्माया रक्षतु जङ्घयोः । (३०।१)

सर्वेन्द्रियाणि यः पातु रोमकूपेषु सर्वदा ॥ (३०।२)

त्वचि मां वै सदा पातु मां शम्भुः पातु सर्वदा । (३१।१)

नखदन्तकरोष्ठपादौ रां मां पातु सदैव हि ॥ (३१।२)

देवादिः पातु मां वस्तौ देवान्तः स्तनकक्षयोः । (३२।१)

एतदादौ तु यः सेतुर्बाह्ये मां पातु देहतः ॥ (३२।२)

आज्ञाचक्रे सुषुम्नायां षट्चक्रे हृदि सन्धिषु । (३३।१)

आदिषोडशचक्रे च ललाटाकाश एव च ॥ (३३।२)

वैष्णवी तन्त्रमन्त्रो मां नित्यं रक्षंश्च तिष्ठतु । (३४।१)

कर्णनाडीषु सर्वासु पार्श्वकक्षशिखासु च ॥ (३४।२)

रुधिरस्नायुमज्जासु मस्तिष्केषु च पर्वसु । (३५।१)

द्वितीयाष्टाक्षरो मन्त्रः कवचं पातु सर्वतः ॥ (३५।२)

रेतो वायौ नाभिरन्ध्रे पृष्ठसन्धिषु सर्वतः । (३६।१)

षडक्षरस्तृतीयो ऽयं मन्त्रो मां पातु सर्वदा ॥ (३६।२)

नासारन्ध्रे महामाया कण्ठरन्ध्रे तु वैष्णवी । (३७।१)

सर्वसन्धिषु मां पातु दुर्गा दुर्गार्तिहारिणी ॥ (३७।२)

श्रोत्रयोर् हूं फडित्येवं नित्यं रक्षतु कालिका । (३८।१)

नेत्रबीजत्रयं नेत्रे सदा तिष्ठतु रक्षितुम् ॥ (३८।२)

ॐ ऐं ह्रीं ह्रौं नासिकायां रक्षन्ती चास्तु चण्डिका । (३९।१)

ॐ ह्रीं हूं मां सदा तारा जिह्वामूले तु तिष्ठतु ॥ (३९।२)

हृदि तिष्ठतु मे सेतुर्ज्ञानं रक्षितुम् उत्तमम् । (४०।१)

ॐ क्षौं फट् च महामाया पातु मां सर्वतः सदा ॥ (४०।२)

ॐ युं सः प्राणान् कौशिकी मां प्राणान्रक्षतु रक्षिका । (४१।१)

ह्रीं हूं सौं भर्गदयिता देहशून्येषु पातु माम् ॥ (४१।२)

ॐ नमः सदा शैलपुत्री सर्वान् रोगान् प्रमृज्यताम् । (४२।१)

ॐ ह्रीं सः स्फें क्षः फडस्त्राय सिंहव्याघ्रभयाद्रणात् ॥ (४२।२)

शिवदूती पातु नित्यं ह्रीं सर्वास्त्रेषु तिष्ठतु । (४३।१)

ॐ हां हीं सश्चण्डघण्टा कर्णच्छिद्रेषु पातु माम् ॥ (४३।२)

ॐ क्रीं सः कामेश्वरी कामानभितिष्ठतु रक्षतु । (४४।१)

ॐ आं हूं फडुग्रचण्डा रिपून् विघ्नान् विमर्दताम् ॥ (४४।२)

ॐ अं शूलात्पातु नित्यं वैष्णवी जगदीश्वरी । (४५।१)

ॐ कं ब्रह्माणी पातु चक्रात् च रुद्राणी तु शक्तितः ॥ (४५।२)

ॐ टं कौमारी पातु वज्रात्तं वाराही तु काण्डतः । (४६।१)

ॐ पं पातु नारसिंही मां क्रव्यादेभ्यस्तथास्त्रतः ॥ (४६।२)

शस्त्रास्त्रेभ्यः समस्तेभ्यो यन्त्रेभ्योऽनिष्टमन्त्रतः । (४७।१)

चण्डिका मां सदा पातु यं सं देव्यै नमो नमः । (४७।२)

विश्वासघातकेभ्यो मामैन्द्री रक्षतु मन्मनः ॥ (४७।३)

ॐ नमो महामायायै ॐ वैष्णव्यै नमो नमः । (४८।१)

रक्ष मां सर्वभूतेभ्यः सर्वत्र परमेश्वरि ॥ (४८।२)

आधारे वायुमार्गे हृदि कमलदले चन्द्रवत् स्मेरसूर्ये वस्तौ वह्नौ समिद्धे विशतु वरदया मन्त्रमष्टाक्षरं तत् । (४९।१)

यद्ब्रह्मा मूर्ध्नि धत्ते हरिर् अवति गले चन्द्रचूडो हृदिस्थं तं मां पातु प्रधानं निखिलमतिशयं पद्मगर्भाभबीजम् ॥ (४९।२)

आद्याः शेषाः स्वरौघैर् ममयवलवरैर् अस्वरेणापि युक्तैः सानुस्वाराविसर्गैर् हरिहरविदितं यत्सहस्रं च साष्टम् । (५०।१)

मन्त्राणां सेतुबन्धं निवसति सततं वैष्णवीतन्त्रमन्त्रे तन्मां पायात्पवित्रं परमपरमजं भूतलव्योमभागे ॥ (५०।२)

अङ्गान्यष्टौ तथाष्टौ वसव इह तथैवाष्टमूर्तिर् दलानि प्रोक्तान्यष्टौ तथाष्टौ मधुमतिरचिताः सिद्धयो ऽष्टौ तथैव । (५१।१)

अष्टावष्टाष्टसंख्या जगति रतिकलाः क्षिप्रकाष्ठाङ्गयोगा मय्यष्टावक्षराणि क्षरतु न हि गणो यद्धृदो यस्त्वमूषाम् ॥ (५१।२)

इयि तत्कवचं प्रोक्तं धर्मकामार्थसाधनम् । (५२।१)

इदं रहस्यं परममिदं सर्वार्थसाधकम् ॥ (५२।२)

यः सकृच्छृणुयादेतत् कवचं मयकोदितम् । (५३।१)

स सर्वांल्लभते कामान् परत्र शिवरूपताम् ॥ (५३।२)

सकृद् यस्तु पठेदेतत् कवचं मयकोदितम् । (५४।१)

स सर्वयज्ञस्य फलं लभते नात्र संशयः ॥ (५४।२)

संग्रामेषु जयेच्छत्रुं मातङ्गानिव केशरी । (५५।१)

दहेत्तृणं यथा वह्निस्तथा शत्रुं दहेत् सदा ॥ (५५।२)

नास्त्राणि तस्य शस्त्राणि शरीरे प्रविशन्ति वै । (५६।१)

न तस्य जायते व्याधिर्न च दुःखं कदाचन ॥ (५६।२)

गुटिकाञ्जनपातालपादलेपरसाञ्जनम् । (५७।१)

उच्चाटनाद्यास्ताः सर्वाः प्रसीदन्ति च सिद्धयः ॥ (५७।२)

वायोर् इव मतिस्तस्य भवेदन्यैरवारिता । (५८।१)

दीर्घायुः कामभोगी च धनवानभिजायते ॥ (५८।२)

अष्टम्यां संयतो भूत्वा नवम्यां विधिवच्छिवाम् । (५९।१)

पूजयित्वा विधानेन विचिन्त्य मनसा शिवाम् ॥ (५९।२)

यो न्यसेत् कवचं देहे तस्य पुण्यफलं शृणु । (६०।१)

जितव्याधिः शतायुश्च रूपवान् गुणवान् सदा ॥ (६०।२)

धनरत्नौघसम्पूर्णो विद्यावान् स च जायते । (६१।१)

नाग्निर्दहति तत्कायं नापः संक्लेदयन्ति च ॥ (६१।२)

न शोषयति तं वायुः क्रव्यात् तं न हिनस्ति च । (६२।१)

शस्त्राणि नैनं छिन्दन्ति न तापयति भास्करः ॥ (६२।२)

न तस्य जायते विघ्नो नास्ति तस्य च संज्वरः । (६३।१)

वेतालाश्च पिशाचाश्च राक्षसा गणनायकाः ॥ (६३।२)

सर्वे तस्य वशं यान्ति भूतग्रामाश्चतुर्विधाः । (६४।१)

नित्यं पठति यो भक्त्या कवचं हरनिर्मितम् ॥ (६४।२)

सोऽहमेव महादेवो महामाया च मातृका । (६५।१)

धर्मार्थकाममोक्षाश्च तस्य नित्यं करे स्थिताः ॥ (६५।२)

अन्यस्य वरदः सो ऽर्थैर्नित्यं भवति पण्डितः । (६६।१)

कवित्वं सत्यवादित्वं सततं तस्य जायते ॥ (६६।२)

वदेच्छ्लोकसहस्राणि भवेच्छ्रुतिधरस्तथा । (६७।१)

लिखितं यस्य गेहे तु कवचं भैरवस्थितम् ॥ (६७।२)

न तस्य दुर्गतिः क्वापि जायते तस्य दूषणम् । (६८।१)

ग्रहाश्च सर्वे तुष्यन्ति वशं गच्छन्ति भूमिपाः ॥ (६८।२)