Chapter 1
Select a line for its word-by-word analysis.
घनतिमिरनागसिंहस्त्रिभुवनभवनाधिपो जगच्चक्षुः । (१।१)
ghanatimiranāgasiṃhastribhuvanabhavanādhipo jagaccakṣuḥ |
उदयास्ताचमौलिर् जयति रविर् गगनतिलकैकः ॥ (१।२)
udayāstācamaulir jayati ravir gaganatilakaikaḥ ||
मूर्ध्ना गणेशं च सरस्वतीं च सलोकपालं परमेश्वरं च । (२।१)
mūrdhnā gaṇeśaṃ ca sarasvatīṃ ca salokapālaṃ parameśvaraṃ ca |
पद्मोद्भवं पद्मधनं हरिं च त्रैलोक्यदीपं प्रणमामि भानुम् ॥ (२।२)
padmodbhavaṃ padmadhanaṃ hariṃ ca trailokyadīpaṃ praṇamāmi bhānum ||
यात्राविधिर् अत ऊर्ध्वं विजिगीषोर् विदितजन्मसमयस्य । (३।१)
yātrāvidhir ata ūrdhvaṃ vijigīṣor viditajanmasamayasya |
प्रत्यब्दमासवासरविभक्तसुखदुःखनिष्ठस्य ॥ (३।२)
pratyabdamāsavāsaravibhaktasukhaduḥkhaniṣṭhasya ||
विदिते होराराशौ स्थानबलपरिग्रहे ग्रहाणां च । (४।१)
vidite horārāśau sthānabalaparigrahe grahāṇāṃ ca |
आयुषि च परिज्ञाते शुभम् अशुभं वा फलं वाच्यम् ॥ (४।२)
āyuṣi ca parijñāte śubham aśubhaṃ vā phalaṃ vācyam ||
प्रस्तुतविरोध एवं स्थितविषये भवति शास्त्रनिर्देशः । (५।१)
prastutavirodha evaṃ sthitaviṣaye bhavati śāstranirdeśaḥ |
जन्मसमयं च केचिद् वदन्ति न वदन्ति बहवो ऽन्ये ॥ (५।२)
janmasamayaṃ ca kecid vadanti na vadanti bahavo 'nye ||
जन्मर्क्षोदयलग्ने तद् अपि ययोर् वा यियासतः प्रश्ने । (६।१)
janmarkṣodayalagne tad api yayor vā yiyāsataḥ praśne |
त्रिषडेकादशशीर्षोदयेषु मार्गेषु च जयः स्यात् ॥ (६।२)
triṣaḍekādaśaśīrṣodayeṣu mārgeṣu ca jayaḥ syāt ||
शत्रोर् होराराशिस् तदधिपतिर् जन्मभं तदीशो वा । (७।१)
śatror horārāśis tadadhipatir janmabhaṃ tadīśo vā |
यद्य् अस्ते हिबुके वा तथापि शत्रुर् हतो वाच्यः ॥ (७।२)
yady aste hibuke vā tathāpi śatrur hato vācyaḥ ||
प्रश्ने मनोरमा भूर् मङ्गल्यद्रव्यदर्शनं शस्तम् । (८।१)
praśne manoramā bhūr maṅgalyadravyadarśanaṃ śastam |
यदि चादरेण पृच्छति दैवज्ञो निर्दिशेद् विजयम् ॥ (८।२)
yadi cādareṇa pṛcchati daivajño nirdiśed vijayam ||
नन्दा भद्रा विजया रिक्ता पूर्णा च नामसदृशफलाः । (९।१)
nandā bhadrā vijayā riktā pūrṇā ca nāmasadṛśaphalāḥ |
न्यूनसमेष्टा दशमे तिथयः शुक्ले कृष्णे प्रतीपास् ताः ॥ (९।२)
nyūnasameṣṭā daśame tithayaḥ śukle kṛṣṇe pratīpās tāḥ ||
नक्षत्रपुटाकिरणं पश्चात् संध्यागतं ग्रहैर् भिन्नम् । (१०।१)
nakṣatrapuṭākiraṇaṃ paścāt saṃdhyāgataṃ grahair bhinnam |
क्रूरनिपीडितम् उत्पातदूषितं चाशुभं सर्वम् ॥ (१०।२)
krūranipīḍitam utpātadūṣitaṃ cāśubhaṃ sarvam ||
Data courtesy of The Digital Corpus of Sanskrit.