लग्नोपगतैः सौम्यैर् आरोग्यं भवति चित्तसौख्यं च । (१।१)

अर्थस्थैर् अर्थचयो योधविवृद्धिस् तृतीयस्थैः ॥ (१।२)

वाहनसुहृदां वृद्धिश् चतुर्थगैः पञ्चगैश् च मन्त्रिबलम् । (२।१)

रिपुनाशः षष्ठस्थैः भृगुवर्जं सप्तमेषु हिताः ॥ (२।२)

रक्षन्त्य् आयुर्निधने शशिवर्जं नवमभेषु वसुसम्पत् । (३।१)

कर्मणि सिद्धिर् लाभो बलसम्पातश् च दशमाद्यैः ॥ (३।२)

भौमार्कार्किशशाङ्कैर् लग्ने वधबन्धमरणसंत्रासाः । (४।१)

अर्थक्षयो द्वितीयैस् तृतीयसंस्थैर् यशो द्युतिमत् ॥ (४।२)

वाहनबन्धुवियोगो मन्त्रखावो रिपुक्षयश् चेति । (५।१)

हिबुकादिषु सप्तमगैः स्वविषयनाशो भृगुसुते च ॥ (५।२)

मृत्युर् निधनोपगतैः सेनाव्यसनं महन् नवमसंस्थैः । (६।१)

कुजसूर्यौ दशमस्थौ जयदौ भङ्गप्रदः सौरिः ॥ (६।२)

जयम् एकादशसंस्थैः क्रूरैर् अन्त्योपगैः स्वबलभेदः । (७।१)

उपचयवर्जं सौम्यैर् यातुः पापैर् विपर्यस्तम् ॥ (७।२)

क्रूरो ऽप्य् अनुकूलस्थः शस्तो लग्ने शुभो ऽपि वानिष्टः । (८।१)

वक्री न शुभः केन्द्रे तदहस् तद्वर्गलग्नं च ॥ (८।२)

सामपती जीवसितौ भेदस्य तु राहुकेतुबुधसौराः । (९।१)

दण्डस्यार्कक्षितिजाबुध प्रदानस्य शीतांशुः ॥ (९।२)

सूर्यादिभिर् अनुकूलैस् तद् उदयवर्गैश् च तत्सिद्धिः ॥ (१०।२)

नीचस्था ग्रहविजिता रव्यभिभूता विरश्मयो ह्रस्वाः । (११।१)

भुजगा इव मन्त्रहता भवन्त्य् अकार्यक्षमा लग्ने ॥ (११।२)

येषां गमे नवमपञ्चमकण्टकस्थाः सौम्यास् तृतीयरिपुलाभगताश् च पापाः । (१२।१)

आयान्ति ते स्वभवनानि पुनः कृतार्थाः दत्ता द्विजातिषु तथा विधिवद् यथार्थाः ॥ (१२।२)

एकस्मिन्न् अपि केन्द्रे यदि सौम्यो न ग्रहो ऽस्ति यात्रायाम् । (१३।१)

जन्मन्य् अथवा कर्मणि न तच् छुभं प्राहुर् आचार्याः ॥ (१३।२)

राह्वर्कारशिखिसिता यायिन इति शर्वरीश आक्रन्दः । (१४।१)

गुरुबुधसौराः पौराः पौरः सूर्यो ऽपि पूर्वाह्णे ॥ (१४।२)

यायिभिर् अनुकूलस्थैर् यानं पौरैर् विगृह्य चासीनम् । (१५।१)

पौरेतरैर् अपि शुभैर् यायाद् अर्धेन सैन्यस्य ॥ (१५।२)

सर्वैर् अप्य् अशुभकरैः शुभदैवं संश्रयेत् प्रधाननृपम् । (१६।१)

बलसिद्धिः सौम्यफलैर् बलिभिः क्रूरैर् जयो युद्धे ॥ (१६।२)