तत्र मनुः । (१।१)

हत्वा छित्त्वा च भित्त्वा च क्रोशन्तीं रुदतीं गृहात् । (१।२)

प्रसह्य कन्यां हरतो राक्षसो विधिरुच्यते ॥ (१।३)

हत्वा छित्त्वा भित्त्वा कन्यासम्बन्धिनमिति शेषः ॥ (२।०)

छेदादन्यहिंसापरो हत्वेति शब्दः ता उषित्वेति लक्ष्मीधरः ॥ (३।०)

क्रोशन्तीं भयात् स्वजनमाह्वयन्तीं प्रसह्य हरणे तात्पर्य्यम् ॥ (४।०)

देवलः । (५।१)

विक्रमेण प्रसह्य स्यात् कुमारीहरणं पुनः । (५।२)

वीर्य्यहेतुर् विवाहः सः राक्षसः सप्तमो मतः ॥ (५।३)

प्रसह्य अभिभूय ॥ (६।०)

आश्वलायनः । (७।१)

हत्वा छित्त्वा च शीर्षाणि रुदन्तीं रुदद्भ्यो हरेत् । (७।२)

स राक्षसः ॥ (७।३)

रुदद्भ्यः कन्याबन्धुभ्यः ॥ (८।०)

हारीतः । (९।१)

राजाश्रयेण वधदण्डाभिघातभयविशेषाद्राक्षसः ॥ (९।२)

राजानमालम्ब्य वधादिभयम् उत्पाद्य कन्याहरणं राक्षसः ॥ (१०।०)

वसिष्ठः । (११।१)

यस्मिन् बलेन प्रमथ्य हरेत् स क्षात्रः ॥ (११।२)

प्रमथ्य कन्यासम्बन्धिनम् ॥ (१२।०)

क्षात्रशब्दोऽत्र राक्षसपरः प्रकरणात् ॥ (१३।०)