एकम् इषे विष्णुस् त्वान्वेतु । (१।१)

द्वे ऊर्जे विष्णुस् त्वान्वेतु । (१।२)

त्रीणि व्रताय विष्णुस् त्वान्वेतु । (१।३)

चत्वारि मायोभवाय विष्णुस् त्वान्वेतु । (१।४)

पञ्च पशुभ्यो विष्णुस् त्वान्वेतु । (१।५)

षड् रायस्पोषाय विष्णुस् त्वान्वेतु । (१।६)

सप्त सप्तभ्यो होत्राभ्यो विष्णुस् त्वान्वेतु । (१।७)

इति ॥ (१।८)

सप्तमं पदम् अवस्थाप्य जपति । (२।१)

सखायौ सप्तपदाव् अभूव सख्यं ते गमेयं सख्यात् ते मा योषं सख्यान् मे मा योष्ठाः इति ॥ (२।२)

अथास्या दक्षिणेन पादेन दक्षिणं पादम् अवक्रम्य दक्षिणेन हस्तेन दक्षिणम् अंसम् उपर्य् उपर्य् अन्ववमृश्य हृदयदेशम् अभिमृशति यथा पुरस्तात् ॥ (३।१)

प्राणानां ग्रन्थिर् असि स मा विस्रसः । (४।१)

इति नाभिदेशम् ॥ (४।२)

ताम् अपरेणाग्निं प्राचीम् उपवेश्य पुरस्तात् प्रत्यङ् तिष्ठन्न् अद्भिः प्रोक्षति । (५।१)

आपो हि ष्ठा मयोभुवः । (५।२)

इति तिसृभिः । (५।३)

हिरण्यवर्णाः शुचयः पावकाः । (५।४)

इति चतसृभिः । (५।५)

पवमानः सुवर्जनः । (५।६)

इति चैतेनानुवाकेन ॥ (५।७)

अत्र बीजान्य् अधिश्रयन्ति ॥ (६।१)