तां ततः प्रवाहयन्ति प्र वा हारयन्ति ॥ (१।१)

समोप्यैतम् अग्निम् अनुहरन्ति ॥ (२।१)

नित्यो धार्यः ॥ (३।१)

अनुगतो मन्थ्यः श्रोत्रियागाराद् वाहार्यः ॥ (४।१)

उपवासश् चानुगते भार्यायाः पत्युर् वा ॥ (५।१)

आगारं प्राप्याथैनां संशास्ति । (६।१)

दक्षिणं पादम् अग्रेति हर देहलिं माधिष्ठाः । (६।२)

इति ॥ (६।३)

पूर्वार्धे शालायां न्युप्योपसमादधाति ॥ (७।१)

अपरेणाग्निं लोहितम् आनडुहं चर्म प्राचीनग्रीवम् उत्तरलोमास्तृणाति ॥ (८।१)

तस्मिन् प्राङ्मुखाव् उदङ्मुखौ वोपविशतः । (९।१)

पश्चात् पतिं भार्योपविशति । (९।२)

इह गावो निषीदन्त्व् इहाश्वा इह पूरुषाः । (९।३)

इहो सहस्रदक्षिणोपि पूषा निषीदतु । (९।४)

इति ॥ (९।५)

वाचंनियमाव् आसाते आ नक्षत्राणाम् उदयात् ॥ (१०।१)

उदितेषु नक्षत्रेषु प्राचीम् उदीचीं वा दिशम् उपनिष्क्रम्य । (११।१)

देवीः षड् उर्वीः । (११।२)

इति दिश उपतिष्ठते ॥ (११।३)

मा हास्महि प्रजया । (१२।१)

इति नक्षत्राणि ॥ (१२।२)

मा रधाम द्विषते सोम राजन् । (१३।१)

इति चन्द्रमसम् ॥ (१३।२)

सप्तर्षयः प्रथमां कृत्तिकानाम् अरुन्धतीं ये ध्रुवतां ह निन्युः । (१४।१)

षट्कृत्तिकामुख्ययोगं वहन्तीयम् अस्माकं भ्राजत्व् अष्टमी । (१४।२)

इति सप्तर्षीन् उपस्थाय ध्रुवम् उपतिष्ठते । (१४।३)

ध्रुवक्षितिर् ध्रुवयोर् निध्रुवम् असि ध्रुवत स्थितम् । (१४।४)

त्वं नक्षत्राणां मेथ्य् असि स मा पाहि पृतन्यतः । (१४।५)

नमो ब्रह्मणे ध्रुवायाच्युतायास्तु नमो ब्रह्मणः पुत्राय प्रजापतये नमो ब्रह्मणः पुत्रेभ्यो देवेभ्यस् त्रयस्त्रिंशेभ्यो नमो ब्रह्मणः पुत्रपौत्रेभ्यो ऽङ्गिरोभ्यः । (१४।६)

यस् त्वा ध्रुवम् अच्युतं सपुत्रं सपौत्रं ब्रह्म वेद ध्रुवा अस्मिन् पुत्राः पौत्रा भवन्ति । (१४।७)

प्रेष्यान्तेवासिनो वसनं कम्बलानि कंसं हिरण्यं स्त्रियो राजानो ऽन्नम् अभयम् आयुः कीर्तिर् वर्चो यशो बलं ब्रह्मवर्चसम् अन्नाद्यम् इत्य् एतानि मयि सर्वाणि ध्रुवाण्य् अच्युतानि सन्तु ॥ (१४।८)