समाम्नायः समाम्नातः स व्याख्यातव्यः ॥ (१।०)

तम् इमम् समाम्नायं निघण्टव इत्याचक्षते ॥ (२।०)

निघण्टवः कस्मान् निगमा इमे भवन्ति ॥ (३।०)

छन्दोभ्यः समाहृत्य समाहृत्य समाम्नाताः ॥ (४।०)

ते निगन्तव एव सन्तो निगमनान् निघण्टव उच्यन्त इत्यौपमन्यवः ॥ (५।०)

अपि वा हननाद् एव स्युः समाहता भवन्ति ॥ (६।०)

यद् वा समाहृता भवन्ति ॥ (७।०)

तद् यानि चत्वारि पदजातानि नामाख्याते चोपसर्गनिपाताश्च तानि इमानि भवन्ति ॥ (८।०)

तत्रैतन् नामाख्यातयोर् लक्षणं प्रदिशन्ति ॥ (९।०)

भावप्रधानम् आख्यातं सत्त्वप्रधानानि नामानि ॥ (१०।०)

तद्यत्रोभे भावप्रधाने भवतः ॥ (११।०)

पूर्वापरीभूतं भावम् आख्यातेनाचष्टे व्रजति पचतीति ॥ (१२।०)

उपक्रमप्रभृत्यपवर्गपर्यन्तं मूर्तं सत्त्वभूतं सत्त्वनामभिर् व्रज्यापक्तिर् इति ॥ (१३।०)

अद इति सत्त्वानाम् उपदेशो गौर् अश्वः पुरुषो हस्तीति ॥ (१४।०)

भवतीति भावस्यास्ते शेते व्रजति तिष्ठतीति ॥ (१५।०)

इन्द्रियनित्यं वचनम् औदुम्बरायणः ॥ (१६।०)