अणिमा परमाणुरूपतापत्तिः ॥ (१।०)

लघिमा तूलपिण्डवल्लघुत्वप्राप्तिः ॥ (२।०)

गरिमा गुरुत्वप्राप्तिः ॥ (३।०)

महिमा महत्त्वप्राप्तिः अङ्गुल्यग्रेण चन्द्रादिस्पर्शनशक्तिः ॥ (४।०)

प्राकाम्यम् इच्छानभिघातः ॥ (५।०)

शरीरान्तःकरणेश्वरत्वम् ईशित्वम् ॥ (६।०)

सर्वत्र प्रभविष्णुता वशित्वं सर्वाण्य् एव भूताणि अनुरागित्वात् तदुक्तं नातिक्रामन्ति ॥ (७।०)

कामावसायित्वं सर्वत्र कामावसायो यस्मिन् विषयेऽस्य काम इच्छा भवति तस्मिन् विषये योगिनो ऽवसायो भवति तं विषयं स्वीकारद्वारेणाभिलाषसमाप्तिपर्यन्तं नयतीत्यर्थः ॥ (८।०)

तत्र ते अणिमाद्याः समाध्युपयोगिनो भूतजयात् योगिनः प्रादुर्भवन्ति ॥ (९।०)

यथा परमाणुत्वं प्राप्तो वज्रादीनामप्यन्तः प्रविशति ॥ (१०।०)

एवं सर्वत्र योज्यम् ॥ (११।०)

एतेऽणिमादयोऽष्टौ गुणा महासिद्धय इत्युच्यन्ते ॥ (१२।०)

कायसम्पद् वक्ष्यमाणा तां प्राप्नोति ॥ (१३।०)

तद्धर्मानभिघातश् च तस्य कायस्य ये धर्मा रूपादयस्तेषामभिघातो नाशो नास्य कुतश्चिद् अपि भवति ॥ (१४।०)

नास्य रूपमग्निर्दहति न च वायुः शोषयति इत्यादि योज्यम् ॥ (१५।०)

कायसम्पदम् आह ॥ (१६।१)