प्रातिपदावस्था खलु व्यक्तावस्थेत्य् उक्ता ॥ (१।०)

कस्मात् ॥ (२।०)

पाशुपत्ये ऽयम् इति व्यक्तिनिमित्तत्वात् भस्मस्नानशयनानुस्नानादिभिर् लिङ्गधारीत्य् उपदेशाद् इति ॥ (३।०)

द्वितीयावस्था तु जात्यादिव्यक्तेर् अहेतुत्वाद् अव्यक्तावस्थेत्य् उक्ता ॥ (४।०)

कस्मात् ॥ (५।०)

अव्यक्तलिङ्गोपदेशाद् विद्यादिगोपनोपदेशाच् चेति ॥ (६।०)

तृतीयावस्था पुनर् इन्द्रियजयार्थत्वेन जयावस्थेत्य् उच्यते ॥ (७।०)

देवनित्यस्वार्थत्वे ऽप्य् अस्या इन्द्रियजयार्थतैव प्राधान्येनोक्ता सूत्राणां सम्बन्धकथनद्वारेणाचार्यभाष्यकृतेति ॥ (८।०)

छेदावसानार्थावस्था छेदावस्थेत्य् उक्ता ॥ (९।०)

सर्वस्य साधकव्यापारस्यात्यन्तोपरमो निष्ठा ॥ (१०।०)

तदुपलक्षितावस्था निष्ठावस्थेत्य् उच्यते ॥ (११।०)

व्यक्तादिविशेषणाभिधानाद्यूहादिशक्तिमतां विशेषप्रतिपत्तिर् भविष्यतीत्य् अभिप्रायवतात्रावस्थाग्रहणं न कृतम् इति ॥ (१२।०)

चशब्दो न्यूनाधिकव्यवच्छेदसूचकः ॥ (१३।०)

प्रेतोन्मत्तमूढावस्थान्तरसद्भावाद् अधिकव्यवच्छेदानुपपत्तिर् इति चेन् न गोपननियमेनाव्यक्तावस्थायाम् एवान्तर्भावात् ॥ (१४।०)

जयच्छेदावस्थयोर् अप्य् अव्यक्तावस्थात्वप्रसङ्ग इति चेन् नानयोर् गोपननियमानभ्युपगमान् निष्ठावस्थाम् अनभ्युपगम्य सिद्धावस्थां पञ्चमीम् आहुः ॥ (१५।०)

केचित् तन्मतम् अवधारणेनैव निराचष्टे ॥ (१६।०)

निष्ठा चैवेह पञ्चमी इति ॥ (१७।०)

इहेत्य् अस्मिन् पञ्चार्थदर्शने निष्ठावस्थैव पञ्चमी सूत्रप्रामाण्यात् प्रतीयते न सिद्धावस्था ॥ (१८।०)

तत्र क्षपणीयप्रापणीयाभावात् साधकावस्थाश् चेह निरूप्यन्ते न ततो ऽन्यस्येति ॥ (१९।०)

अत्राह ॥ (२०।०)

अनधिकारिणो ऽवस्थाप्राप्तिर् अयुक्ता ॥ (२१।०)

तत्र तथा द्वितीयाद्यवस्थाप्राप्तौ ज्ञानाकलुषत्वादयो ऽधिकारित्वापादकाः तथा प्रथमावस्थाप्राप्तौ को हेतुर् इत्य् उच्यते ॥ (२२।०)

अत्रापि कारणविशेषोत्पादिता दीक्षा हेतुः ॥ (२३।०)

यतस् तत्कारणप्रतिपादनार्थम् इदम् आह ॥ (२४।१)