घेरण्ड उवाच । (१।१)

स्थूलं ज्योतिस् तथा सूक्ष्मं ध्यानस्य त्रिविधं विदुः । (१।२)

स्थूलं मूर्तिमयं प्रोक्तं ज्योतिस् तेजोमयं तथा । (१।३)

सूक्ष्मं बिन्दुमयं ब्रह्म कुण्डली परदेवता ॥ (१।४)

स्वकीयहृदये ध्यायेत् सुधासागरम् उत्तमम् । (२।१)

तन्मध्ये रत्नद्वीपं तु सुरत्नवालुकामयम् ॥ (२।२)

चतुर्दिक्षु नीपतरुं बहुपुष्पसमन्वितम् । (३।१)

नीपोपवनसंकुलैर् वेष्टितं परिता इव ॥ (३।२)

मालतीमल्लिकाजातीकेसरैश् चम्पकैस् तथा । (४।१)

पारिजातैः स्थलपद्मैर् गन्धामोदितदिङ्मुखैः ॥ (४।२)

तन्मध्ये संस्मरेद् योगी कल्पवृक्षं मनोरमम् । (५।१)

चतुःशाखाचतुर्वेदं नित्यपुष्पफलान्वितम् ॥ (५।२)

भ्रमराः कोकिलास् तत्र गुञ्जन्ति निगदन्ति च । (६।१)

ध्यायेत् तत्र स्थिरो भूत्वा महामाणिक्यमण्डपम् ॥ (६।२)

तन्मध्ये तु स्मरेद् योगी पर्यङ्कं सुमनोहरम् । (७।१)

तत्रेष्टदेवतां ध्यायेद् यद् ध्यानं गुरुभाषितम् ॥ (७।२)

यस्य देवस्य यद् रूपं यथा भूषणवाहनम् । (८।१)

तद् रूपं ध्यायते नित्यं स्थूलध्यानम् इदं विदुः ॥ (८।२)

सहस्रारमहापद्मे कर्णिकायां विचिन्तयेत् । (९।१)

विलग्नसहितं पद्मं द्वादशैर् दलसंयुतम् ॥ (९।२)

शुभ्रवर्णं महातेजो द्वादशैर् बीजभाषितम् । (१०।१)

सहक्षमवलरियुं हंसशक्तिं यथाक्रमम् ॥ (१०।२)

तन्मध्ये कर्णिकायां तु अकथादिरेखात्रयम् । (११।१)

हलक्षकोणसंयुक्तं प्रणवं तत्र वर्तते ॥ (११।२)

नादबिन्दुमयं पीठं ध्यायेत् तत्र मनोहरम् । (१२।१)

तत्रोपरि हंसयुग्मं पादुका तत्र वर्तते ॥ (१२।२)

ध्यायेत् तत्र गुरुं देवं विभुजं च त्रिलोचनम् । (१३।१)

श्वेताम्बरधरं देवं शुक्लगन्धानुलेपनम् ॥ (१३।२)

शुक्लपुष्पमयं माल्यं रक्तशक्तिसमन्वितम् । (१४।१)

एवंविधगुरुध्यानात् स्थूलध्यानं प्रसिध्यति ॥ (१४।२)

कथितं स्थूलध्यानं तु तेजोध्यानं शृणुष्व मे । (१५।१)

यद् ध्यानेन योगसिद्धिर् आत्मप्रत्यक्षम् एव च । (१५।२)

मूलाधारे कुण्डलिनी भुजगाकाररूपिणी ॥ (१५।३)

जीवात्मा तिष्ठति तत्र प्रदीपकलिकाकृतिः । (१६।१)

ध्यायेत् तेजोमयं ब्रह्म तेजोध्यानं तद् एव हि ॥ (१६।२)

नाभिमूले स्थितं सूर्य [॥। औ६ ज़ेइछेन्झ्] । (१७।१)

ध्यायेत् तेजो महद् व्याप्तं तेजोध्यानं तद् एव हि ॥ (१७।२)

भ्रुवोर् मध्ये मनोर्ध्वे च यत् तेजः प्रणवात्मकम् । (१८।१)

ध्यायेज् ज्वालावलीयुक्तं तेजोध्यानं तद् एव हि ॥ (१८।२)

तेजोध्यानं श्रुतं चण्ड सूक्ष्मध्यानं वदाम्य् अहम् । (१९।१)

बहुभाग्यवशाद् यस्य कुण्डली जाग्रती भवेत् ॥ (१९।२)

आत्मना सह योगेन नेत्ररन्ध्राद् विनिर्गता । (२०।१)

विहरेद् राजमार्गे च चञ्चलत्वान् न दृश्यते ॥ (२०।२)

शाम्भवीमुद्रया योगी ध्यानयोगेन सिध्यति । (२१।१)

सूक्ष्मध्यानम् इदं गोप्यं देवानाम् अपि दुर्लभम् ॥ (२१।२)

स्थूलध्यानाच् छतगुणं तेजोध्यानं प्रचक्षते । (२२।१)

तेजोध्यानाल् लक्षगुणं सूक्ष्मध्यानं परात्परम् ॥ (२२।२)

इति ते कथितं चण्ड ध्यानयोगं सुदुर्लभम् । (२३।१)

आत्मा साक्षाद् भवेद् यस्मात् तस्माद् ध्यानं विशिष्यते ॥ (२३।२)