घेरण्ड उवाच । (१।१)

समाधिश्च परं तत्त्वं बहुभाग्येन लभ्यते । (१।२)

गुरोः कृपाप्रसादेन प्राप्यते गुरुभक्तितः ॥ (१।३)

विद्याप्रतीतिः स्वगुरुप्रतीतिर् आत्मप्रतीतिर् मनसः प्रबोधः । (२।१)

दिने दिने यस्य भवेत् स योगी सुशोभनाभ्यासम् उपैति सद्यः ॥ (२।२)

घटाद् भिन्नं मनः कृत्वा ऐक्यं कुर्यात् परात्मनि । (३।१)

समाधिं तं विजानीयान् मुक्तसंज्ञो दशादिभिः ॥ (३।२)

अहं ब्रह्म न चान्यो ऽस्मि ब्रह्मैवाहं न शोकभाक् । (४।१)

सच्चिदानन्दरूपो ऽहं नित्यमुक्तः स्वभाववान् ॥ (४।२)

शाम्भव्या चैव खेचर्या भ्रामर्या योनिमुद्रया । (५।१)

ध्यानं नादं रसानन्दं लयसिद्धिश् चतुर्विधा ॥ (५।२)

पञ्चधा भक्तियोगेन मनोमूर्छा च षड्विधा । (६।१)

षड्विधो ऽयं राजयोगः प्रत्येकम् अवधारयेत् ॥ (६।२)

शाम्भवीं मुद्रिकां कृत्वा आत्मप्रत्यक्षम् आनयेत् । (७।१)

बिन्दुब्रह्ममयं दृष्ट्वा मनस् तत्र नियोजयेत् ॥ (७।२)

खमध्ये कुरु चात्मानम् आत्ममध्ये च खं कुरु । (८।१)

आत्मानं खमयं दृष्ट्वा न किंचिद् अपि बाध्यते । (८।२)

सदानन्दमयो भूत्वा समाधिस्थो भवेन् नरः ॥ (८।३)

खेचरीमुद्रासाधनाद् रसना ऊर्ध्वगता यदा । (९।१)

तदा समाधिसिद्धिः स्याद्धित्वा साधारणक्रियाम् ॥ (९।२)

अनिलं मन्दवेगेन भ्रामरीकुम्भकं चरेत् । (१०।१)

मन्दं मन्दं रेचयेद् वायुं भृङ्गनादं ततो भवेत् ॥ (१०।२)

अन्तःस्थं भ्रमरीनादं श्रुत्वा तत्र मनो नयेत् । (११।१)

समाधिर् जायते तत्र आनन्दः सो ऽहम् इत्य् अतः ॥ (११।२)

योनिमुद्रां समासाद्य स्वयं शक्तिमयो भवेत् । (१२।१)

सुशृङ्गाररसेनैव विहरेत् परमात्मनि ॥ (१२।२)

आनन्दमयः सम्भूत्वा ऐक्यं ब्रह्मणि सम्भवेत् । (१३।१)

अहं ब्रह्मेति चाद्वैतं समाधिस् तेन जायते ॥ (१३।२)

स्वकीयहृदये ध्यायेद् इष्टदेवस्वरूपकम् । (१४।१)

चिन्तयेद् भक्तियोगेन परमाह्लादपूर्वकम् ॥ (१४।२)

आनन्दाश्रुपुलकेन दशाभावः प्रजायते । (१५।१)

समाधिः सम्भवेत् तेन सम्भवेच् च मनोन्मनी ॥ (१५।२)

मनोमूर्छां समासाद्य मन आत्मनि योजयेत् । (१६।१)

परात्मनः समायोगात् समाधिं समवाप्नुयात् ॥ (१६।२)

इति ते कथितं चण्ड समाधिर् मुक्तिलक्षणम् । (१७।१)

राजयोगः समाधिः स्याद् एकात्मन्य् एव साधनम् । (१७।२)

उन्मनी सहजावस्था सर्वे चैकात्मवाचकाः ॥ (१७।३)

जले विष्णुः स्थले विष्णुर् विष्णुः पर्वतमस्तके । (१८।१)

ज्वालामालाकुले विष्णुः सर्वं विष्णुमयं जगत् ॥ (१८।२)

भूचराः खेचराश् चामी यावन्तो जीवजन्तवः । (१९।१)

वृक्षगुल्मलतावल्लीतृणाद्या वारि पर्वताः । (१९।२)

सर्वं ब्रह्म विजानीयात् सर्वं पश्यति चात्मनि ॥ (१९।३)

आत्मा घटस्थचैतन्यम् अद्वैतं शाश्वतं परम् । (२०।१)

घटाद् भिन्नतरं ज्ञानं वीतरागं विवासनम् ॥ (२०।२)

एवंविधिः समाधिः स्यात् सर्वसंकल्पवर्जितः । (२१।१)

स्वदेहे पुत्रदारादिबान्धवेषु धनादिषु । (२१।२)

सर्वेषु निर्ममो भूत्वा समाधिं समवाप्नुयात् ॥ (२१।३)

लयामृतं परं तत्त्वं शिवोक्तं विविधानि च । (२२।१)

तेषां संक्षेपम् आदाय कथितं मुक्तिलक्षणम् ॥ (२२।२)