ब्रह्मचारी वेदम् अधीत्योपन्याहृत्य गुरवे ऽनुज्ञातो दारान् कुर्वीत ॥ (१।१)

आप्लवनं च ॥ (२।१)

तयोर् आप्लवनं पूर्वम् ॥ (३।१)

मन्त्राभिवादात् तु पाणिग्रहणस्य पूर्वं व्याख्यातम् ॥ (४।१)

ब्राह्मणस् सहोदकुम्भः प्रावृतो वाग्यतो ऽग्रेणाग्निं गत्वोदङ्मुखस् तिष्ठेत् ॥ (५।१)

स्नाताम् अहतेनाच्छाद्य या अकृन्तन्न् इत्य् आनीयमानायां पाणिग्राहो जपेत् सोमो ऽददद् इति ॥ (६।१)

पाणिग्राहस्य दक्षिणत उपवेशयेत् ॥ (७।१)

अन्वारब्धायां स्रुवेणोपघातं महाव्याहृतिभिर् आज्यं जुहुयात् ॥ (८।१)

समस्ताभिश् चतुर्थीम् ॥ (९।१)

एवं चौलोपनयनगोदानेषु ॥ (१०।१)

अग्निर् एतु प्रथम इति षड्भिश् च पाणिग्रहणे ॥ (११।१)

नाज्यभागौ न स्विष्टकृदाज्याहुतिष्व् अनादेशे ॥ (१२।१)

सर्वत्रोपरिष्टान् महाव्याहृतिभिः ॥ (१३।१)

प्राजापत्यया च ॥ (१४।१)

प्रायश्चित्तं जुहुयात् ॥ (१५।१)

हुत्वोपोत्तिष्ठतः ॥ (१६।१)

अनुपृष्ठं गत्वा दक्षिणतो ऽवस्थाय वध्वञ्जलिं गृह्णीयात् ॥ (१७।१)

पूर्वा माता शमीपलाशमिश्राल् लाजाञ् छूर्पे कृत्वा ॥ (१८।१)

पश्चाद् अग्नेर् दृषत्पुत्रम् आक्रमयेद् वधूं दक्षिणेन ॥ (१९।१)

सकृद् गृहीतम् अञ्जलिं लाजानां वध्वञ्जलाव् आवपेद् भ्राता प्रपदेनेमम् अश्मानम् इति ॥ (२०।१)

सुहृद् वा कश्चित् ॥ (२१।१)

तं साग्नौ जुहुयाद् अविच्छिद्याञ्जलिं इयं नारीति ॥ (२२।१)

अर्यमणं पूषणम् इत्य् उत्तरयोः ॥ (२३।१)

हुते तेनैव गत्वा प्रदक्षिणम् अग्निं परिणयेत् कन्यला पितृभ्य इति ॥ (२४।१)

अवस्थानप्रभृत्य् एवं त्रिः ॥ (२५।१)

शूर्पेण शिष्टान् अग्नाव् ओप्य प्रागुदीचीम् उत्क्रमयेत् एकम् इष इति ॥ (२६।१)

ईक्षकावेक्षणरथारोहणदुर्गानुमन्त्रणान्यभिरूपाभिः ॥ (२७।१)

अपरेणाग्निम् औदको गत्वा पाणिग्राहं मूर्धन्य् अवसिञ्चेत् ॥ (२८।१)

वधूं च ॥ (२९।१)

समञ्जन्त्व् इत्य् अवसिक्तः ॥ (३०।१)

दक्षिणं पाणिं साङ्गुष्ठं गृह्णीयात् गृभ्णामि त इति षड्भिः ॥ (३१।१)