पौर्णमासोपक्रमौ दर्शपूर्णमासौ ॥ (१।०)

दार्शं चेत्पूर्वमुपपद्येत पौर्णमासेनेष्ट्वाथ तत्कुर्यात् ॥ (२।०)

अकुर्वन् पौर्णमासीमाकाङ्क्षेदित्येके ॥ (३।०)

अपराह्णे स्नात्वौपवसथिकं दम्पती भुञ्जीयाताम् ॥ (४।०)

मानतन्तव्य उवाच श्रेयसीं प्रजां विन्दते काम्यो भवत्यक्षोधुकी क्षोधुको य औपवसथिकं भुङ्क्ते ॥ (५।०)

तस्माद्यत्कामयेत तद्भुञ्जीत ॥ (६।०)

नाव्रत्यमाचरेत् ॥ (७।०)

प्रातराहुतिं हुत्वा ॥ (८।०)

हविनिर्निर्वपेदमुष्मै त्वा जुष्टं निर्वपामीति देवताश्रयं सकृद्यजुर्वा द्विस्तूष्णीम् ॥ (९।०)

त्रिर्देवेभ्यः प्रक्षालयेत् ॥ (१०।०)

द्विर्मनुष्येभ्यः ॥ (११।०)

सकृत्पितृभ्यः ॥ (१२।०)

मेक्षणेन प्रदक्षिणम् उदायुवं श्रपयेत् ॥ (१३।०)

शृतमभिघार्योदगुद्वास्य प्रत्यभिघारयेत् ॥ (१४।०)

सर्वाण्येवं हवींषि ॥ (१५।०)

आज्यभागौ जुहुयाच्चतुर्गृहीतमाज्यं गृहीत्वा पञ्चावत्तं भृगूणां जामदग्न्यानामग्नये स्वाहेत्युत्तरतः सोमायेति दक्षिणतः ॥ (१७।०)

विपरीतमितरे ॥ (१८।०)

आज्यमुपस्तीर्य हविषो ऽवद्येन्मेक्षणेन मध्यात्पुरस्तादिति ॥ (१९।०)

पश्चाच्च पञ्चावत्ती ॥ (२०।०)

अभिघार्य प्रत्यनक्त्यवदानस्थानानि ॥ (२१।०)

न स्विष्टकृतः ॥ (२२।०)

अमुष्मै स्वाहेति जुहुयाद्यद्देवत्यं स्यात् ॥ (२३।०)

स्विष्टकृतः सकृद् उपस्तीर्य द्विर्भृगूणां सकृद्धविषो द्विरभिघार्याग्नये स्विष्टकृते स्वाहेति प्रागुदीच्यां जुहुयात् ॥ (२४।०)

समिधमाधाय ॥ (२५।०)

दर्भानाज्ये हविषि वा त्रिरवधायाग्रमध्यमूलान्यक्तं रिहाणा वियन्तु वय इत्यभ्युक्ष्याग्नावनुमहरेद् यः पशूनामधिपती रुद्रस्तन्तिचरो वृषा पशूनस्माकं मा हिंसीरेतदस्तु हुतं तव स्वाहेति ॥ (२६।०)

तद्यज्ञवास्तु ॥ (२७।०)

सर्वत्र कुर्यात् ॥ (२८।०)

हविरुच्छिष्टमुदगुद्वास्य ब्रह्मणे दद्यात् ॥ (२९।०)

पूर्णपात्रं दक्षिणा ॥ (३०।०)

यथोत्साहं वा ॥ (३१।०)