प्रागुदीचीम् उद्वहेत् ॥ (१।१)

ब्राह्मणकुले ऽग्निम् उपसमाधाय पश्चाद् अग्नेर् लोहितं चर्मानडुहम् उत्तरलोम प्राग्ग्रीवम् आस्तीर्य वाग्यताम् उपवेशयेत् ॥ (२।१)

प्रोक्ते नक्षत्रे ऽन्वारब्धायां स्रुवेणोपघातं जुहुयात् षड्भिर् लेखाप्रभृतिभिस् सम्पातान् अवनयन् मूर्धनि वध्वाः ॥ (३।१)

प्रदक्षिणम् अग्निं परिक्रम्य ध्रुवं दर्शयति ध्रुवाद्यौर् इति ॥ (४।१)

अभिवाद्य गुरून् गोत्रेण विसृजेद् वाचम् ॥ (५।१)

गौर् दक्षिणा ॥ (६।१)

अत्रार्घ्यम् ॥ (७।१)

आगतेष्व् इत्य् एके ॥ (८।१)

त्रिरात्रं क्षारलवणे दुग्धम् इति वर्जयन्तौ सह शयीयातां ब्रह्मचारिणौ ॥ (९।१)

हविष्यम् अन्नं परिजप्यान्नपाशेनेत्य् असाव् इति वध्वा नाम ब्रूयात् ॥ (१०।१)

भुक्त्वोच्छिष्टं वध्वै दद्यात् ॥ (११।१)

ऊर्ध्वं त्रिरात्राच् चतसृभिर् आज्यं जुहुयात् अग्ने प्रायश्चित्तिर् इति समस्य पञ्चमीं सम्पातान् अवनयन्न् उदपात्रे ॥ (१२।१)

तेनैनां सकेशनखाम् आप्लावयेत् ॥ (१३।१)

ततो यथार्थं स्यात् ॥ (१४।१)

ऋतुकाले दक्षिणेन पाणिनोपस्थम् आलभेद् विष्णुर् योनिं कल्पयत्व् इति समाप्तायाम् ॥ (१५।१)

सम्भवेद् गर्भं धेहीति ॥ (१६।१)