आग्नेयस्थालीपाको ऽनाहिताग्नेर् दर्शपूर्णमासयोः ॥ (१।०)

अग्नीषोमीयः पौर्णमास्याम् आहिताग्नेः ॥ (२।०)

ऐन्द्रो माहेन्द्रो वैन्द्राग्नो वामावास्यायाम् ॥ (३।०)

यथा वानाहिताग्नेः ॥ (४।०)

सर्वमहः प्रातराहुतेः स्थानम् ॥ (५।०)

रात्रिः सायम् आहुतेः ॥ (६।०)

सर्वो ऽपरपक्षः पौर्णमासस्य ॥ (७।०)

पूर्वपक्षो दार्शस्य ॥ (८।०)

अभोजनेन संतनुयादित्येके ॥ (९।०)

अविद्यमाने हव्ये यज्ञियानां फलानि जुहुयात् ॥ (१०।०)

पलाशानि वा ॥ (११।०)

अपो वा ॥ (१२।०)

हुतं हि ॥ (१३।०)

प्रायश्चित्तमहुतस्य ॥ (१४।०)

आज्यं जुहुयाद्धविषो ऽनादेशे ॥ (१५।०)

देवता मन्त्रानादेशे ॥ (१६।०)

प्रथमगर्भे तृतीये मासि पुंसवनम् ॥ (१७।०)

स्नाताम् अहतेनाच्छाद्य हुत्वा पतिः पृष्ठतस्तिष्ठेत् ॥ (१८।०)

दक्षिणम् अंसम् अन्ववमृश्यानन्तर्हितं नाभिदेशम् अभिमृशेत् पुमांसाविति ॥ (१९।०)

अथापरं न्यग्रोधशुङ्गाम् उभयतःफलाम् अस्रामाम् अक्रिमिपरिसृप्तां त्रिःसप्तैर् यवैः परिक्रीयोत्थापयेन्माषैर्वा सर्वत्रौषधयः सुमनसो भूत्वा ऽस्यां वीर्यं समाधत्तेयं कर्म करिष्यतीति ॥ (२०।०)

आहृत्य वैहायसीं कुर्यात् ॥ (२१।०)

कुमारी ब्रह्मचारी व्रतवती वा ब्राह्मणी पेषयेदप्रत्याहरन्ती ॥ (२२।०)

स्नातां संवेश्य दक्षिणे नासिकास्रोतस्यासिञ्चेत् पुमानग्निरिति ॥ (२३।०)

अथास्याश्चतुर्थे मासि षष्ठे वा सीमन्तोन्नयनम् ॥ (२४।०)

स्नातामहतेनाच्छाद्य हुत्वा पतिः पृष्ठतस्तिष्ठन्ननुपूर्वया फलवृक्षशाखया सकृत्सीमन्तमुन्नयेत् त्रिश्वेतया च शलल्या ऽयमूर्जावतो वृक्ष इति ॥ (२५।०)

कृसरः स्थालीपाकः ॥ (२६।०)

उत्तरघृतमवेक्षन्तीं पृच्छेत किं पश्यसीति ॥ (२७।०)

प्रजामिति वाचयेत् ॥ (२८।०)

प्रतिष्ठिते वस्तौ सोष्यन्तीहोमः ॥ (२९।०)

या तिरश्चीति द्वाभ्याम् ॥ (३०।०)

असाविति नाम दध्यात् ॥ (३१।०)

तद्गुह्यम् ॥ (३२।०)

प्राङ्नाभिकृन्तनात् स्तनदानाच्च व्रीहियवौ पेषयेच्छुङ्गावृता ॥ (३३।०)

अङ्गुष्ठेनानामिकया चादाय कुमारं प्राशयेदियमाज्ञेति ॥ (३४।०)

सर्पिश्च मेधां त इति ॥ (३५।०)