श्रीनारद उवाच । (१।१)

कथितं मे त्वया देव हरिनामानुकीर्तनम् । (१।२)

पापापहं महासौख्यं भगवद्भक्तिकारणम् ॥ (१।३)

तत्राहं यानि नामानि कीर्तयामि सुरोत्तम । (२।१)

तान्य् अहं ज्ञातुम् इच्छामि साकल्येन कुतूहलात् ॥ (२।२)

श्रीशिव उवाच । (३।१)

भूम्यम्बुतेजसां ये वै परमाणून् अपि द्विज । (३।२)

शक्यन्ते गणितुं भूयो जन्मभिर् न हरेर् गुणान् ॥ (३।३)

तथापि मुख्यं वक्ष्यामि श्रीविष्णोः परमाद्भुतम् । (४।१)

नाम्नां सहस्रं पार्वत्यै यदि होक्तं कृपालुना ॥ (४।२)

समाधिनिष्ठं मां दृष्ट्वा पार्वती वरवर्णिनी । (५।१)

अपृच्छत् परमं देवं भगवन्तं जगद्गुरुम् ॥ (५।२)

तदा तस्यै मया प्रोक्तो मत्परो जगदीश्वरः । (६।१)

नाम्नां सहस्रं च तथा गुणकर्मानुसारतः ॥ (६।२)

तद् अहं ते ऽभिवक्ष्यामि महाभागवतो भवान् । (७।१)

यस्यैकस्मरणेनैव पुमान् सिद्धिम् अवाप्नुयात् ॥ (७।२)

उद्यन्नवीनजलदाभम् अकुण्ठधिष्ण्यं विद्योतितानलमनोहरपीतवासम् । (८।१)

भास्वन्मयूखमुकुटाङ्गदहारयुक्तं काञ्चीकलापवलयाङ्गुलिभिर् विभातम् ॥ (८।२)

ब्रह्मादिदेवगणवन्दितपादपद्यं श्रीसेवितं सकलसुन्दरसंनिवेशम् । (९।१)

गोगोपवनितामुनिवृन्दजुष्टं कृष्णं पुराणपुरुषं मनसा स्मरामि ॥ (९।२)

ॐ नमो वासुदेवाय कृष्णाय परमात्मने । (१०।१)

प्रणतक्लेशसंहर्त्रे परमानन्ददायिने ॥ (१०।२)

ॐ श्रीकृष्णः श्रीपतिः श्रीमान् श्रीधरः श्रीसुखाश्रयः । (११।१)

श्रीदाता श्रीकरः श्रीशः श्रीसेव्यः श्रीविभावनः ॥ (११।२)

परमात्मा परं ब्रह्म परेशः परमेश्वरः । (१२।१)

परानन्दः परं धाम परमानन्ददायकः ॥ (१२।२)

निरालम्बो निर्विकारो निर्लेपो निरवग्रहः । (१३।१)

नित्यानन्दो नित्यमुक्तो निरीहो निस्पृहप्रियः ॥ (१३।२)

प्रियंवदः प्रियकरः प्रियदः प्रियसंजनः । (१४।१)

प्रियानुगः प्रियालम्बी प्रियकीर्तिः प्रियात् प्रियः ॥ (१४।२)

महात्यागी महाभोगी महायोगी महातपाः । (१५।१)

महात्मा महतां श्रेष्ठो महालोकपतिर् महान् ॥ (१५।२)

सिद्धार्थः सिद्धसंकल्पः सिद्धिदः सिद्धसाधनः । (१६।१)

सिद्धेशः सिद्धमार्गाग्रः सिद्धलोकैकपालकः ॥ (१६।२)

इष्टो विशिष्टः शिष्टेष्टो महिष्ठो जिष्णुर् उत्तमः । (१७।१)

ज्येष्ठः श्रेष्ठश् च सर्वेष्टो विष्णुर् भ्राजिष्णुर् अव्ययः ॥ (१७।२)

विभुः शम्भुः प्रभुर् भूमा स्वभूः स्वानन्दमूर्तिमान् । (१८।१)

प्रीतिमान् प्रीतिदाता च प्रीतिदः प्रीतिवर्धनः ॥ (१८।२)

योगेश्वरो योगगम्यो योगीशो योगपारगः । (१९।१)

योगदाता योगपतिर् योगसिद्धिविधायकः ॥ (१९।२)

सत्यव्रतः सत्यपरः त्रिसत्यः सत्यकारणः । (२०।१)

सत्याश्रयः सत्यहरः सत्पालिः सत्यवर्धनः ॥ (२०।२)

सर्वानन्दः सर्वहरः सर्वगः सर्ववश्यकृत् । (२१।१)

सर्वपाता सर्वसुखः सर्वश्रुतिगणार्णवः ॥ (२१।२)

जनार्दनो जगन्नाथो जगत्त्राता जगत्पिता । (२२।१)

जगत्कर्ता जगद्धर्ता जगदानन्दमूर्तिमान् ॥ (२२।२)

धरापतिर् लोकपतिः स्वर्पतिर् जगतांपतिः । (२३।१)

विद्यापतिर् वित्तपतिः सत्पतिः कमलापतिः ॥ (२३।२)

चतुरात्मा चतुर्बाहुश् चतुर्वर्गफलप्रदः । (२४।१)

चतुर्व्यूहश् चतुर्धामा चतुर्युगविधायकः ॥ (२४।२)

आदिदेवो देवदेवो देवेशो देवधारणः । (२५।१)

देवकृद् देवभृद् देवो देवेडितपदाम्बुजः ॥ (२५।२)

विश्वेश्वरो विश्वरूपी विश्वात्मा विश्वतोमुखः । (२६।१)

विश्वसूर् विश्वफलदो विश्वगो विश्वनायकः ॥ (२६।२)

भूतकृद् भूतभृद् भावो भूतात्मा भूतभावनः । (२७।१)

भूतिदो भूतिविस्तारो विभूतिर् भूतिपालकः ॥ (२७।२)

नारायणो नारशायी नारसूर् नारजीवनः । (२८।१)

नारैकफलदो नारमुक्तिदो नारनायकः ॥ (२८।२)

सहस्ररूपः साहस्रनामा साहस्रविग्रहः । (२९।१)

सहस्रशीर्षा साहस्रपादाक्षिभुजशीर्षवान् ॥ (२९।२)

पद्मनाभः पद्मगर्भः पद्मी पद्मनिभेक्षणः । (३०।१)

पद्मशायी पद्ममाली पद्माङ्कितपदद्वयः ॥ (३०।२)

वीर्यवान् स्थैर्यवान् वाग्मी शौर्यवान् धैर्यवान् क्षमी । (३१।१)

धीमान् धर्मपरो भोगी भगवान् भयनाशनः ॥ (३१।२)

जयन्तो विजयो जेता जयदो जयवर्धनः । (३२।१)

अमानो मानदो मान्यो महिमावान् महाबलः ॥ (३२।२)

संतुष्टस् तोषदो दाता दमनो दीनवत्सलः । (३३।१)

ज्ञानी यशस्वान् धृतिमान् सहओजोबलाश्रयः ॥ (३३।२)

हयग्रीवो महातेजा महार्णवविनोदकृत् । (३४।१)

मधुकैटभविध्वंसी वेदकृद् वेदपालकः ॥ (३४।२)

सनत्कुमारः सनकः सनन्दश् च सनातनः । (३५।१)

अखण्डब्रह्मव्रतवान् आत्मा योगविवेचकः ॥ (३५।२)

श्रीनारदो देवऋषिः कर्माकर्मप्रवर्तकः । (३६।१)

सात्वतागमकृल्लोकहिताहितप्रसूचकः ॥ (३६।२)

आदिकालो यज्ञतत्त्वं धातृनासापुटोद्भवः । (३७।१)

दन्ताग्रन्यस्तभूगोलो हिरण्याक्षबलान्तकः ॥ (३७।२)

पृथ्वीपतिः शीघ्रवेगो रोमान्तर्गतसागरः । (३८।१)

श्वासावधूतहेमाद्रिः प्रजापतिपतिस्तुतः ॥ (३८।२)

अनन्तो धरणीभर्ता पातालतलवासकृत् । (३९।१)

कामाग्निजवनो नागराजराजो महाद्युतिः ॥ (३९।२)

महाकूर्मो विश्वकायः शेषभृक् सर्वपालकः । (४०।१)

लोकपितृगणाधीशः पितृस्तुतमहापदः ॥ (४०।२)

कृपामयः स्वयं व्यक्तिर् ध्रुवप्रीतिविवर्धनः । (४१।१)

ध्रुवस्तुतपदो विष्णुलोकदो लोकपूजितः ॥ (४१।२)

शुक्लः कर्दमसंतप्तस् तपस्तोषितमानसः । (४२।१)

मनोऽभीष्टप्रदो हर्षबिन्द्वञ्चितसरोवरः ॥ (४२।२)

यज्ञः सुरगणाधीशो दैत्यदानवघातकः । (४३।१)

मनुत्राता लोकपालो लोकपालकजन्मकृत् ॥ (४३।२)

कपिलाख्यः सांख्यपाता कर्दमाङ्गसमुद्भवः । (४४।१)

सर्वसिद्धगणाधीशो देवहूतिगतिप्रदः ॥ (४४।२)

दत्तो ऽत्रितनयो योगी योगमार्गप्रदर्शकः । (४५।१)

अनसूयानन्दकरः सर्वयोगिजनस्तुतः ॥ (४५।२)

नारायणो नरऋषिर् धर्मपुत्रो महामनाः । (४६।१)

महेशशूलदमनो महेशैकवरप्रदः ॥ (४६।२)

आकल्पान्ततपोधीरो मन्मथादिमदापहः । (४७।१)

ऊर्वशीसृग्जितानङ्गो मार्कण्डेयप्रियप्रदः ॥ (४७।२)

ऋभवो नाभिसुखदो मेरुदेवीप्रियात्मजः । (४८।१)

योगिराजद्विजस्रष्टा योगचर्याप्रदर्शकः ॥ (४८।२)

प्रियव्रतकुलोत्पन्नो गयनामा महायशाः । (५०।१)

हंसरूपी तत्त्ववक्ता गुणागुणविवेचकः । (५१।१)

धातृलज्जाप्रशमनो ब्रह्मचारिजनप्रियः ॥ (५१।२)

वैश्यः पृथुः पृथ्विदोग्धा सर्वजीवनदोहकृत् । (५२।१)

आदिराजो जनावासकारको भूसमीकरः ॥ (५२।२)

प्रचेतोऽभिष्टुतपदः शान्तमूर्तिः सुदर्शनः । (५३।१)

दिवारात्रिगणाधीशः केतुमान् अजनाश्रयः ॥ (५३।२)

श्रीकामदेवः कमलाकामकेलिविनोदकृत् । (५४।१)

स्वपादरतिदो ऽभीष्टसुखदो दुःखनाशनः ॥ (५४।२)

विभुर् धर्मभृतां श्रेष्ठो वेदशीर्षो द्विजात्मजः । (५५।१)

अष्टाशीतिसहस्राणां मुनीनाम् उपदेशदः ॥ (५५।२)

सत्यसेनो यक्षरक्षोदहनो दीनपालकः । (५६।१)

इन्द्रमित्रः सुरारिघ्नः सूनृताधर्मनन्दनः ॥ (५६।२)

हरिर् गजवरत्राता ग्राहपाशविनाशकः । (५७।१)

त्रिकूटाद्रिवनश्लाघी सर्वलोकहितैषणः ॥ (५७।२)

वैकुण्ठशुभ्रासुखदो विकुण्ठासुन्दरीसुतः । (५८।१)

रमाप्रियकरः श्रीमान् निजलोकप्रदर्शकः ॥ (५८।२)

विप्रशापपरीखिन्ननिर्जरार्तिनिवारणः । (५९।१)

दुग्धाब्धिमथनो विप्रो विराजतनयो ऽजितः ॥ (५९।२)

मन्दाराद्रिधरः कूर्मो देवदानवशर्मकृत् । (६०।१)

जम्बूद्वीपसमः स्रष्टा पीयूषोत्पत्तिकारणम् ॥ (६०।२)

धन्वन्तरी रुक्शमनो ऽमृतधुक् रुक्प्रशान्तकः । (६१।१)

आयुर्वेदकरो वैद्यराजो विद्याप्रदायकः ॥ (६१।२)

देवाभयकरो दैत्यमोहिनी कामरूपिणी । (६२।१)

गीर्वाणामृतपो दुष्टदैत्यदानववञ्चकः ॥ (६२।२)

महामत्स्यो महाकायः शल्कान्तर्गतसागरः । (६३।१)

वेदारिदैत्यदमनो व्रीहिबीजसुरक्षकः ॥ (६३।२)

पुच्छाघातभ्रमत्सिन्धुः सत्यव्रतप्रियप्रदः । (६४।१)

भक्तसत्यव्रतत्राता योगत्रयप्रदर्शकः ॥ (६४।२)

नरसिंहो लोकजिह्वः शङ्कुकर्णो नखायुधः । (६५।१)

सटावधूतजलदो दन्तद्युतिजितप्रभः ॥ (६५।२)

हिरण्यकशिपुध्वंसी बहुदानवदर्पहा । (६६।१)

प्रवदस्तुतपादाब्जो भक्तसंसारतापहा ॥ (६६।२)

ब्रह्मेन्द्ररुद्रभीतिघ्नो देवकार्यप्रसाधकः । (६७।१)

ज्वलज्ज्वलनसंकाशः सर्वभीतिविनाशकः ॥ (६७।२)

महाकलुषविध्वंसी सर्वकामवरप्रदः । (६८।१)

कालविक्रमसंहर्ता ग्रहपीडाविनाशकः ॥ (६८।२)

सर्वव्याधिप्रशमनः प्रचण्डरिपुदण्डकृत् । (६९।१)

उग्रभैरवसंत्रस्तहरार्तिविनिवारकः ॥ (६९।२)

ब्रह्मचर्मावृतशिराः शिवशीर्षैकनूपुरः । (७०।१)

द्वादशादित्यशीर्षैकमणिर् दिक्पालभूषणः ॥ (७०।२)

वामनो ऽदितिभीतिघ्नो द्विजातिगणमण्डनः । (७१।१)

पन्नखक्षतब्रह्माण्डकटाहो ऽमितविक्रमः । (७२।१)

स्वर्धुनीतीर्थजननो ब्रह्मपूज्यो भयापहः ॥ (७२।२)

स्वाङ्घ्रिवारिहताघौघो विश्वरूपैकदर्शनः । (७३।१)

बलिप्रियकरो भक्तस्वर्गदोग्धा गदाधरः ॥ (७३।२)

जामदग्न्यो महावीर्यः पर्शुभृत् कार्तवीर्यजित् । (७४।१)

सहस्रार्जुनसंहर्ता सर्वक्षत्रकुलान्तकः ॥ (७४।२)

निःक्षत्रपृथ्वीकरणो वीरजिद् विप्रराज्यदः । (७५।१)

द्रोणास्त्रवेदप्रवदो महेशगुरुकीर्तिदः ॥ (७५।२)

सूर्यवंशाब्जतरणिः श्रीमद्दशरथात्मजः । (७६।१)

श्रीरामो रामचन्द्रश् च रामभद्रो ऽमितप्रभः ॥ (७६।२)

नीलवर्णप्रतीकाशः कौसल्याप्राणजीवनः । (७७।१)

पद्मनेत्रः पद्मवक्रः पद्माङ्कितपदाम्बुजः ॥ (७७।२)

प्रलम्बबाहुश् चार्वङ्गो रत्नाभरणभूषितः । (७८।१)

दिव्याम्बरो दिव्यधनुर् दिष्टदिव्यास्त्रपारगः ॥ (७८।२)

निस्त्रिंशपाणिवीरेशो ऽपरिमेयपराक्रमः । (७९।१)

विश्वामित्रगुरुर् धन्वी धनुर्वेदविद् उत्तमः ॥ (७९।२)

ऋजुमार्गनिमित्तेषु संघताडितताडकः । (८०।१)

सुबाहुर् बाहुवीर्याढ्यबहुराक्षसघातकः ॥ (८०।२)

प्राप्तचण्डीशदोर्दण्डचण्डकोदण्डखण्डनः । (८१।१)

जनकानन्दजनको जानकीप्रियनायकः ॥ (८१।२)

अरातिकुलदर्पघ्नो ध्वस्तभार्गवविक्रमः । (८२।१)

पितृवाक्सक्तराज्यधीर् वनवासकृतोत्सवः ॥ (८२।२)

विराधराधदमनश् चित्रकूटाद्रिमन्दिरः । (८३।१)

द्विजशापसमुच्छन्नदण्डकारण्यकर्मकृत् ॥ (८३।२)

चतुर्दशसहस्रोग्रराक्षसघ्नः खरान्तकः । (८४।१)

त्रिशिरःप्राणशमनो दुष्टदूषणदूषणः ॥ (८४।२)

छद्ममारीचमथनो जानकीविरहार्तिहृत् । (८५।१)

जटायुषः क्रियाकारी कबन्धवधकोविदः ॥ (८५।२)

ऋष्यमूकगुहावासी कपिपञ्चमसख्यकृत् । (८६।१)

सकण्टकारदुर्भेदसप्ततालप्रभेदकः । (८७।१)

किष्किन्धाधिपवालिघ्नो मित्रसुग्रीवराज्यदः ॥ (८७।२)

आञ्जनेयस्वलाङ्गूलदग्धलङ्कामहोदयः । (८८।१)

सीताविरहविस्पष्टरोषक्षोभितसागरः ॥ (८८।२)

निकुम्भकुम्भधूम्राक्षकुम्भकर्णादिवीरहा ॥ (९०।२)

कैलाससहनोन्मत्तदशाननशिरोहरः । (९१।१)

कपिराक्षसराजाङ्गप्राप्तराज्यनिजाश्रयः । (९२।१)

अयोध्याधिपतिः सर्वराजन्यगणशेखरः ॥ (९२।२)

अचिन्त्यकर्मा नृपतिः प्राप्तसिंहासनोदयः । (९३।१)

दुष्टदुर्बुद्धिदलनो दीनहीनैकपालकः ॥ (९३।२)

सर्वसम्पत्तिजननस् तिर्यङ्न्यायविवेचकः । (९४।१)

दुष्टवाक्क्लिष्टहृदयः सीतानिर्वासकारकः । (९५।१)

तुरंगमेधक्रतुयाट् श्रीमत्कुशलवात्मजः ॥ (९५।२)

सत्यार्थत्यक्तसौमित्रिः सून्नीतजनसंग्रहः । (९६।१)

सत्कर्णपूरसत्कीर्तिः कीर्त्यालोकाघनाशनः ॥ (९६।२)

भरतो ज्येष्ठपादाब्जरतित्यक्तनृपासनः । (९७।१)

सर्वसद्गुणसम्पन्नः कोटिगन्धर्वनाशकः ॥ (९७।२)

लक्ष्मणो ज्येष्ठनिरतो देववैरिगणान्तकः । (९८।१)

इन्द्रजित्प्राणशमनो भ्रातृमान् त्यक्तविग्रहः ॥ (९८।२)

शत्रुघ्नो ऽमित्रशमनो लवणान्तककारकः । (९९।१)

आर्यभ्रातृजनश्लाघ्यः सतां श्लाघ्यगुणाकरः ॥ (९९।२)

वटपत्त्रपुटस्थायी श्रीमुकुन्दो ऽखिलाश्रयः । (१००।१)

तनूदरार्पितजगन्मृकण्डतनयः खगः ॥ (१००।२)

आद्यो देवगणाग्रण्यो मितस्तुतिनतिप्रियः । (१०१।१)

वृत्रघोरतनुत्रस्तदेवसन्मन्त्रसाधकः ॥ (१०१।२)

ब्रह्मण्यो ब्राह्मणश्लाघी ब्रह्मण्यजनवत्सलः । (१०२।१)

गोष्पदाप्सुगलद्गात्रवालखिल्यजनाश्रयः ॥ (१०२।२)

दौस्वस्तिर् यज्वनां श्रेष्ठो नृपविस्मयकारकः । (१०३।१)

तुरंगमेधबहुकृद् वदान्यगणशेखरः ॥ (१०३।२)

वासवीतनयो व्यासो वेदशाखानिरूपकः । (१०४।१)

पुराणभारताचार्यः कलिलोकहितैषणः ॥ (१०४।२)

रोहिणीहृदयानन्दो बलभद्रो बलाश्रयः । (१०५।१)

संकर्षणः सीरपाणिः मुसलास्त्रो ऽमलद्युतिः ॥ (१०५।२)

शङ्खकुन्देन्दुश्वेताङ्गस् तालभिद् धेनुकान्तकः । (१०६।१)

मुष्टिकारिष्टहननो लाङ्गलाकृष्टयामुनः ॥ (१०६।२)

प्रलम्बप्राणहा रुक्मीमथनो द्विविदान्तकः । (१०७।१)

रेवतीप्रीतिदो रामारमणो बल्वलान्तकः ॥ (१०७।२)

हस्तिनापुरसंकर्षी कौरवार्चितसत्पदः । (१०८।१)

ब्रह्मादिस्तुतपादाब्जो देवयादवपालकः ॥ (१०८।२)

मायापतिर् महामायो महामायानिदेशकृत् । (१०९।१)

यदुवंशाब्धिपूर्णेन्दुर् बलदेवप्रियानुजः ॥ (१०९।२)

नराकृतिः परं ब्रह्म परिपूर्णः परोदयः । (११०।१)

सर्वज्ञानादिसम्पूर्णः पूर्णानन्दः पुरातनः ॥ (११०।२)

पीताम्बरः पीतनिद्रः पीतवेश्ममहातपाः । (१११।१)

महोरस्को महाबाहुर् महार्हमणिकुण्डलः ॥ (१११।२)

सुचारुकर्णः सुभ्राजन्मकराकृतिकुण्डलः ॥ (११२।२)

नीलकुञ्चितसुस्निग्धकुन्तलः कौमुदीमुखः । (११३।१)

सुनासः कुन्ददशनो लसत्कोकनदाधरः ॥ (११३।२)

सुमन्दहासो रुचिरभ्रूमण्डलविलोकनः । (११४।१)

कम्बुकण्ठो बृहद्ब्रह्मा वलयाङ्गदभूषणः ॥ (११४।२)

कौस्तुभी वनमाली च शङ्खचक्रगदाब्जभृत् । (११५।१)

श्रीवत्सलक्ष्म्यालक्ष्याङ्गः सर्वलक्षणलक्षणः ॥ (११५।२)

दलोदरो निम्ननाभिर् निरवद्यो निराश्रयः । (११६।१)

समजङ्घाजानुयुग्मः सुचारुरुचिराजितः । (११७।१)

ध्वजवज्राङ्कुशाम्भोजशराङ्कितपदाम्बुजः ॥ (११७।२)

भक्तभ्रमरसंघातपीतपादाम्बुजासवः । (११८।१)

नखचन्द्रमणिज्योत्स्नाप्रकाशितमहामनाः ॥ (११८।२)

स्वभक्तहृदयाकाशलसत्पङ्कजविस्तरः ॥ (११९।२)

सर्वप्राणिजनानन्दो वसुदेवनुतिप्रियः । (१२०।१)

देवकीनन्दनो लोकनन्दिकृद् भक्तभीतिभित् ॥ (१२०।२)

शेषानुगः शेषशायी यशोदानतिमानदः । (१२१।१)

नन्दानन्दकरो गोपगोपीगोकुलबान्धवः ॥ (१२१।२)

सर्वव्रजजनानन्दी भक्तवल्लभववल्लभः । (१२२।१)

वल्यव्यङ्गलसद्गात्रो बल्लवीबाहुमध्यगः ॥ (१२२।२)

पीतपूतनिकास्तन्यः पूतनाप्राणशोषणः । (१२३।१)

पूतनोरस्थलस्थायी पूतनामोक्षदायकः ॥ (१२३।२)

समागतजनानन्दी शकटोच्चाटकारकः । (१२४।१)

प्राप्तविप्राशिषोधीशो लघिमादिगुणाश्रयः ॥ (१२४।२)

तृणावर्तगलग्राही तृणावर्तनिषूदनः । (१२५।१)

जनन्यानन्दजनको जनन्यामुखविश्वदृक् ॥ (१२५।२)

बालक्रीडारतो बालभाषालीलादिनिर्वृतः । (१२६।१)

गोपगोपीप्रियकरो गीतनृत्यानुकारकः ॥ (१२६।२)

नवनीतविलिप्ताङ्गो नवनीतलवप्रियः । (१२७।१)

नवनीतलवाहारी नवनीतानुतस्करः ॥ (१२७।२)

दामोदरो ऽर्जुनोन्मूलो गोपैकमतिकारकः । (१२८।१)

वृन्दावनवनक्रीडो नानाक्रीडाविशारदः ॥ (१२८।२)

वत्सपुच्छसमाकर्षी वत्सासुरनिषूदनः । (१२९।१)

बकारिर् अघसंहारी बालाद्यन्तकनाशनः ॥ (१२९।२)

यमुनानिलसंजुष्टसुमृष्टपुलिनप्रियः । (१३०।१)

गोपालबालपूगस्थः स्निग्धदध्यन्नभोजनः ॥ (१३०।२)

गोगोपगोपीप्रियकृद् धनभृन् मोहखण्डनः । (१३१।१)

विधातुर् मोहजनको ऽत्यद्भुतैश्वर्यदर्शकः ॥ (१३१।२)

विधिस्तुतपदाम्भोजो गोपदारकबुद्धिभित् । (१३२।१)

कालीयदर्पदलनो नागनारीनुतिप्रियः ॥ (१३२।२)

दावाग्निशमनः सर्वव्रजभृज् जनजीवनः । (१३३।१)

सर्वकालसुखक्रीडो बर्हिबर्हावतंसकः । (१३४।१)

गोधुग्वधूजनप्राणो वेणुवाद्यविशारदः ॥ (१३४।२)

गोपीपिधानारुन्धानो गोपीव्रतवरप्रदः । (१३५।१)

विप्रदर्पप्रशमनो विप्रपत्नीप्रसाददः ॥ (१३५।२)

शतक्रतुवरध्वंसी शक्रदर्पमदापहः । (१३६।१)

धृतगोवर्धनगिरिर् व्रजलोकाभयप्रदः ॥ (१३६।२)

इन्द्रकीर्तिलसत्कीर्तिर् गोविन्दो गोकुलोत्सवः । (१३७।१)

नन्दत्राणकरो देवजलेशेडितसत्कथः ॥ (१३७।२)

व्रजवासिजनश्लाघ्यो निजलोकप्रदर्शकः । (१३८।१)

गोधुग्वधूदर्पहरः स्वयशःकीर्तनोत्सवः । (१३९।१)

व्रजाङ्गनाजनारामो व्रजसुन्दरीवल्लभः ॥ (१३९।२)

रासक्रीडारतो रासमहामण्डलमण्डनः । (१४०।१)

वृन्दावनवनामोदी यमुनाकूलकेलिकृत् ॥ (१४०।२)

गोपिकागीतिकागीतः शङ्खचूडशिरोहरः । (१४१।१)

महासर्पमुखग्रस्तत्रस्तनन्दविमोचकः ॥ (१४१।२)

सुदर्शनार्चितपदो दुष्टारिष्टविनाशकः । (१४२।१)

केशिद्वेषो व्योमहन्ता श्रुतनारदकीर्तनः ॥ (१४२।२)

अक्रूरप्रियकृत् क्रूररजकघ्नः सुवेशकृत् । (१४३।१)

सुदामदत्तमालाढ्यः कुब्जाचन्दनचर्चितः ॥ (१४३।२)

मथुराजनसंहर्षी चण्डकोदण्डखण्डकृत् । (१४४।१)

कंससैन्यसमुच्छेदी वणिग्विप्रगणार्चितः ॥ (१४४।२)

महाकुवलयापीडघाती चाणुरमर्दनः । (१४५।१)

रागशालागतापारनरनारीकृतोत्सवः ॥ (१४५।२)

कंसध्वंसकरः कंसस्वसारूप्यगतिप्रदः । (१४६।१)

कृतोग्रसेननृपतिः सर्वयादसौख्यकृत् ॥ (१४६।२)

तातमातृकृतानन्दो नन्दगोपप्रसाददः । (१४७।१)

श्रितसांदीपनिगुरुर् विद्यासागरपारगः ॥ (१४७।२)

दैत्यपञ्चजनध्वंसी पाञ्चजन्यदरप्रियः । (१४८।१)

सांदीपनिमृतापत्यदाता कालयमार्चितः ॥ (१४८।२)

सैरन्ध्रीकामसंतापशमनो ऽक्रूरप्रीतिदः । (१४९।१)

शार्ङ्गचापधरो नानाशरसंधानकोविदः ॥ (१४९।२)

अभेद्यदिव्यकवचः श्रीमद्दारुकसारथिः । (१५०।१)

खगेन्द्रचिह्नितध्वजश् चक्रपाणिर् गदाधरः ॥ (१५०।२)

नन्दकीयदुसेनाढ्यो ऽक्षयबाणनिषङ्गवान् । (१५१।१)

सुरासुराजेयरण्यो जितमागधयूथपः ॥ (१५१।२)

मागधध्वजिनीध्वंसी मथुरापुरपालकः । (१५२।१)

द्वारकापुरनिर्माता लोकस्थितिनियामकः ॥ (१५२।२)

सर्वसम्पत्तिजननः स्वजनानन्दकारकः । (१५३।१)

यवनासुरसंहर्ता मुचुकुन्देष्टसाधकः । (१५४।१)

रुक्मिणीहारको रुक्मिमुण्डमुण्डनकारकः । (१५५।१)

रुक्मिणीप्रियकृत् साक्षाद् रुक्मिणीरमणीपतिः ॥ (१५५।२)

रुक्मिणीवदनाम्भोजमधुपानमधुव्रतः । (१५६।१)

स्यमन्तकनिमित्तात्मभक्तर्क्षाधिपजित् शुचिः ॥ (१५६।२)

जाम्बवार्चितपादाब्जः साक्षाज् जाम्बवतीपतिः । (१५७।१)

सत्यभामाकरग्राही कालिन्दीसुन्दरीप्रियः ॥ (१५७।२)

सुतीक्ष्णशृङ्गवृषभसप्तजिद् राजयूथभित् । (१५८।१)

नग्नजित् तनयासत्यानायिकानायकोत्तमः ॥ (१५८।२)

भद्रेशो लक्ष्मणाकान्तो मित्रविन्दाप्रियेश्वरः । (१५९।१)

मुरुजित् पीठसेनानीनाशनो नरकान्तकः ॥ (१५९।२)

धरार्चितपदाम्भोजो भगदत्तभयापहा । (१६०।१)

नरकाहृतदिव्यस्त्रीरत्नवाहादिनायकः ॥ (१६०।२)

सत्यभामाबलावाक्यपारिजातापहारकः ॥ (१६१।२)

देवेन्द्रबलभिज् जायाजातनानाविलासवान् । (१६२।१)

रुक्मिणीमानदलनः स्त्रीविलासाविमोहितः ॥ (१६२।२)

कामतातः साम्बसुतो ऽसंख्यपुत्रप्रपौत्रवान् । (१६३।१)

नन्द्यादिप्रमथध्वंसी लीलाजितमहेश्वरः । (१६४।१)

महादेवस्तुतपदो नृगदुःखविमोचकः ॥ (१६४।२)

पौण्ड्रकारिः काशिराजशिरोहर्ता सदाजितः ॥ (१६५।२)

सुदक्षिणाव्रताराध्यशिवकृत्यानलान्तकः । (१६६।१)

वाराणसीप्रदहनो नारदेक्षितवैभवः ॥ (१६६।२)

अद्भुतैश्वर्यमहिमा सर्वधर्मप्रवर्तकः । (१६७।१)

जरासंधवधोद्योगकर्ता भूपतिशर्मकृत् । (१६९।१)

सन्मित्रकृत्याचरितो राजसूयप्रवर्तकः ॥ (१६९।२)

सर्वर्षिगणसंस्तुत्यश् चैद्यप्राणनिकृन्तकः । (१७०।१)

इन्द्रप्रस्थजनैः पूज्यो दुर्योधनविमोहनः ॥ (१७०।२)

महेशदत्तसौभाग्यपुरभित् शत्रुघातकः । (१७१।१)

दन्तवक्ररिपुच्छेत्ता दन्तवक्रगतिप्रदः ॥ (१७१।२)

विदूरथप्रमथनो भूरिभारावतारकः । (१७२।१)

पार्थदूतः पार्थहितः पार्थार्थः पार्थसारथिः ॥ (१७२।२)

पार्थमोहसमुच्छेदी गीताशास्त्रप्रदर्शकः । (१७३।१)

पार्थबाणगतप्राणवीरकैवल्यरूपदः ॥ (१७३।२)

दुर्योधनादिदुर्वृत्तदहनो भीष्ममुक्तिदः । (१७४।१)

पार्थाश्वमेधाहरकः पार्थराज्यप्रसाधकः ॥ (१७४।२)

पृथाभीष्टप्रदो भीमजयदो विजयप्रदः । (१७५।१)

युधिष्ठिरेष्टसंदाता द्रौपदीप्रीतिसाधकः ॥ (१७५।२)

सहदेवेरितपदो नकुलार्चितविग्रहः । (१७६।१)

पौरवेन्द्रपुरस्त्रीभ्यो द्वारकागमनोत्सवः । (१७७।१)

आनर्तदेशनिवसत्प्रजेरितमहत्कथः ॥ (१७७।२)

प्रियप्रीतिकरो मित्रविप्रदारिद्र्यभञ्जनः । (१७८।१)

तीर्थापदेशसन्मित्रप्रियकृन् नन्दनन्दनः ॥ (१७८।२)

गोपीजनज्ञानदाता तातक्रतुकृतोत्सवः । (१७९।१)

सद्वृत्तवक्ता सद्वृत्तकर्ता सद्वृत्तपालकः ॥ (१७९।२)

तातात्मज्ञानसंदाता देवकीमृतपुत्रदः । (१८०।१)

श्रुतदेवप्रियकरो मैथिलानन्दवर्धनः ॥ (१८०।२)

पार्थदर्पप्रशमनो मृतविप्रसुतप्रदः । (१८१।१)

स्त्रीरत्नवृन्दसंतोषी जनकेलिकलोत्सवः ॥ (१८१।२)

चन्द्रकोटिजनानन्दी भानुकोटिसमप्रभः । (१८२।१)

कृतान्तकोटिदुर्लङ्घ्यः कामकोटिमनोहरः ॥ (१८२।२)

यक्षराट्कोटिधनवान् मरुत्कोटिस्ववीर्यवान् । (१८३।१)

समुद्रकोटिगम्भीरो हिमवत्कोट्यकम्पनः ॥ (१८३।२)

कोट्यश्वमेधाढ्यहरः तीर्थकोट्यधिकाह्वयः । (१८४।१)

पीयूषकोटिमृत्युघ्नः कामधुक्कोट्यभीष्टदः ॥ (१८४।२)

शक्रकोटिविलासाढ्यः कोटिब्रह्माण्डनायकः । (१८५।१)

सर्वामोघोद्यमो ऽनन्तकीर्तिनिःसीमपौरुषः ॥ (१८५।२)

सर्वाभीष्टप्रदयशाः पुण्यश्रवणकीर्तनः । (१८६।१)

ब्रह्मादिसुरसंगीतवीतमानुषचेष्टितः ॥ (१८६।२)

अनादिमध्यनिधनो वृद्धिक्षयविवर्जितः । (१८७।१)

स्वभक्तोद्धवमुख्यैकज्ञानदो ज्ञानविग्रहः ॥ (१८७।२)

सशरीरजराव्याधस्वर्गदः स्वर्गिसंस्तुतः ॥ (१८८।२)

मुमुक्षुमुक्तविषयिजनानन्दकरो यशः । (१८९।१)

कलिकालमलध्वंसियशाः श्रवणमङ्गलः ॥ (१८९।२)

भक्तप्रियो भक्तहितो भक्तभ्रमरपङ्कजः । (१९०।१)

स्मृतमात्राखिलत्राता यन्त्रमन्त्रप्रभञ्जकः ॥ (१९०।२)

सर्वसम्पत्स्राविनामा तुलसीदामवल्लभः । (१९१।१)

अप्रमेयवपुर् भास्वदनर्घ्याङ्गविभूषणः ॥ (१९१।२)

विश्वैकसुखदो विश्वसज्जनानन्दपालकः । (१९२।१)

सर्वदेवशिरोरत्नम् अद्भुतानन्तभोगवान् ॥ (१९२।२)

अधोक्षजो जनाजीव्यः सर्वसाधुजनाश्रयः । (१९३।१)

समस्तभयभिन्नामा स्मृतमात्रार्तिनाशकः ॥ (१९३।२)

स्वयशःश्रवणानन्दजनरागी गुणार्णवः । (१९४।१)

अनिर्देश्यवपुस् तप्तशरणो जीवजीवनः ॥ (१९४।२)

परमार्थः परंवेद्यः परज्योतिः परागतिः । (१९५।१)

वेदान्तवेद्यो भगवान् अनन्तसुखसागरः ॥ (१९५।२)

जगद्बन्धध्वंसयशा जगज्जीवजनाश्रयः । (१९६।१)

वैकुण्ठलोकैकपतिर् वैकुण्ठजनवल्लभः ॥ (१९६।२)

प्रद्युम्नो रुक्मिणीपुत्रः शम्बरघ्नो रतिप्रियः । (१९७।१)

पुष्पधन्वा विश्वजयी द्युमत्प्राणनिषूदकः ॥ (१९७।२)

अनिरुद्धः कामसुतः शब्दयोनिर् महाक्रमः । (१९८।१)

उषापतिर् वृष्णिपतिर् हृषीकेशो मनःपतिः ॥ (१९८।२)

श्रीमद्भागवताचार्यः सर्ववेदान्तसागरः । (१९९।१)

शुकः सकलधर्मज्ञः परीक्षिन्नृपसत्कृतः ॥ (१९९।२)

श्रीबुद्धो दुष्टबुद्धिघ्नो दैत्यवेदबहिष्करः । (२००।१)

पाखण्डमार्गप्रवदो निरायुधजगज्जयः ॥ (२००।२)

कल्की कलियुगाच्छादी पुनः सत्यप्रवर्तकः । (२०१।१)

विप्रविष्णुयशोऽपत्यो नष्टधर्मप्रवर्तकः ॥ (२०१।२)

सारस्वतः सार्वभौमो बलित्रैलोक्यसाधकः । (२०२।१)

अष्टम्यन्तरसद्धर्मवक्ता वैरोचनिप्रियः ॥ (२०२।२)

आपः करो रमानाथो ऽमरारिकुलकृन्तनः । (२०३।१)

श्रुतेन्द्रहितकृद् धीरवीरमुक्तिबलप्रदः ॥ (२०३।२)

विष्वक्सेनः शम्भुसखो दशमान्तरपालकः । (२०४।१)

ब्रह्मसावर्णिवंशाब्धिहितकृद् विश्ववर्धनः ॥ (२०४।२)

धर्मसेतुर् अधर्मघ्नो वैध्यतन्त्रपदप्रदः । (२०५।१)

असुरान्तकरो देवार्थकसूनुः सुभाषणः ॥ (२०५।२)

स्वधामा सूनृतासूनुः सत्यतेजो द्विजात्मजः । (२०६।१)

द्विषण्मनुयुगत्राता पातालपुरदारणः ॥ (२०६।२)

दैवहोत्रिर् वार्हतोयो दिवस्पतिर् अतिप्रियः । (२०७।१)

त्रयोदशान्तरत्राता योगयोगिजनेश्वरः ॥ (२०७।२)

सत्त्रायणो बृहद्बाहुर् वैनतेयो विदुत्तमः । (२०८।१)

कर्मकाण्डैकप्रवदो वेदतन्त्रप्रवर्तकः ॥ (२०८।२)

परमेष्ठी सुरज्येष्ठो ब्रह्मा विश्वसृजांपतिः । (२०९।१)

अब्जयोनिर् हंसवाहः सर्वलोकपितामहः ॥ (२०९।२)

विष्णुः सर्वजगत्पाता शान्तः शुद्धः सनातनः । (२१०।१)

द्विजपूज्यो दयासिन्धुः शरण्यो भक्तवत्सलः ॥ (२१०।२)

रुद्रो मूढः शिवः शास्ता शम्भुः सर्वहरो हरः । (२११।१)

कपर्दी शंकरः शूली त्र्यक्षो ऽभेद्यो महेश्वरः ॥ (२११।२)

सर्वाध्यक्षः सर्वशक्तिः सर्वार्थः सर्वतोमुखः । (२१२।१)

सर्वावासः सर्वरूपः सर्वकारणकारणम् ॥ (२१२।२)

इत्य् एतत् कथितं विप्र विष्णोर् नामसहस्रकम् । (२१३।१)

सर्वपापप्रशमनं सर्वाभीष्टफलप्रदम् ॥ (२१३।२)

मनःशुद्धिकरं चाशु भगवद्भक्तिवर्धनम् । (२१४।१)

सर्वविघ्नहरं सर्वाश्चर्यैश्वर्यप्रदायकम् ॥ (२१४।२)

सर्वदुःखप्रशमनं चातुर्वर्ग्यफलप्रदम् । (२१५।१)

श्रद्धया परया भक्त्या श्रवणात् पठनाज् जपात् ॥ (२१५।२)

प्रत्यहं सर्ववर्णानां विष्णुपादाश्रितात्मनाम् । (२१६।१)

एतत् पठन् द्विजो विद्यां क्षत्रियः पृथिवीम् इमाम् ॥ (२१६।२)

वैश्यो महानिधिं शूद्रो वाञ्छितां सिद्धिम् आप्नुयात् । (२१७।१)

द्वात्रिंशदपराधान्यो ज्ञानाज्ञानाच् चरेद् धरेः ॥ (२१७।२)

नाम्ना दशापराधांश् च प्रमादाद् आचरेद् यदि । (२१८।१)

समाहितमना ह्य् एतत् पठेद् वा श्रावयेज् जपेत् ॥ (२१८।२)

स्मरेद् वा शृणुयाद् वापि तेभ्यः सद्यः प्रमुच्यते । (२१९।१)

नातः परतरं पुण्यं त्रिषु लोकेषु विद्यते ॥ (२१९।२)

यस्यैककीर्तनेनापि भवबन्धाद् विमुच्यते । (२२०।१)

अतस् त्वं सततं भक्त्या श्रद्धया कीर्तनं कुरु ॥ (२२०।२)

विष्णोर् नामसहस्रं ते भगवत्प्रीतिकारणम् । (२२१।१)

श्रीनारद उवाच । (२२१।२)

धन्यो ऽस्म्य् अनुगृहीतो ऽस्मि त्वयातिकरुणात्मना । (२२१।३)

यतः कृष्णस्य परमं सहस्रं नामकीर्तितम् ॥ (२२१।४)

यद्य् आलस्यात् प्रमादाद् वा सर्वं पठितुम् अन्वहम् । (२२२।१)

न शक्नोमि तदा देव किं करोमि वद प्रभो ॥ (२२२।२)

श्रीशिव उवाच । (२२३।१)

यदि सर्वं न शक्नोसि प्रत्यहं पठितुं द्विज । (२२३।२)

तदा कृष्णेति कृष्णेति कृष्णेति प्रत्यहं वद ॥ (२२३।३)

एतेन तव विप्रर्षे सर्वं सम्पद्यते सकृत् । (२२४।१)

किं पुनर् भगवन्नाम्नां सहस्रस्य प्रकीर्तनात् ॥ (२२४।२)

यन् नामकीर्तनेनैव पुमान् संसारसागरम् । (२२५।१)

तरत्य् अद्धा प्रपद्ये तं कृष्णं गोपालरूपिणम् ॥ (२२५।२)