तच्चित्तरत्नग्रहणाय सम्यक् पूजां करोम्येष तथागतानाम् । (१।१)

सद्धर्मरत्नस्य च निर्मलस्य बुद्धात्मजानां च गुणोदधीनाम् ॥ (१।२)

यावन्ति पुष्पाणि फलानि चैव भैषज्यजातानि च यानि सन्ति । (२।१)

रत्नानि यावन्ति च सन्ति लोके जलानि च स्वच्छमनोरमाणि ॥ (२।२)

महीधरा रत्नमयास्तथान्ये वनप्रदेशाश्च विवेकरम्याः । (३।१)

लताः सपुष्पाभरणोज्ज्वलाश्च द्रुमाश्च ये सत्फलनम्रशाखाः ॥ (३।२)

देवादिलोकेषु च गन्धधूपाः कल्पद्रुमा रत्नमयाश्च वृक्षाः । (४।१)

सरांसि चाम्भोरुहभूषणानि हंसस्वनात्यन्तमनोहराणि ॥ (४।२)

अकृष्टजातानि च शस्यजातान्यन्यानि वा पूज्यविभूषणानि । (५।१)

आकाशधातुप्रसराविधीनि सर्वाण्यपीमान्यपरिग्रहाणि ॥ (५।२)

आदाय बुद्ध्या मुनिपुंगवेभ्यो निर्यातयाम्येष सपुत्रकेभ्यः । (६।१)

गृह्णन्तु तन्मे वरदक्षिणीया महाकृपा मामनुकम्पमानाः ॥ (६।२)

अपुण्यवान् अस्मि महादरिद्रः पूजार्थमन्यन्मम नास्ति किंचित् । (७।१)

अतो ममार्थाय परार्थचिन्ता गृह्णन्तु नाथा इदमात्मशक्त्या ॥ (७।२)

ददामि चात्मानमहं जिनेभ्यः सर्वेण सर्वं च तदात्मजेभ्यः । (८।१)

परिग्रहं मे कुरुताग्रसत्त्वाः युष्मासु दासत्वमुपैमि भक्त्या ॥ (८।२)

परिग्रहेणास्मि भवत्कृतेन निर्भीर् भवे सत्त्वहितं करोमि । (९।१)

पूर्वं च पापं समतिक्रमामि नान्यच् च पापं प्रकरोमि भूयः ॥ (९।२)

रत्नोज्ज्वलस्तम्भमनोरमेषु मुक्तामयोद्भासिवितानकेषु । (१०।१)

स्वच्छोज्ज्वलस्फाटिककुट्टिमेषु सुगन्धिषु स्नानगृहेषु तेषु ॥ (१०।२)

मनोज्ञगन्धोदकपुष्पपूर्णैः कुम्भैर्महारत्नमयैरनेकैः । (११।१)

स्नानं करोम्येष तथागतानां तदात्मजानां च सगीतवाद्यं ॥ (११।२)

प्रधूपितैर् धौतमलैर् अतुल्यैर्वस्त्रैश्च तेषां तनुम् उन्मृशामि । (१२।१)

ततः सुरक्तानि सुधूपितानि ददामि तेभ्यो वरचीवराणि ॥ (१२।२)

दिव्यैर् मृदुश्लक्ष्णविचित्रशोभैर् वस्त्रैर् अलंकारवरैश्च तैस्तैः । (१३।१)

समन्तभद्राजितमञ्जुघोषलोकेश्वरादीनपि मण्डयामि ॥ (१३।२)

सर्वत्रिसाहस्रविसारिगन्धैर् गन्धोत्तमैस् ताननुलेपयामि । (१४।१)

सूत्तप्तसून्मृष्टसुधौतहेमप्रभोज्ज्वलान् सर्वमुनीन्द्रकायान् ॥ (१४।२)

मन्दारवेन्दीवरमल्लिकाद्यैः सर्वैः सुगन्धैः कुसुमैर्मनोज्ञैः । (१५।१)

अभ्यर्चयाम्य् अर्च्यतमान् मुनीन्द्रान् स्रग्भिश् च संस्थानमनोरमाभिः ॥ (१५।२)

स्फीतस्फुरद्गन्धमनोरमैश्च तान्धूपमेघैर् उपधूपयामि । (१६।१)

भौज्यैश्च स्वाद्यैर्विविधैश्च पेयैस्तेभ्यो निविद्यं च निवेदयामि ॥ (१६।२)

रत्नप्रदीपांश्च निवेदयामि सुवर्णपद्मेषु निविष्टपङ्क्तीन् । (१७।१)

गन्धोपलिप्तेषु च कुट्टिमेषु किरामि पुष्पप्रकरान्मनोज्ञान् ॥ (१७।२)

प्रलम्बमुक्तामणिहारशोभान् आभास्वरान् दिग्मुखमण्डनांस् तान् । (१८।१)

विमानमेघान् स्तुतिगीतरम्यान् मैत्रीमयेभ्योऽपि निवेदयामि ॥ (१८।२)

सुवर्णदण्डैः कमनीयरूपैः संसक्तमुक्तानि समुच्छ्रितानि । (१९।१)

प्रधारयाम्येष महामुनीनां रत्नातपत्राण्यतिशोभनानि ॥ (१९।२)

अतः परं प्रतिष्ठन्तां पूजामेघा मनोरमाः । (२०।१)

तूर्यसंगीतिमेघाश्च सर्वसत्त्वप्रहर्षणाः ॥ (२०।२)

सर्वसद्धर्मरत्नेषु चैत्येषु प्रतिमासु च । (२१।१)

पुष्परत्नादिवर्षाश्च प्रवर्तन्तां निरन्तरम् ॥ (२१।२)

मञ्जुघोषप्रभृतयः पूजयन्ति यथा जिनान् । (२२।१)

तथा तथागतान् नाथान् सपुत्रान् पूजयाम्यहम् ॥ (२२।२)

स्वराङ्गसागरैः स्तोत्रैः स्तौमि चाहं गुणोदधीन् । (२३।१)

स्तुतिसंगीतिमेघाश्च संभवन्त्वेष्व् अनन्यथा ॥ (२३।२)

सर्वक्षेत्राणुसंख्यैश्च प्रणामैः प्रणमाम्यहम् । (२४।१)

सर्वत्राध्वगतान्बुद्धान्सहधर्मगणोत्तमान् ॥ (२४।२)

सर्चचैत्यानि वन्देऽहं बोधिसत्त्वाश्रयांस्तथा । (२५।१)

नमः करोम्युपाध्यायान् अभिवन्द्यान् यतींस्तथा ॥ (२५।२)

बुद्धं गच्छामि शरणं यावद् आबोधिमण्डतः । (२६।१)

धर्मं गच्छामि शरणं बोधिसत्त्वगणं तथा ॥ (२६।२)

विज्ञापयामि सम्बुद्धान्सर्वदिक्षु व्यवस्थितान् । (२७।१)

महाकारुणिकांश्चापि बोधिसत्त्वान्कृताञ्जलिः ॥ (२७।२)

अनादिमति संसारे जन्मन्यत्रैव वा पुनः । (२८।१)

यन्मया पशुना पापं कृतं कारितमेव वा ॥ (२८।२)

यच् चानुमोदितं किंचिदात्मघाताय मोहतः । (२९।१)

तदत्ययं देशयामि पश्चात्तापेन तापितः ॥ (२९।२)

रत्नत्रयेऽपकारो यो मातापितृषु वा मया । (३०।१)

गुरुष्वन्येषु वा क्षेपात्कायवाग्बुद्धिभिः कृतः ॥ (३०।२)

अनेकदोषदुष्टेन मया पापेन नायकाः । (३१।१)

यत्कृतं दारुणं पापं तत्सर्वं देशयाम्यहम् ॥ (३१।२)

कथं च निःसराम्यस्मान् नित्योद्वेगोऽस्मि नायकाः । (३२।१)

मा भून् मे मृत्युरचिरादक्षीणे पापसंचये ॥ (३२।२)

कथं च निःसराम्यस्मात् परित्रायत सत्वरम् । (३३।१)

मा ममाक्षीणपापस्य मरणं शीघ्रमेष्यति ॥ (३३।२)

कृताकृतापरीक्षोऽयं मृत्युर्विश्रम्भघातकः । (३४।१)

स्वस्थास्वस्थैर् अविश्वास्य आकस्मिकमहाशनिः ॥ (३४।२)

प्रियाप्रियनिमित्तेन पापं कृतमनेकधा । (३५।१)

सर्वमुत्सृज्य गन्तव्यमिति न ज्ञातमीदृशम् ॥ (३५।२)

तत्तत्स्मरणतां याति यद्यद्वस्त्वनुभूयते । (३६।१)

स्वप्नानुभूतवत्सर्वं गतं न पुनरीक्ष्यते ॥ (३६।२)

अप्रिया न भविष्यन्ति प्रियो मे न भविष्यति । (३७।१)

अहं च न भविष्यामि सर्वं च न भविष्यति ॥ (३७।२)

इहैव तिष्ठतस्तावद्गता नैके प्रियाप्रियाः । (३८।१)

तन्निमित्तं तु यत्पापं तत्स्थितं घोरमग्रतः ॥ (३८।२)

एवमागन्तुकोऽस्मीति न मया प्रत्यवेक्षितम् । (३९।१)

मोहानुनयविद्वैषैः कृतं पापमनेकधा ॥ (३९।२)

रात्रिंदिवम् अविश्राममायुषो वर्धते व्ययः । (४०।१)

आयस्य चागमो नास्ति न मरिष्यामि किं न्व् अहम् ॥ (४०।२)

इह शय्यागतेनापि बन्धुमध्येऽपि तिष्ठता । (४१।१)

मयैवैकेन सोढव्या मर्मच्छेदादिवेदना ॥ (४१।२)

यमदूतैर्गृहीतस्य कुतो बन्धुः कुतः सुहृत् । (४२।१)

पुण्यमेकं तदा त्राणं मया तच् च न सेवितम् ॥ (४२।२)

अनित्यजीवितासङ्गादिदं भयमजानता । (४३।१)

प्रमत्तेन मया नाथा बहु पापम् उपार्जितम् ॥ (४३।२)

अङ्गच्छेदार्थमप्यद्य नीयमानो विशुष्यति । (४४।१)

पिपासितो दीनदृष्टिरन्यदेवेक्षते जगत् ॥ (४४।२)

किं पुनर्भैरवाकारैर्यमदूतैरधिष्ठितः । (४५।१)

महात्रासज्वरग्रस्तः पुरीषोत्सर्गवेष्टितः ॥ (४५।२)

कातरैर्दृष्टिपातैश्च त्राणान्वेषी चतुर्दिशम् । (४६।१)

को मे महाभयादस्मात्साधुस्त्राणं भविष्यति ॥ (४६।२)

त्राणशून्या दिशो दृष्ट्वा पुनः सम्मोहमागतः । (४७।१)

तदाहं किं करिष्यामि तस्मिन्स्थाने महाभये ॥ (४७।२)

अद्यैव शरणं यामि जगन्नाथान् महाबलान् । (४८।१)

जगद्रक्षार्थम् उद्युक्तान् सर्वत्रासहराञ्जिनान् ॥ (४८।२)

तैश्चाप्यधिगतं धर्मं संसारभयनाशनम् । (४९।१)

शरणं यामि भावेन बोधिसत्त्वगणं तथा ॥ (४९।२)

समस्तभद्रायात्मानं ददामि भयविह्वलः । (५०।१)

पुनश्च मञ्जुघोषाय ददाम्यात्मानमात्मना ॥ (५०।२)

तं चावलोकितं नाथं कृपाव्याकुलचारिणम् । (५१।१)

विरौम्यार्तरवं भीतः स मां रक्षतु पापिनम् ॥ (५१।२)

आर्यमाकाशगर्भं च क्षितिगर्भं च भावतः । (५२।१)

सर्वान् महाकृपांश्चापि त्राणान्वेषी विरौम्यहम् ॥ (५२।२)

यं दृष्ट्वैव च संत्रस्ताः पलायन्ते चतुर्दिशम् । (५३।१)

यमदूतादयो दुष्टास्तं नमस्यामि वज्रिणम् ॥ (५३।२)

अतीत्य युष्मद्वचनं साम्प्रतं भयदर्शनात् । (५४।१)

शरणं यामि वो भीतो भयं नाशयत द्रुतम् ॥ (५४।२)

इत्वरव्याधिभीतोऽपि वैद्यवाक्यं न लङ्घयेत् । (५५।१)

किमु व्याधिशतैर् ग्रस्तश्चतुर्भिश् चतुरुत्तरैः ॥ (५५।२)

एकेनापि यतः सर्वे जम्बुद्वीपगता नराः । (५६।१)

नश्यन्ति येषां भैषज्यं सर्वदिक्षु न लभ्यते ॥ (५६।२)

तत्र सर्वज्ञवैद्यस्य सर्वशल्यापहारिणः । (५७।१)

वाक्यम् उल्लङ्घयामीति धिङ् माम् अत्यन्तमोहितम् ॥ (५७।२)

अत्यप्रमत्तस् तिष्ठामि प्रपातेष्वितरेष्वपि । (५८।१)

किमु योजनसाहस्रे प्रपाते दीर्घकालिके ॥ (५८।२)

अद्यैव मरणं नेति न युक्ता मे सुखासिका । (५९।१)

अवश्यमेति सा वेला न भविष्याम्यहं यदा ॥ (५९।२)

अभयं केन मे दत्तं निःसरिष्यामि वा कथम् । (६०।१)

अवश्यं न भविष्यामि कस्मान्मे सुस्थितं मनः ॥ (६०।२)

पूर्वानुभूतनष्टेभ्यः किं मे सारमवस्थितम् । (६१।१)

येषु मे ऽभिनिविष्टेन गुरूणां लङ्घितं वचः ॥ (६१।२)

जीवलोकमिमं त्यक्त्वा बन्धून् परिचितांस्तथा । (६२।१)

एकाकी क्वापि यास्यामि किं मे सर्वैः प्रियाप्रियैः ॥ (६२।२)

इयमेव तु मे चिन्ता युक्ता रात्रिंदिवं सदा । (६३।१)

अशुभान् नियतं दुःखं निःसरेयं ततः कथम् ॥ (६३।२)

मया बालेन मूढेन यत्किंचित्पापमाचितम् । (६४।१)

प्रकृत्या यच् च सावद्यं प्रज्ञप्त्यावद्यमेव च ॥ (६४।२)

तत्सर्वं देशयाम्येष नाथानामग्रतः स्थितः । (६५।१)

कृताञ्जलिर्दुःखभीतः प्रणिपत्य पुनः पुनः ॥ (६५।२)

अत्ययमत्ययत्वेन प्रतिगृह्णन्तु नायकाः । (६६।१)

न भद्रकमिदं नाथा न कर्तव्यं पुनर्मया ॥ (६६।२)