अन्यच्च ॥ (१।०)

स्नुहीक्षीरेण सेहुण्डदुग्धेन सम्पिष्टमाक्षिकं स्वर्णमाक्षिकं मूत्रादौ शुद्धं तालकस्य प्रकारेण भागैकतारपत्राणि विभागं विलेपयेत् पुनः मूषासंपुटेन रुद्ध्वा चतुर्दशपुटैः पुटेत् ॥ (२।०)

तारं भस्म प्रजायते ॥ (३।०)

ग्रन्थान्तरे पारदेन मारणं कृतं तदपि लिख्यते तथा च । (४।१)

विधाय पिष्टं सूतेन रजतस्याथ मेलयेत् । (४।२)

तालं गन्धं समं पश्चान्मर्दयेन्निम्बुकद्रवैः । (४।३)

द्वित्रिपुटैर्भवेद्भस्म योज्यमेतद्रसादिषु । (४।४)

इति ॥ (४।५)

अथ गुणाः । (५।१)

रूप्यं शीतं कषायाम्लं स्वादुपाकरसं सरम् । (५।२)

वयसः स्थापनं स्निग्धं लेखनं वातपित्तजित् । (५।३)

प्रमेहादिकरोगांश्च नाशयत्यचिरं ध्रुवम् ॥ (५।४)