अथ वङ्गम् ॥ (१।०)

मिश्रकं खुरकं चेति द्विविधं वङ्गमुच्यते । (२।१)

खुरकं तु गुणैः श्रेष्ठं मिश्रकं न रसे हितम् ॥ (२।२)

चपलं मृदुलं स्निग्धं द्रुतद्रावश्च गौरवम् । (३।१)

निःशब्दं खुरवङ्गं स्यात् मिश्रकं श्यामशुभ्रकम् ॥ (३।२)

इति ॥ (४।०)

स्पष्टमन्यत् अथ मारणम् ॥ (५।०)

वङ्गो दाहकरः शीतः कफपीडामयान् जयेत् । (६।१)

क्रिमीन् अष्टादशविधान् प्रमेहान्नात्र संशयः । (६।२)

इति ॥ (६।३)

केचिद्दाहहरः शीत इति पठन्ति तत्र मदनविनोदपथ्यापथ्यनिघण्ट्वादौ वङ्गस्योष्णगुणस्य लिखितत्वात् ॥ (७।०)

विशेषतस्तालेन मृत उष्ण एव भवतीति ॥ (८।०)

ग्रन्थान्तरात् वङ्गेश्वरः । (९।१)

शुद्धं सूतं शुद्धवङ्गं द्रावयित्वैकतश्चरेत् । (९।२)

तालकं तु द्वयोस्तुल्यं शठीद्रावेण मर्दयेत् ॥ (९।३)

शुष्कं काचमये पात्रे पचेद्यामचतुष्टयम् । (१०।१)

तुर्यांशं तालकं दत्त्वा पुनर्वारत्रयं पचेत् ॥ (१०।२)

गुञ्जार्धं वाथ गुञ्जैकं बलमानेन भक्षयेत् । (११।१)

जयेद्वातं कफश्वासं कुष्ठं कासं भगन्दरम् ॥ (११।२)

वातरक्तं क्षयं वापि वह्निमान्द्यं त्रिदोषकम् । (१२।१)

नाम्ना वङ्गेश्वरः सूतः सर्वरोगेषु पूजितः ॥ (१२।२)

पक्षाघातादिवातेषु प्रसूत्यादौ विशेषतः । (१३।१)

इति वङ्गेश्वरः ग्रन्थान्तरात् ॥ (१३।२)

अथ वङ्गशोधनमारणानुपानाश्च विशेषत उच्यन्ते ॥ (१४।०)

गोमूत्रे प्रथमं दद्यात्तक्रे दद्याद्द्वितीयकम् । (१५।१)

तृतीयं काञ्जिके देयं चतुर्थं कटुतैलके ॥ (१५।२)

शुभलग्नेन योगेन शोधनं कारयेद्भिषक् । (१६।१)

निर्लिप्तं द्रावितं वङ्गं सर्वरोगेषु योजयेत् ॥ (१६।२)

इति वङ्गशोधनम् ॥ (१७।०)

अथ मारणम् । (१८।१)

चुल्ल्युपरि स्थितं पात्रं पाचयेद्यामकद्वयम् । (१८।२)

घर्षणं लोहदण्डेन चूर्णं देयं पुनः पुनः ॥ (१८।३)

प्रथमं रजनीचूर्णं दीप्यकं च द्वितीयकम् । (१९।१)

तृतीयं जीरकं द्वयं चतुर्थं तिन्तिडीत्वचम् ॥ (१९।२)

एवं क्रमेण चूर्णेन वङ्गं निश्चन्द्रिकं भवेत् । (२०।१)

स्वाङ्गशीतं समुद्धृत्य भस्म चन्द्रसमं सितम् ॥ (२०।२)

गुञ्जामात्रं प्रदातव्यं वङ्गभस्म सुभक्षितम् । (२१।१)

अनुपानं प्रवक्ष्यामि यथाव्याध्यनुपानतः ॥ (२१।२)

धात्रीस्वरससंयुक्तं प्रमेहं हन्ति दुस्तरम् । (२२।१)

शतावरीरसेनैव मूत्रकृच्छ्रविनाशनम् ॥ (२२।२)

बहुमूत्रहरं तत्तु पारिभद्ररसेन तु । (२३।१)

रजनीचूर्णमधुकं धात्रीफलरसेन तु ॥ (२३।२)

चतुःप्रकारं प्रदरं नाशयेन्नात्र संशयः । (२४।१)

पञ्चतिक्तकषायेण पाययेत्सर्वकुष्ठजित् ॥ (२४।२)

शर्करामधुसंयुक्तं कूष्माण्डस्य रसेन तु । (२५।१)

रक्तपित्तक्षयं कासं श्वासं हन्ति सुदुस्तराम् ॥ (२५।२)

कण्टकारीरसेनैव पातव्यं पञ्चकासजित् । (२६।१)

मुद्गं सशर्करं क्षौद्रं जाङ्गलं पिशितं रसम् ॥ (२६।२)

उदुंबरफलं चैव तण्डुलीयकवास्तुकम् । (२७।१)

रम्भाप्रसूतं चाङ्गेरीम् अयकं कदलीफलम् ॥ (२७।२)

नवनीतं तथा क्षीरमभ्यङ्गस्नानमाचरेत् । (२८।१)

इति वङ्गकल्पः ॥ (२८।२)