अथ शिलाजतुशोधनम् ॥ (१।०)

ग्रीष्मे ग्रीष्मकाले तप्तशिलाच्युतं शिलाजतु समानीय यथा भूमौ न पतति गोदुग्धादिभिर्मर्दयेत् शुध्यतीति ॥ (२।०)

अथ भूमिपतितस्य शोधनं मुख्यम् ॥ (३।०)

उत्तमशिलाजतुपाषाणं सूक्ष्मखण्डप्रकल्पितं कृतम् अत्युष्णपानीये निक्षिप्य यामैकं स्थापयेत् ॥ (४।०)

मर्दयित्वा तन्नीरं वस्त्रगालितं गृह्णीयात् मृत्पात्रे स्थापयित्वा आतपे धारयेत् ॥ (५।०)

ग्रन्थान्तरे लोहपात्रे निष्कासनमुक्तम् ॥ (६।०)

चत्वारि पात्राण्यसितायसानीत्युक्तत्वात् ॥ (७।०)

उपरिस्थे यत् घनं तत् अन्यपात्रे क्षिपेत् ॥ (८।०)

तत्र जलं दत्त्वा तस्मादन्यस्मिन् एवं द्विमासाभ्यां ज्येष्ठाषाढाभ्यां निःसारयेत् ततो वह्निक्षिप्तौ लिङ्गोपमं लिङ्गाकारं भवेत् तदा कार्यक्षमं कार्यसाधकं भूयादिति परीक्षा ॥ (९।०)

स्पष्टमन्यत् ॥ (१०।०)