अथानादिमलापेतः सर्वकृत् सर्वविच्छिवः । (१।१)

पूर्वव्यत्यासितस्याणोः पाशजालम् अपोहति ॥ (१।२)

त्रिपदार्थं चतुष्पादं महातन्त्रं जगत्पतिः । (२।१)

सूत्रेणैकेन संहृत्य प्राह विस्तरशः पुनः ॥ (२।२)

कृत्यं सकारकफलं ज्ञेयम् अस्यैतद् एव हि ॥ (३।२)

तेन स्वभावसिद्धेन भवितव्यं जगत्कृता । (४।१)

अर्वाक्सिद्धे ऽनवस्था स्यान् मोक्षो निर्हेतुको ऽपि वा ॥ (४।२)

चैतन्यं दृक्क्रियारूपं तद् अस्त्य् आत्मनि सर्वदा । (५।१)

सर्वतश् च यतो मुक्तौ श्रूयते सर्वतोमुखम् ॥ (५।२)

सद् अप्य् अभासमानत्वात् तन् निरुद्धं प्रतीयते । (६।१)

वश्यो ऽनावृतवीर्यस्य सो ऽत एवाविमोक्षणात् ॥ (६।२)

प्रावृतीशबले कर्म मायाकार्यं चतुर्विधम् । (७।१)

पाशजालं समासेन धर्मा नाम्नैव कीर्तिताः ॥ (७।२)

इति वस्तुत्रयस्यास्य प्राक्पादकृतसंस्थितेः । (८।१)

चर्यायोगक्रियापादैर् विनियोगो ऽभिधास्यते ॥ (८।२)

विनियोगफलं मुक्तिर् भुक्तिर् अप्य् अनुषङ्गतः । (९।१)

परापरविभागेन भिद्येते ते त्व् अनेकधा ॥ (९।२)

वेदान्तसांख्यसदसत्पादार्थिकमतादिषु । (१०।१)

ससाधना मुक्तिर् अस्ति को विशेषः शिवागमे ॥ (१०।२)

प्रणेत्रसर्वदर्शित्वान् न स्फुटो वस्तुसंग्रहः । (११।१)

उपायाः सफलास् तद्वच् छैवे सर्वम् इदं परम् ॥ (११।२)

वेदान्तेष्व् एक एवात्मा चिदचिद्व्यक्तिलक्षितः । (१२।१)

प्रतिज्ञामात्रम् एवेदं निश्चयः किंनिबन्धनः ॥ (१२।२)

अथ प्रमाणं तत्रात्मा प्रमेयत्वं प्रपद्यते । (१३।१)

यत्रैतद् उभयं तत्र चतुष्टयम् अपि स्थितम् ॥ (१३।२)

अद्वैतहानिर् एवं स्यान् निष्प्रमाणकतान्यथा । (१४।१)

भोगसाम्याविमोक्षौ च यौ नेष्टाव् आत्मवादिभिः ॥ (१४।२)

सांख्यज्ञाने ऽपि मिथ्यात्वं कार्ये कारणबुद्धितः । (१५।१)

अकर्तृभावाद् भोक्तुश् च स्वातन्त्र्याद् अप्य् अचित्त्वतः ॥ (१५।२)

इह सप्त पदार्थाः स्युर् जीवाजीवास्रवास् त्रयः । (१६।१)

संवरो निर्जरश् चैव बन्धमोक्षाव् उभाव् अपि ॥ (१६।२)

स्याद्वादलाञ्छिताश् चैते सर्वे ऽनैकान्तिकत्वतः । (१७।१)

तद् एव सत् तदेवासद् इति केन प्रमीयते ॥ (१७।२)

सद् अन्यद् असद् अन्यच् च तद् एवं सिद्धसाध्यता । (१८।१)

असज् जघन्यं सच् छ्रेष्ठम् इत्य् अपि ब्रुवते बुधाः ॥ (१८।२)

नैकत्र तदपेक्षातः स्थितम् एवोभयं ततः । (१९।१)

अथ चेत् तदसद्भावे सदयुक्ततरो यतः ॥ (१९।२)

इत्याद्य् अज्ञानमूढानां मतम् आश्रित्य दुर्धियः । (२७।१)

अपवर्गम् अभीप्सन्ति खद्योतात् पावकार्थिनः ॥ (२७।२)