अथेन्द्रियशरीरार्थैश् चिद्योगस्यानुमीयते । (१।१)

निमित्तम् आगामिभावाद् यतो नागाम्यहेतुमत् ॥ (१।२)

तस्य प्रदेशवर्तित्वाद् वैचित्र्यात् क्षणिकत्वतः । (२।१)

प्रतिपुंनियतत्वाच्च संततत्वाच्च तद्गुणम् ॥ (२।२)

ईशविद्याद्यपेक्षित्वात् सहकारि तदुच्यते । (३।१)

कर्म व्यापारजन्यत्वाद् अदृष्टं सूक्ष्मभावतः ॥ (३।२)

जनकं धारकं भोग्यम् अध्यात्मादित्रिसाधनम् । (४।१)

तत् सत्यानृतयोनित्वाद् धर्माधर्मस्वरूपकम् ॥ (४।२)

स्वापे विपाकम् अभ्येति तत् सृष्टाव् उपयुज्यते । (५।१)

मायाया वर्तते चान्ते नाभुक्तं लयमेति च ॥ (५।२)

इति मायादिकालान्तप्रवर्तकम् अनादिमत् । (६।१)

कर्म व्यञ्जकम् अप्येतद्रोधि सद्यन्न मुक्तये ॥ (६।२)