स इत्थं विग्रहोऽनेन करणेनाहतौजसा । (१।१)

करोति सर्वदा कृत्यं यदा यदुपपद्यते ॥ (१।२)

तत्रादौ केवलाणूनां योग्यानां कुरुतेऽष्टकम् । (२।१)

वामादिशक्तिभिर् युक्तं सप्तकोटिपरिच्छदम् ॥ (२।२)

तेषामनन्तः सूक्ष्मश्च तथा चैव शिवोत्तमः । (३।१)

एकनेत्रैकरुद्रौ च त्रिमूर्तिश्चामितद्युतिः ॥ (३।२)

श्रीकण्ठश्च शिखण्डी च राजराजेश्वरेश्वराः । (४।१)

ईषद् अप्राप्तयोगत्वान्नियोज्याः परमेष्ठिनः ॥ (४।२)

सर्वज्ञत्वादियोगेऽपि नियोज्यत्वं मलांशतः । (५।१)

परस्परं विशिष्यन्ते मन्त्राश् चैवम् अधः स्थिताः ॥ (५।२)

ते च मन्त्रेश्वरव्यक्तशिवशक्तिप्रचोदिताः । (६।१)

कुर्वन्त्यनुग्रहं पुंसां यदा येषां स युज्यते ॥ (६।२)

प्रयोक्तृदेहसापेक्षं तदर्धमखिलेऽध्वनि । (७।१)

कृत्वाधिकारं स्थित्यन्ते शिवं विशति सेश्वरम् ॥ (७।२)

विनाधिकरणेनान्यत्प्रधानविकृतेर् अधः । (८।१)

कृत्वाधिकारमीशेष्टम् अपैति स्वाध्वसंहृतौ ॥ (८।२)

ततोऽनन्ताद्यभिव्यक्तः पतीनां ग्रन्थितत्त्वतः । (९।१)

कलाद्यारब्धदेहानां करोत्यष्टादशं शतम् ॥ (९।२)

तान् अप्याविश्य भगवान् साञ्जनान् भुवनाधिपान् । (१०।१)

येभ्यः सर्वमिदं येषां शक्तिः कर्मनिबन्धना ॥ (१०।२)

प्रणेतॄन् पशुशास्त्राणां पशूंस् तदनुवर्तकान् । (११।१)

स्वसाध्यकारकोपेतान् कालधामावधिस्थितान् ॥ (११।२)

स्थितौ सकारकानेतान् समाक्रम्य स्वतेजसा । (१२।१)

युनक्ति स्वार्थसिद्ध्यर्थं भूतैर् अनभिलक्षितः ॥ (१२।२)

भोगसाधनमाक्षिप्य कृत्वा कारणसंश्रयम् । (१३।१)

तच् च सात्मकमाक्रम्य विश्रमायावतिष्ठते ॥ (१३।२)

भविनां भवखिन्नानां सर्वभूतहितो यतः । (१४।१)

स्वापावसानम् आसाद्य पुनः प्राग्वत्प्रवर्तते ॥ (१४।२)

स्वापेऽप्यास्ते बोधयन् बोधयोग्यान् रोध्यान् रुन्धन् पाचयन्कर्मिकर्म । (१५।१)

मायाशक्तीर् व्यक्तियोग्याः प्रकुर्वन् पश्यन्सर्वं यद्यथा वस्तुजातम् ॥ (१५।२)