अथोपलभ्य देहादि वस्तु कार्यत्वधर्मकम् । (१।१)

कर्तारम् अस्य जानीमो विशिष्टम् अनुमानतः ॥ (१।२)

यद्यथा यादृशं यावत्कार्यं तत्कारणं तथा । (२।१)

नित्यं कालानवच्छेदाद् वैतत्यान् न प्रदेशगम् ॥ (२।२)

क्रमाक्रमसमुत्पत्तेः क्रमाद्युत्पत्तिशक्तिमत् । (३।१)

तस्यास्ति करणं येन दृष्टा नाकरणा कृतिः ॥ (३।२)

अनागामि च तज् ज्ञेयं कार्यस्यानादिसंस्थितेः । (४।१)

करणं च न शक्त्यन्यच् छक्तिर्नाचेतना चितः ॥ (४।२)

विषयानियमादेकं बोधे कृत्ये च तत्तथा । (५।१)

कार्यं न स्थितिजन्मादि बीजस्य प्रकृतेरणोः ॥ (५।२)

पारिशेष्यान् महेशस्य मुक्तस्य शिव एव सः । (६।१)

सम्बन्धाग्रहणे बाधा मानस्याभ्येति कस्यचित् ॥ (६।२)

सा परस्यापि धूमोऽन्यो गिरौ माहानसाद्यतः । (७।१)

लोके वपुष्मतो दृष्टं कृत्यं सो ऽप्य् अस्मदादिवत् ॥ (७।२)

मूलाद्यसंभवाच् छाक्तं वपुर् नस् तादृशं प्रभोः । (८।१)

तद्वपुः पञ्चभिर्मन्त्रैः पञ्चकृत्योपयोगिभिः ॥ (८।२)

ईशतत्पुरुषाघोरवामाजैर् मस्तकादिकम् । (९।१)

ईष्टे येन जगत्सर्वं गुणेनोपरिवर्तिना ॥ (९।२)

स मूर्धसमदेशत्वान्मूर्धा नावयवस्तनोः । (१०।१)

तस्य तस्य तनुर्या पूस् तस्याम् उषति येन सः ॥ (१०।२)

तत्त्राणाद् व्यञ्जनाच् चापि स तत्पुरुषवक्त्रकः । (११।१)

हृदयं बोधपर्यायः सो ऽस्य घोरः शिवो यतः ॥ (११।२)

परिग्रहस्य घोरत्वाद् घोरोक्तिर् उपचारतः । (१२।१)

वामस् त्रिवर्गवामत्वाद् रहस्यश्च स्वभावतः ॥ (१२।२)

वामं धाम परं गुह्यं यस्यासौ वामगुह्यकः । (१३।१)

सद्योऽणूनां मूर्तयः सम्भवन्ति यस्येच्छातस् तेन सद्योऽभिधानः । (१३।२)

सद्यो मूर्तीर्योगिनां वा विधत्ते सद्योमूर्तिः कृत्यशैघ्र्यान् न मूर्तेः ॥ (१३।३)

इत्थं शक्तिः कुर्वती देहकृत्यं देहाभावादुच्यते देहशब्दैः । (१४।१)

तस्या भेदा ये ऽपि वामादयः स्युस्ते ऽपि प्रोक्ताः कृत्यभेदेन सद्भिः ॥ (१४।२)