अथ सर्वज्ञवाक्येन प्रतिपन्नस्य लक्षणम् । (१।१)

कथ्यते ग्रन्थिपाशस्य किंचिद् युक्त्यापि लेशतः ॥ (१।२)

तद् एकम् अशिवं बीजं जगतश् चित्रशक्तिमत् । (२।१)

सहकार्यधिकारान्तसंरोधि व्याप्यनश्वरम् ॥ (२।२)

कर्तानुमीयते येन जगद्धर्मेण हेतुना । (३।१)

तेनोपादानम् अप्यस्ति न पटस् तन्तुभिर् विना ॥ (३।२)

तद् अचेतनम् एव स्यात् कार्यस्याचित्त्वदर्शनात् । (४।१)

प्राप्तः सर्वहरो दोषः कारणानियमो ऽन्यथा ॥ (४।२)

यद्यनित्यम् इदं कार्यं कस्माद् उत्पद्यते पुनः । (५।१)

अव्यापि चेत् कुतस् तत् स्यात् सर्वेषां सर्वतोमुखम् ॥ (५।२)

यद् अनेकम् अचित् तत् तु दृष्टम् उत्पत्तिधर्मकम् । (६।१)

न तद् उत्पत्तिमत् तस्माद् एकम् अभ्युपगम्यताम् ॥ (६।२)

पटस्तन्तुगणाद्दृष्टः सर्वम् एकम् अनेकतः । (७।१)

तदप्यनेकम् एकस्माद् एव बीजात् प्रजायते ॥ (७।२)

येषां चिद्धर्मकाद्धेतोर् अचिद् अप्युपजायते । (८।१)

तेषां धूमेन लिङ्गेन जलं किं नानुमीयते ॥ (८।२)

भूतावधि जगद्येषां कारणं परमाणवः । (९।१)

तेषां पूर्वोदिताद्धेतोर् ज्ञातैव ज्ञानसूक्ष्मता ॥ (९।२)

शरीरादेः शरीरादि यदि तन्निखिलात्यये । (१०।१)

का वार्त्ता नाखिलध्वंसो न सर्वज्ञो मृषा वदेत् ॥ (१०।२)

एकदेशेऽपि यो धर्मः प्रतीतो यस्य धर्मिणः । (११।१)

स तस्य सर्वतः केन जायमानो निवार्यते ॥ (११।२)

कोटिशो मरणं दृष्ट्वा संहतानां शरीरिणाम् । (१२।१)

सो ऽपि प्रतीयते कालो यत्राशेषजनक्षयः ॥ (१२।२)

तदाधाराणि कार्याणि शक्तिरूपाणि संहृतौ । (१३।१)

विवृतौ व्यक्तिरूपाणि व्याप्रियन्ते ऽर्थसिद्धये ॥ (१३।२)

तन्त्वादिकारकादानं पटासत्त्वे पटार्थिनः । (१४।१)

सत्त्वे कारकशब्दोऽपि व्यपैतीति हतं जगत् ॥ (१४।२)

साफल्यम् असदुत्पत्ताव् अस्तु कारकवस्तुनः । (१५।१)

उत्पादयतु सर्वस्मात् सर्वः सर्वम् अभीप्सितम् ॥ (१५।२)

अथाशक्यं यतः शक्यम् अत्र वः किं नियामकम् । (१६।१)

नच पश्यामि तत्किंचित् शक्तिश् चेत् सिद्धसाध्यता ॥ (१६।२)

अन्यथा कारकव्रातप्रवृत्त्यनुपपत्तितः । (१७।१)

श्रुतिर् आदानम् अर्थश् च व्यपैतीत्यपि तद्धतम् ॥ (१७।२)

अथास्त्युत्पादिका शक्तिर् न कार्यं शक्तिरूपकम् । (१८।१)

तयोर् विशेषणं वाच्यं नैतत् पश्यामि किंचन ॥ (१८।२)

तस्मान्नियामिका जन्यशक्तिः कारकवस्तुनः । (१९।१)

सान्वयव्यतिरेकाभ्यां रूढितो वावसीयते ॥ (१९।२)

तद्व्यक्तिर्जननं नाम तत्कारकसमाश्रयात् । (२०।१)

तेन तन्तुगताकारं पटाकारावरोधकम् ॥ (२०।२)

वेमादिनापनीयाथ पटव्यक्तिः प्रकाश्यते । (२१।१)

यथा कटादिगूढस्य पटादेस्तद्व्युदासतः । (२१।२)

नासतः क्रियते व्यक्तिः कलादेर् ग्रन्थितस् तथा ॥ (२१।३)