न स्वतो नापि परतो न द्वाभ्यां नाप्यहेतुतः । (१।१)

उत्पन्ना जातु विद्यन्ते भावाः क्वचन केचन ॥ (१।२)

चत्वारः प्रत्यया हेतुर् आरम्बणम् अनन्तरम् । (२।१)

तथैवाधिपतेयं च प्रत्ययो नास्ति पञ्चमः ॥ (२।२)

न हि स्वभावो भावानां प्रत्ययादिषु विद्यते । (३।१)

अविद्यमाने स्वभावे परभावो न विद्यते ॥ (३।२)

क्रिया न प्रत्ययवती नाप्रत्ययवती क्रिया । (४।१)

प्रत्यया नाक्रियावन्तः क्रियावन्तश्च सन्त्युत ॥ (४।२)

उत्पद्यते प्रतीत्येमान् इतीमे प्रत्ययाः किल । (५।१)

यावन्नोत्पद्यत इमे तावन्नाप्रत्ययाः कथम् ॥ (५।२)

नैवासतो नैव सतः प्रत्ययो ऽर्थस्य युज्यते । (६।१)

असतः प्रत्ययः कस्य सतश्च प्रत्ययेन किम् ॥ (६।२)

न सन् नासन् न सदसन् धर्मो निर्वर्तते यदा । (७।१)

कथं निर्वर्तको हेतुर् एवं सति हि युज्यते ॥ (७।२)

अनारम्बण एवायं सन् धर्म उपदिश्यते । (८।१)

अथानारम्बणे धर्मे कुत आरम्बणं पुनः ॥ (८।२)

अनुत्पन्नेषु धर्मेषु निरोधो नोपपद्यते । (९।१)

नानन्तरम् अतो युक्तं निरुद्धे प्रत्ययश्च कः ॥ (९।२)

भावानां निःस्वभावानां न सत्ता विद्यते यतः । (१०।१)

सतीदम् अस्मिन् भवतीत्येतन्नैवोपपद्यते ॥ (१०।२)

न च व्यस्तसमस्तेषु प्रत्ययेष्वस्ति तत् फलम् । (११।१)

प्रत्ययेभ्यः कथं तच्च भवेन्न प्रत्ययेषु यत् ॥ (११।२)

अथासद् अपि तत् तेभ्यः प्रत्ययेभ्यः प्रवर्तते । (१२।१)

अप्रत्ययेभ्यो ऽपि कस्मान्नाभिप्रवर्तते फलम् ॥ (१२।२)

फलं च प्रत्ययमयं प्रत्ययाश्चास्वयंमयाः । (१३।१)

फलमस्वमयेभ्यो यत्तत्प्रत्ययमयं कथम् ॥ (१३।२)

तस्मान्न प्रत्ययमयं नाप्रत्ययमयं फलम् । (१४।१)

संविद्यते फलाभावात् प्रत्ययाप्रत्ययाः कुतः ॥ (१४।२)