यद् इन्धनं स चेद् अग्निर् एकत्वं कर्तृकर्मणोः । (१।१)

अन्यश्चेद् इन्धनाद् अग्निर् इन्धनाद् अप्यृते भवेत् ॥ (१।२)

नित्यप्रदीप्त एव स्याद् अप्रदीपनहेतुकः । (२।१)

पुनरारम्भवैयर्थ्यम् एवं चाकर्मकः सति ॥ (२।२)

परत्र निरपेक्षत्वाद् अप्रदीपनहेतुकः । (३।१)

पुनरारम्भवैयर्थ्यं नित्यदीप्तः प्रसज्यते ॥ (३।२)

तत्रैतत् स्याद् इध्यमानम् इन्धनं भवतीति चेत् । (४।१)

केनेध्यताम् इन्धनं तत् तावन्मात्रम् इदं यदा ॥ (४।२)

अन्यो न प्राप्स्यते ऽप्राप्तो न धक्ष्यत्यदहन् पुनः । (५।१)

न निर्वास्यत्यनिर्वाणः स्थास्यते वा स्वलिङ्गवान् ॥ (५।२)

अन्य एवेन्धनाद् अग्निर् इन्धनं प्राप्नुयाद् यदि । (६।१)

स्त्री सम्प्राप्नोति पुरुषं पुरुषश्च स्त्रियं यथा ॥ (६।२)

अन्य एवेन्धनाद् अग्निर् इन्धनं कामम् आप्नुयात् । (७।१)

अग्नीन्धने यदि स्याताम् अन्योन्येन तिरस्कृते ॥ (७।२)

यदीन्धनम् अपेक्ष्याग्निर् अपेक्ष्याग्निं यदीन्धनम् । (८।१)

कतरत् पूर्वनिष्पन्नं यद् अपेक्ष्याग्निर् इन्धनम् ॥ (८।२)

यदीन्धनम् अपेक्ष्याग्निर् अग्नेः सिद्धस्य साधनम् । (९।१)

एवं सतीन्धनं चापि भविष्यति निरग्निकम् ॥ (९।२)

यो ऽपेक्ष्य सिध्यते भावस्तम् एवापेक्ष्य सिध्यति । (१०।१)

यदि यो ऽपेक्षितव्यः स सिध्यतां कम् अपेक्ष्य कः ॥ (१०।२)

यो ऽपेक्ष्य सिध्यते भावः सो ऽसिद्धो ऽपेक्षते कथम् । (११।१)

अथाप्यपेक्षते सिद्धस्त्वपेक्षास्य न युज्यते ॥ (११।२)

अपेक्ष्येन्धनम् अग्निर् न नानपेक्ष्याग्निर् इन्धनम् । (१२।१)

अपेक्ष्येन्धनम् अग्निं न नानपेक्ष्याग्निम् इन्धनम् ॥ (१२।२)

आगच्छत्यन्यतो नाग्निर् इन्धने ऽग्निर् न विद्यते । (१३।१)

अत्रेन्धने शेषम् उक्तं गम्यमानगतागतैः ॥ (१३।२)

इन्धनं पुनर् अग्निर् न नाग्निर् अन्यत्र चेन्धनात् । (१४।१)

नाग्निर् इन्धनवान्नाग्नाविन्धनानि न तेषु सः ॥ (१४।२)

अग्नीन्धनाभ्यां व्याख्यात आत्मोपादानयोः क्रमः । (१५।१)

सर्वो निरवशेषेण सार्धं घटपटादिभिः ॥ (१५।२)

आत्मनश्च सतत्त्वं ये भावानां च पृथक् पृथक् । (१६।१)

निर्दिशन्ति न तान्मन्ये शासनस्यार्थकोविदान् ॥ (१६।२)